NÍ KASEMI 43
LA 90 Nyɛɛ Wo Nyɛ Sibi He Wami
Mɛni Maa Ye Bua Wɔ Ke Wa Yi Mi Ngɛ Wɔ Pee Enyɔɔnyɔ?
“Nyɛ ná níhi tsuo a nɔ mi mami.”—1 TƐS. 5:21.
OTI NƐ NGƐ NÍ KASEMI Ɔ MI
Wa maa hyɛ nɔ́ nɛ wa maa pee ke wa be nɔ mi mami kaa Yehowa susuɔ wa he.
1-2. (a) Mɛni ji ní komɛ nɛ haa nɛ Yehowa sɔmɔli a yi mi peeɔ mɛ enyɔɔnyɔ? (b) Mɛni he wa ma susu ngɛ ní kasemi nɛ ɔ mi?
WA WA jio, wa wɛ jio, be komɛ ɔ, wɔ tsuo wa yi mi peeɔ wɔ enyɔɔnyɔ.a Kaa nɔ hyɛmi nɔ́ ɔ, mo susu yiheyo ko nɛ e ji Odasefono nɛ e susu kaa Yehowa susuu we e he ɔ he nɛ o hyɛ. Eko ɔ, enɛ ɔ ma ha nɛ e juɛmi maa pee lɛ enyɔɔnyɔ kaa e ma ha nɛ a baptisi lɛ loo a ko baptisi lɛ. Jehanɛ hu ɔ, mo susu nyɛminyumu ko nɛ benɛ e ji niheyo ɔ, e hla kaa e maa ngɔ Yehowa sɔmɔmi kɛ pee nɔ́ titli ngɛ e si himi mi mohu pe nɛ e ma ya hla sika babauu ɔ he nɛ o hyɛ. Amlɔ nɛ ɔ, e wa ngɛ jeha mi nɛ e weku ɔ hiami níhi pɛ lɛ e sika suɔ nya. Eko ɔ, enɛ ɔ ma ha nɛ e bi e he ke ji e mwɔ yi mi kpɔ nɛ da benɛ e ji niheyo ɔ lo. Aloo moo po nyɛmiyo ko nɛ e wa ngɛ jeha mi nɛ e be nɔmlɔ tso mi he wami ɔ he foni nɛ o hyɛ. Eko ɔ, e kɔni mi ma jɔ̃ ejakaa amlɔ nɛ ɔ, e nyɛ we nɛ e pee níhi nɛ e nyɛɔ peeɔ be ko nɛ be ɔ. Anɛ o bi o he sane nɛ nyɛɛ se nɛ ɔ hyɛ lo? ‘Anɛ Yehowa naa níhi nɛ i peeɔ ɔ lo? Anɛ se nami ngɛ he kaa i ngɔ níhi kɛ sã afɔle kɛ ha Yehowa lo? Anɛ loloolo ɔ, ye he hia Yehowa lo?’
2 Ke wa ná we heto kɛ ha sane bimihi kaa jã a, lɔ ɔ ma nyɛ ma ha nɛ wa hemi kɛ yemi ɔ mi ma gbɔjɔ, nɛ wa ma kpa Yehowa sɔmɔmi. Ngɛ ní kasemi nɛ ɔ mi ɔ, wa maa hyɛ bɔ nɛ Baiblo sisi tomi mlaahi maa ye bua wɔ ha ke wa yi mi ngɛ wɔ enyɔɔnyɔ pee kaa Yehowa susuu we wa he, ke wa susu kaa nile be yi mi kpɔ komɛ nɛ wa mwɔ kɛ be ɔ he, aloo ke wa susu kaa se nami ko be wa he ngɛ Yehowa hɛ mi amlɔ nɛ ɔ.
NƆ́ NƐ MAA YE BUA WƆ KE WA YI MI TƐ́ WƆ NGƐ NÍ KOMƐ A HE
3. Ke wa yi mi tɛ́ wɔ ngɛ ní komɛ a he ɔ, mɛni e sa kaa waa pee?
3 Ke wa yi mi tɛ́ wɔ ngɛ ní komɛ a he ɔ, e maa hi wawɛɛ kaa wa ma hla níhi a mi ngɛ Baiblo ɔ mi. Ke wa pee jã a, hemi kɛ yemi nɛ wa ngɛ ngɛ Yehowa mi ɔ mi maa wa, nɛ huɛ bɔmi nɛ ngɛ waa kɛ lɛ wa kpɛti ɔ hu mi maa wa. Jehanɛ hu ɔ, lɔ ɔ maa ye bua wɔ nɛ waa “da si kpɛii ngɛ hemi kɛ yemi ɔ mi.”—1 Kor. 16:13.
4. Kɛ wa ma plɛ kɛ “ná níhi tsuo a nɔ mi mami” ha kɛɛ? (1 Tɛsalonika Bi 5:21)
4 Kane 1 Tɛsalonika Bi 5:21. Baiblo ɔ wo wɔ he wami kaa wa “ná níhi tsuo a nɔ mi mami.” Mɛni blɔ nɔ wa maa gu kɛ pee jã? Ke wa yi mi tɛ́ wɔ ngɛ nɔ́ ko he ɔ, e sa nɛ waa hyɛ nɔ́ nɛ Baiblo ɔ de ngɛ he. Kaa nɔ hyɛmi nɔ́ ɔ, mo susu yiheyo nɛ wa tu e he munyu kɛ sɛ hlami kaa e yi mi peeɔ lɛ enyɔɔnyɔ kaa Mawu susuɔ e he loo e susuu we e he ɔ he nɛ o hyɛ. Anɛ e sa nɛ e susu kaa juɛmi nɛ e ná a da lo? Dɛbi, mohu ɔ, e sa nɛ e “ná níhi tsuo a nɔ mi mami” kɛ gu Baiblo ɔ nɛ e maa kase nɛ e maa le Yehowa juɛmi ngɛ sane ɔ he ɔ nɔ.
5. Ke wa yi mi tɛ́ wɔ ngɛ sane komɛ a he ɔ, mɛni maa ye bua wɔ konɛ waa le Yehowa susumi ngɛ he?
5 Ke wa kane Baiblo ɔ, e ngɛ kaa nɔ́ nɛ Yehowa kɛ wɔ ngɛ munyu tue. Se ke wa suɔ nɛ waa le Yehowa susumi ngɛ níhi a he ɔ, e sa nɛ waa pee babauu pe Baiblo ɔ pɛ nɛ wa maa kane. E sa nɛ wa hla níhi a mi ngɛ ngmamihi nɛ maa ye bua wɔ ɔ mi. Wa ma nyɛ maa ngɔ ga dadehi nɛ Yehowa asafo ɔ pee ɔ kɛ hla níhi a mi kɛ ya tsitsaa. (Abɛ 2:3-6) Jehanɛ hu ɔ, e sa nɛ waa sɔle kɛ ha Yehowa nɛ wa bi lɛ nɛ e ye bua wɔ konɛ waa le e susumi ngɛ sane bimihi nɛ wa ngɛ ɔ he. Lɔ ɔ se ɔ, wa ma nyɛ ma hla Baiblo sisi tomi mlaahi kɛ munyu kpa komɛ nɛ maa ye bua wɔ kɛ tsu wa si fɔfɔɛ ɔ he ní. Jehanɛ hu ɔ, ke wa susu ni komɛ nɛ a kɛ wa si fɔfɔɛ ɔ eko kpe blema a he ɔ, e maa ye bua wɔ wawɛɛ.
6. Ke wa yi mi ngɛ wɔ enyɔɔnyɔ pee ɔ, mɛni blɔ nɔ nɛ asafo mi kpehi yeɔ buaa wɔ?
6 Jehanɛ hu ɔ, Yehowa kɛ wɔ tuɔ munyu ke wa ya asafo mi kpehi. Ke wa yaa asafo mi kpehi be fɛɛ be ɔ, eko ɔ, magbɛ nɔ munyu loo heto ko nɛ nɔ ko ma ha a ma nyɛ maa ye bua wɔ konɛ wa yi mi nɛ ko pee wɔ enyɔɔnyɔ hu. (Abɛ 27:17) Amlɔ nɛ ɔ, nyɛ ha nɛ waa hyɛ nɔ́ nɛ wa ma nyɛ maa pee ke wa yi mi tɛ́ wɔ ngɛ ní pɔtɛɛ komɛ a he.
KE O BE NƆ MI MAMI KAA YEHOWA SUSUƆ O HE
7. Mɛni sanehi nɛ eko ɔ, ni komɛ ma nyɛ ma bi?
7 Anɛ o bi o he hyɛ ke ji Yehowa susuɔ o he niinɛ lo? Ke o nuɔ he kaa se nami ko be o he ɔ, eko ɔ, o ma susu kaa o kɛ je ɔ tsuo Bɔlɔ ɔ be nyɛe maa pee huɛ. Eko ɔ, Matsɛ David hu nu he jã nɔuu. E pee lɛ nyakpɛ kaa Yehowa susuɔ adesahi a he, nɛ e de ke: “Oo Yehowa, mɛnɔ ji nɔmlɔ adesa nɛ o susuɔ e he, mɛnɔ ji nɔmlɔ bi nɛ o juɛɔ e he?” (La 144:3) Anɛ Yehowa susuɔ wa kpɛti nɔ fɛɛ nɔ he niinɛ lo? Nyɛ ha nɛ waa hyɛ.
8. Ngɛ 1 Samuel 16:6, 7, 10-12 ɔ nya a, mɛni Yehowa yɔseɔ ngɛ nihi a he?
8 Baiblo ɔ ha nɛ wa na kaa Yehowa susuɔ nihi nɛ e peeɔ mɛ kaa a he be se nami ɔ a he wawɛɛ. Kaa nɔ hyɛmi nɔ́ ɔ, Yehowa tsɔ Samuel kaa e ya Ishai we ɔ mi nɛ e ya pɔ e binyumu ɔmɛ a ti nɔ kake nu konɛ e ye matsɛ ngɛ Israel. Ishai tsɛ e binyumu ɔmɛ a kpɛti nihi kpaago konɛ a ba na Samuel. Se e tsɛ we David nɛ ji e nakutso ɔ kɛ piɛɛ a he.b Se kɛ̃ ɔ, David ji nɔ nɛ Yehowa hla. (Kane 1 Samuel 16:6, 7, 10-12.) Yehowa le nɔ tutuutu nɛ David ji. E le kaa David suɔ lɛ wawɛɛ.
9. Mɛni he je nɛ o ma nyɛ ma ná nɔ mi mami kaa Yehowa susuɔ o he niinɛ ɔ? (Hyɛ foni ɔ hulɔ.)
9 Mo susu nɔ́ nɛ Yehowa pee kɛ tsɔɔ kaa e susuɔ o he ɔ he nɛ o hyɛ. E wo mo ga nɛ se be ngɛ si fɔfɔɛ pɔtɛɛ komɛ nɛ o kɛ kpe ɔ mi. (La 32:8) Ke e li mo saminya a, anɛ e ma nyɛ maa pee jã lo? (La 139:1) Ke o kɛ Yehowa ga womi tsu ní nɛ o na kaa se nami ngɛ he ɔ, o ma ná nɔ mi mami kaa e susuɔ o he saminya. (1 Kron. 28:9; Níts. 17:26, 27) Yehowa naa nɔ́ fɛɛ nɔ́ nɛ o peeɔ konɛ o nyɛ nɛ o sɔmɔ lɛ nɛ o bu lɛ tue ɔ. Jehanɛ hu ɔ, e naa su kpakpahi nɛ o ngɛ ɔ, nɛ e suɔ nɛ e kɛ mo nɛ pee huɛ. (Yer. 17:10) Ke mo hu o suɔ kaa o kɛ lɛ maa pee Huɛ ɔ, lɛ hu e bua maa jɔ.—1 Yoh. 4:19.
“Ke o hla [Yehowa] se blɔ ɔ, e ma ha nɛ o na lɛ.” —1 Kron. 28:9 (Hyɛ kuku 9)c
KE O SUSUƆ KAA NILE BE YI MI KPƆ KOMƐ NƐ O MWƆ KƐ BE Ɔ MI
10. Ke wa susu yi mi kpɔ komɛ nɛ wa mwɔ kɛ be ɔ he ɔ, mɛni sanehi nɛ wa ma nyɛ ma bi wa he?
10 Be komɛ ɔ, ni komɛ ma nyɛ ma susu yi mi kpɔ komɛ nɛ a mwɔ kɛ be ɔ he, nɛ enɛ ɔ ma nyɛ ma ha nɛ a juɛmi nɛ pee mɛ enyɔɔnyɔ. Eko ɔ, ní tsumi nɛ a ngɛ tsue ɔ haa nɛ a náa sika fuu, se a ngmɛɛ jamɛ a ní tsumi ɔ he kɛ fɔ si konɛ a nyɛ nɛ a sɔmɔ Yehowa kɛ pi si. Se amlɔ nɛ ɔ, eko ɔ, jehahi babauu ba pue mi, nɛ a naa kaa a huɛmɛ ngɛ ní tsue nɛ a ngɛ sika náe, nɛ a si himi hu pee gbɔjɔɔ. Enɛ ɔ he ɔ, a ma nyɛ ma bi a he ke: ‘Anɛ se nami ngɛ he kaa i ngɔ níhi kɛ sã afɔle ha Yehowa lo? Aloo jã nɛ i pee ɔ ha nɛ ní komɛ bɔ mi ngɛ ye si himi mi lo?’
11. Mɛni lɛ ha nɛ nɔ nɛ ngma La 73 ɔ hao ɔ?
11 Ke sane bimihi kaa jã ngɛ o juɛmi nya gbae ɔ, mo susu nɔ́ nɛ Baiblo ɔ de ngɛ nɔ nɛ ngma La 73 ɔ he ɔ he nɛ o hyɛ. E na kaa nihi nɛ a sɔmɔ we Yehowa a plɔke, a ná ní, nɛ e pee kaa nɔ́ nɛ haomi ko be a kuɛ nɔ. (La 73:3-5, 12) Benɛ e na kaa níhi ngɛ nɔ yae ha mɛ saminya a, e nu he kaa nile be yi mi kpɔ nɛ e mwɔ kaa e ma sɔmɔ Yehowa a mi. Enɛ ɔ ha nɛ e kɔni mi jɔ̃, nɛ e “hao ligbi ɔ tsuo.” (La 73:13, 14) Mɛni ye bua lɛ nɛ e nyɛ nɛ e da jamɛ a si fɔfɔɛ ɔ nya?
12. Ngɛ La 73:16-18 ɔ nya a, mɛni blɔ nɔ nɛ La polɔ ɔ gu kɛ tsu e nyagba a he ní?
12 Kane La 73:16-18. La polɔ ɔ ya Yehowa sɔlemi we ɔ. Benɛ e ya lejɛ ɔ, e nyɛ nɛ e susu níhi a he saminya. E na kaa e ngɛ mi kaa ni komɛ a si himi ma nyɛ maa pee gbɔjɔɔ mohu lɛɛ, se jamɛatsɛ ɔmɛ be hɛnɔkami ko hwɔɔ se. Enɛ ɔ ye bua lɛ nɛ e ná tue mi jɔmi, ejakaa e ba le kaa Mawu jami nɛ e kɛ maa pee nɔ́ titli ngɛ e si himi mi ɔ ji nɔ́ ko nɛ se be. Lɔ ɔ he ɔ, e mwɔ e yi mi kpɔ kaa e maa ya nɔ ma sɔmɔ Yehowa.—La 73:23-28.
13. Ke o yi mi peeɔ mo enyɔɔnyɔ ngɛ yi mi kpɔ komɛ nɛ o mwɔ kɛ be ɔ he ɔ, mɛni o ma nyɛ maa pee? (Hyɛ foni ɔ hulɔ.)
13 Mawu Munyu ɔ ma nyɛ maa ye bua mo konɛ mo hu o ná tue mi jɔmi. Ngɛ mɛni blɔ nɔ? O ma nyɛ ma pue o yi mi tɛ ngɛ ní kpakpahi nɛ o ngɛ, kɛ jɔɔmihi nɛ Yehowa ngɛ mo jɔɔe ɔ he, nɛ o kai kaa Yehowa be nihi nɛ a sɔmɔ we lɛ ɔ ní kpakpa nɛ ɔmɛ hae. Ngɛ nihi nɛ a sɔmɔ we Yehowa a blɔ fa mi ɔ, ke a ná ní tsumi kpakpa ko nɛ a si himi pee gbɔjɔɔ ɔ, a susuɔ kaa lɔ ɔ ji nɔ́ nɛ he hia ngɛ si himi mi, ejakaa a be hwɔɔ se he hɛnɔkami ko. Se moo lɛɛ, Yehowa ngɛ mo jɔɔe amlɔ nɛ ɔ, nɛ e wo si kaa e maa ya nɔ maa pee ní kpakpahi fuu ha mo hwɔɔ se. (La 145:16) Jehanɛ hu ɔ, mo susu enɛ ɔ he nɛ o hyɛ: Kaa o mwɔ yi mi kpɔ kpa ko be ko nɛ be ɔ, jinɛ o ko li bɔ nɛ o si himi ko ji ha mwɔnɛ ɔ. Se anɔkuale sane ji kaa, ke suɔmi nɛ o ngɛ kɛ ha Mawu kɛ ni kpahi ɔ ha nɛ o mwɔ yi mi kpɔ komɛ ɔ, lɛɛ kokooko ɔ, o nine maa su níhi nɛ ma ha nɛ o bua nɛ jɔ ngɛ si himi mi ɔ nɔ be fɛɛ be.
Moo ngɔ o juɛmi kɛ ma ní kpakpahi nɛ Yehowa wo si kaa e maa pee ha mo hwɔɔ se ɔ nɔ (Hyɛ kuku 13)d
KE O SUSU KAA O HE BE SE NAMI KƐ HA YEHOWA
14. Mɛni si fɔfɔɛ mi nɛ ni komɛ ngɛ, nɛ mɛni sane nɛ enɛ ɔ ma nyɛ ma ha nɛ a bi?
14 Yehowa sɔmɔli komɛ nyɛ we nɛ a pee babauu ngɛ Yehowa sɔmɔmi mi akɛnɛ a wa ngɛ jeha mi, loo a be nɔmlɔ tso mi he wami, aloo kpa ba a he ɔ he je. Enɛ ɔ ma nyɛ ma ha nɛ a nu he kaa a he be se nami ngɛ Yehowa hɛ mi. Eko ɔ, a ma bi ke, ‘Anɛ loloolo ɔ, ye he hia Yehowa lo?’
15. Mɛni nɔ mi mami nɛ nɔ nɛ ngma La 71 ɔ ná?
15 Nɔ nɛ ngma La 71 ɔ hu nu he jã. Enɛ ɔ he ɔ, e sɔle ke: “Ko kua mi ke ye he wami ta.” (La 71:9, 18) E ngɛ mi kaa la polɔ ɔ kɔni mi jɔ̃ mohu lɛɛ, se e ngɛ nɔ mi mami kaa ke e ye Yehowa anɔkuale ɔ, e maa tsɔɔ lɛ blɔ nɛ e maa ye bua lɛ. Kaa bɔ nɛ e ji ngɛ la polɔ ɔ blɔ fa mi ɔ, nihi nɛ a miaa a hɛ mi kaa a ma sɔmɔ Yehowa ngɛ haomihi nɛ a kɛ ngɛ kpee ɔ tsuo se ɔ, Yehowa bua jɔɔ a he.—La 37:23-25.
16. Ngɛ mɛni blɔhi a nɔ nɛ Yehowa susuɔ nihi nɛ a wa ngɛ jeha mi ɔ a he? (La 92:12-15)
16 Ke o wa ngɛ jeha mi po ɔ, moo na o si fɔfɔɛ ɔ kaa bɔ nɛ Yehowa naa lɛ ɔ. E ngɛ mi kaa o be nɔmlɔ tso mi he wami mohu lɛɛ, se Yehowa ma nyɛ maa ye bua mo konɛ o ye lɛ anɔkuale. (Kane La 92:12-15.) Moo bɔ mɔde kaa o maa ngɔ o juɛmi kɛ ma níhi nɛ o ma nyɛ maa pee amlɔ nɛ ɔ nɔ, mohu pe nɛ o kɛ o juɛmi maa ma níhi nɛ o be nyɛe maa pee ɔ nɔ. Kaa nɔ hyɛmi nɔ́ ɔ, anɔkuale nɛ o yeɔ kɛ ni kpahi a he nɛ o susuɔ ɔ ma nyɛ maa wo nihi he wami. O ma nyɛ ma de mɛ bɔ nɛ Yehowa plɛ kɛ wo mo he wami jehahi babauu nɛ be ɔ, nɛ o de mɛ Baiblo mi si womihi nɛ o ngɛ blɔ hyɛe kaa a maa ba mi hwɔɔ se ɔ. Jehanɛ hu ɔ, o hɛ nɛ ko je nɔ kaa Yehowa buɔ sɔlemihi nɛ o sɔleɔ kɛ haa ni kpahi ɔ tue saminya. (1 Pet. 3:12) Bɔ fɛɛ bɔ nɛ wa si fɔfɔɛ ma ji ha a, wɔ tsuo wa ma nyɛ maa pee nɔ́ ko kɛ ha Yehowa kɛ ni kpahi.
17. Mɛni he je nɛ e sɛ nɛ waa ngɔ wa he kɛ to ni kpahi a he ɔ?
17 Ke o kɔni mi jɔ̃ kaa o be nyɛe ma tsu babauu ngɛ Yehowa sɔmɔmi mi kaa bɔ nɛ o pee be ko nɛ be ɔ, mo ná nɔ mi mami kaa e bua jɔ nɔ́ nɛ o nyɛɔ peeɔ ɔ he. Eko ɔ, o maa ngɔ nɔ́ nɛ o tsu ɔ kɛ to nɔ́ nɛ ni kpahi tsu ɔ he, se koo pee jã! Mɛni he je? Ejakaa Yehowa po pee we jã. (Gal. 6:4) Kaa nɔ hyɛmi nɔ́ ɔ, Maria ngɔ nu nɛ he jua wa kɛ ke Yesu. (Yoh. 12:3-5) Se yalɔyo ohiatsɛ ɔ lɛɛ, e ngɔ sika nyafii enyɔ nɛ a sui nɔ́ ko kulaa a kɛ ya wo daka a mi. (Luka 21:1-4) Se kɛ̃ ɔ, Yesu na kaa nɔ́ nɛ Maria kɛ yalɔyo ɔ tsuo pee ɔ tsɔɔ kaa a ngɛ hemi kɛ yemi. Akɛnɛ Yesu jeɔ e Tsɛ ɔ su ɔmɛ kpo pɛpɛɛpɛ he je ɔ, o ma nyɛ ma ná nɔ mi mami kaa Yehowa bua jɔɔ nɔ́ fɛɛ nɔ́ nɛ o jeɔ o tsui mi kɛ peeɔ ɔ he, e kle jio, e klee we jio.
18. Ke wa yi mi ngɛ wɔ pee enyɔɔnyɔ ɔ, mɛni maa ye bua wɔ konɛ wa tsu he ní? (Hyɛ daka nɛ ji, “Baiblo ɔ Ma Nyɛ Maa Ye Bua Mo Ke O Yi Mi Ngɛ Mo Pee Enyɔɔnyɔ” ɔ hulɔ.)
18 Ngɛ anɔkuale mi ɔ, be komɛ ɔ, wɔ tsuo wa yi mi peeɔ wɔ enyɔɔnyɔ. Se kaa bɔ nɛ wa kase ɔ, Baiblo ɔ ma nyɛ maa ye bua wɔ nɛ waa le nɔ́ nɛ wa maa pee. Lɔ ɔ he ɔ, ke o yi mi ngɛ mo pee enyɔɔnyɔ ɔ, bɔɔ mɔde nɛ o pee níhi nɛ maa ye bua mo kɛ tsu he ní. Ke o pee jã a, o kɔni mi be jɔ̃e. Ngɛ anɔkuale mi ɔ, Yehowa le mo saminya. E bua jɔ kaa o ngɔ níhi kɛ sã afɔle ngɛ e he je, nɛ e maa jɔɔ mo. Mo ná nɔ mi mami kaa Yehowa suɔ e sɔmɔli nɛ a yeɔ lɛ anɔkuale ɔ a kpɛti nɔ fɛɛ nɔ, nɛ e susuɔ a he.
LA 111 Nɔ́ He Je Nɛ Wa Ngɛ Bua Jɔmi
a MUNYU NƐ A TSƆƆ SISI: Ngɛ ní kasemi nɛ ɔ mi ɔ, wa ma susu ní komɛ nɛ haa nɛ wa yi mi peeɔ wɔ enyɔɔnyɔ ngɛ suɔmi nɛ Yehowa ngɛ kɛ ha wɔ ɔ he, nɛ wa maa hyɛ ke ji nile ngɛ yi mi kpɔhi nɛ wa mwɔ kɛ be ɔ a mi loo nile be mi. Wa juɛmi nɛ ma nyɛ maa pee wɔ enyɔɔnyɔ nɛ ní kasemi nɛ ɔ ngɛ he munyu tue ɔ tsɔɔ we kaa wa be hemi kɛ yemi ngɛ Yehowa kɛ e si womi ɔmɛ a mi.
b E ngɛ mi kaa Baiblo ɔ tsɔɔ we jeha tutuutu nɛ David ye benɛ Yehowa hla lɛ ɔ mohu lɛɛ, se e ma nyɛ maa ba kaa jamɛ a be ɔ mi ɔ, e yi jeha nyingmi enyɔ lolo.—Hyɛ September 1, 2011 Blɛfo gbi Hwɔɔmi Mɔ ɔ bf. 29, kk. 2 ɔ.
c FONI ƆMƐ A MI TSƆƆMI: Yiheyo ko nɛ e ngɛ Baiblo ɔ kasee konɛ e le Yehowa juɛmi ngɛ si fɔfɔɛ nɛ e kɛ ngɛ kpee ɔ he.
d FONI Ɔ MI TSƆƆMI: Nyɛminyumu ko nɛ e ngɛ ní tsumi ko tsue konɛ e nyɛ nɛ e hyɛ e weku ɔ nɔ, se e ngɛ Paradeiso nɛ maa ba a he susue.