Mo Ná Nɔ Mi Mami Kaa Yehowa Maa Wo O Bua

1. Moo kale si himi nɛ Yudabi ɔmɛ ya je mi ngɛ nyɔguɛ tso mi.

YUDABI ɔmɛ pee yayami kɛ si Yehowa si abɔ, nɛ a pee jã jehahi babauu. Enɛ ɔ he ɔ, Yehowa ngmɛ blɔ nɛ Babilonbi ɔmɛ ba kpata a ma a hɛ mi, nɛ a nuu mɛ nyɔguɛ. Mɛni si fɔfɔɛ mi nɛ a ya je ngɛ Babilon? (2 Kron. 36:​15, 16, 20, 21) Ngɛ anɔkuale mi ɔ, Yudabi ɔmɛ ngɛ he blɔ nɛ a peeɔ ní komɛ nɛ a he hia ngɛ a si himi mi daa ligbi ngɛ Babilon. (Yer. 29:​4-7) Se kɛ̃ ɔ, si himi ɔ be gbɔjɔɔ ha mɛ, nɛ pi lejɛ ɔ hu nɛ a suɔ nɛ a hi. Kɛ si fɔfɔɛ nɛ a ya je mi ɔ ha nɛ a nu he ha kɛɛ? Mo kadi nɔ́ nɛ a kpɛti nɔ kake de nɛ a ngma ngɛ Baiblo ɔ mi. E de ke: “Babilon pa amɛ a he lɛ wa hi si ngɛ. Benɛ wa kai Zion ɔ, wa fo ya.” (La 137:1) Yudabi nɛ ɔmɛ nɛ a kɔni mi jɔ̃ ɔ hia bua womi wawɛɛ. Se jije a ma ná bua womi nɛ a hia a ngɛ?

2-3. (a) Mɛni Yehowa pee kɛ ha Yudabi nɛ a ngɛ nyɔguɛ tso mi ɔ? (b) Mɛni he wa ma susu ngɛ ní kasemi nɛ ɔ mi?

² Yehowa ji “bua womi tsuo Mawu.” (2 Kor. 1:3) Yehowa suɔ e sɔmɔli, nɛ e suɔ nɛ e wo a bua. Yehowa le kaa Yudabi ɔmɛ a kpɛti ni komɛ nɛ a ngɛ nyɔguɛ tso mi ɔ maa kplɛɛ e tsɔsemi nɔ, nɛ a maa kpale kɛ ba e ngɔ ekohu. (Yes. 59:20) Enɛ ɔ he ɔ, Yehowa ngɔ sɛ gbi ko kɛ ha gbalɔ Yesaya jeha 100 kɛ se loko a ngɔ Yudabi ɔmɛ kɛ ho Babilon ya. Jamɛ a sɛ gbi ɔ ji Yesaya womi ɔ nɛ. Kɛ sɛ gbi nɛ ɔ maa wo mɛ he wami ha kɛɛ? Yesaya de ke: “Bɔ nɛ wa Mawu ɔ ngɛ dee ji nɛ ɔ nɛ: “Nyɛɛ jɔɔ ye ma a bua! Ee, nyɛɛ jɔɔ ye ma a bua!” (Yes. 40:1) Ngɛ anɔkuale mi ɔ, Yehowa gu Yesaya sɛ gbi ɔ nɔ kɛ wo Yudabi nɛ a ngɛ nyɔguɛ tso mi ɔ a bua.

³ Kaa bɔ nɛ e ji ngɛ Yudabi nɛ a ngɛ nyɔguɛ tso mi ɔ a blɔ fa mi ɔ, be komɛ ɔ, wɔ hu wa maa hia bua womi. Ngɛ ní kasemi nɛ ɔ mi ɔ, wa maa na blɔ etɛ komɛ a nɔ nɛ Yehowa gu kɛ wo Yudabi nɛ a ngɛ nyɔguɛ tso mi ɔ a bua. Lɔ ɔmɛ ji: (1) E wo si kaa e kɛ yayami peeli nɛ a pia a he ɔ a tɔmi ɔ maa ke mɛ, (2) e ha nɛ e we bi ná hɛnɔkami, kɛ (3) e ye bua mɛ nɛ a yi gbeye hu. Ke wa ngɛ oti nɛ ɔmɛ a he susue ɔ, wa maa na bɔ nɛ Yehowa hu woɔ wa bua ha mwɔnɛ ɔ.

YEHOWA NGƆƆ WA HE YAYAMI KƐ KEƆ WƆ FAA

4. Mɛni Yehowa pee kɛ tsɔɔ kaa e ji Mawu mɔbɔ nalɔ? (Yesaya 55:7)

⁴ Yehowa ji “Tsɛ mɔbɔ nalɔ.” (2 Kor. 1:3) Yehowa gu Yesaya nɔ kɛ wo Yudabi ɔmɛ si kaa e maa ngɔ a he yayami ɔmɛ kɛ ke mɛ. (Kane Yesaya 55:7.) E de ke: ‘Ma je ye suɔmi ɔ kpo kɛ tsɔɔ mo kɛ maa ya neneene, ma na mo mɔbɔ.’ (Yes. 54:8) Mɛni Yehowa maa pee kɛ tsɔɔ kaa e maa na mɛ mɔbɔ? E ngɛ mi kaa Yudabi ɔmɛ maa na yayami nɛ a pee ɔ mi nɔ́ mohu lɛɛ, se Yehowa wo mɛ si kaa a be Babilon hie daa. (Yes. 40:2) Ngɛ anɔkuale mi ɔ, munyu nɛ ɔ maa wo a kpɛti nihi nɛ a tsake a tsui ɔ a bua wawɛɛ nɛ e maa wo mɛ he wami hulɔ!

5. Mɛni he je nɛ wa ma nyɛ ma ná nɔ mi mami kulaa pe Yudabi ɔmɛ kaa Yehowa maa ngɔ wa he yayami ɔmɛ kɛ ke wɔ ɔ?

⁵ Mɛni wa kaseɔ ngɛ mi? Yehowa pee klaalo kaa e kɛ e sɔmɔli a he yayami maa ke mɛ kulaa. Kaa bɔ nɛ Yudabi ɔmɛ ná nɔ mi mami kaa Yehowa kɛ a he yayami ɔmɛ maa ke mɛ ɔ, wɔ hu wa ngɛ nɔ mi mami wawɛɛ po pe Yudabi ɔmɛ. Mɛni he je? Ejakaa wa le nɔ́ nɛ Yehowa pee konɛ e nyɛ nɛ e ngɔ wa he yayami ɔmɛ kɛ ke wɔ. Benɛ Yesaya gba jeha lafahi abɔ komɛ a se ɔ, Yehowa tsɔ e Bi nɛ e suɔ lɛ ɔ kɛ ba zugba a nɔ konɛ e ba je adesahi nɛ a tsake a tsui ɔ tsuo a he yayami ɔmɛ kɛ je. Akɛnɛ Yesu ba gbo kɛ ha wɔ he je ɔ, Yehowa ma nyɛ maa da lɔ ɔ nɔ konɛ e ngɔ wa he yayami kɛ ke wɔ kɛ pi si. (Níts. 3:19; Yes. 1:18; Efe. 1:7) Enɛ ɔ tsɔɔ kaa Yehowa ji Mawu nɛ e naa nɔ mɔbɔ!

6. Ke wa ngɔ wa juɛmi kɛ ma Yehowa mɔbɔ nami ɔ nɔ ɔ, kɛ wa ma ná he se ha kɛɛ? (Hyɛ foni ɔ hulɔ.)

⁶ Ke wa he nile ngɛ wɔ kpa fiae ngɛ yayami ko nɛ wa pee kɛ be ɔ he ɔ, munyu nɛ Yehowa tu ngɛ Yesaya 55:7 ɔ ma nyɛ maa wo wa bua. Wa he nile ma nyɛ maa ya nɔ maa bu wɔ fɔ, titli, ke wa ngɛ yayami ko nɛ wa pee ɔ mi nɔ́ nae. Se ke wa jaje wa yayami ɔmɛ, nɛ wa yu wa he ngɛ jamɛ a yayami ɔ he ɔ, wa ma nyɛ ma ná nɔ mi mami kaa Yehowa ngɔ kɛ ke wɔ. Nɛ ke Yehowa ngɔ wa yayami ɔmɛ kɛ ke wɔ ɔ, e kaii we hu gblegbleegble. (Kɛ to Yeremia 31:34 ɔ he.) Ke Yehowa kaii we yayami nɛ wa pee kɛ be ɔ, lɛɛ wɔ hu e sɛ nɛ waa ya nɔ nɛ wa susu he. Bɔ nɛ wa baa wa je mi ha amlɔ nɛ ɔ ji nɔ́ nɛ he hia Yehowa, se pi tɔmihi nɛ wa tɔ̃ kɛ be ɔ. (Eze. 33:​14-16) E be kɛe nɛ wa Tsɛ nɛ e naa nɔ mɔbɔ ɔ ma ha nɛ waa ye wa he kulaa ngɛ yayami he.

7. Ke wa pee yayami ko kɛ laa a, mɛni maa ye bua wɔ konɛ wa ya de nikɔtɔma amɛ?

⁷ Ke wa he nile ngɛ wɔ fɔ bue ngɛ yayami ko nɛ hɛdɔ ngɛ he nɛ wa pee kɛ laa he je ɔ, mɛni e sa nɛ waa pee? Baiblo ɔ woɔ wɔ he wami kaa wa ya de asafo mi nikɔtɔma amɛ nɛ a ye bua wɔ. (Yak. 5:​14, 15) Se kɛ̃ ɔ, e he ma nyɛ maa wa ha wɔ kaa wa ma ya de asafo mi nikɔtɔma amɛ yayami nɛ wa pee ɔ. Se ke wa tsake wa tsui niinɛ ɔ, wa ma ya na asafo mi nikɔtɔma amɛ. Ke wa pee jã a, lɔ ɔ tsɔɔ kaa wa le kaa Yehowa kɛ nyumu nɛ ɔmɛ ngɛ ní tsue nɛ a ma je suɔmi kɛ mɔbɔ nami kpo kɛ tsɔɔ wɔ. Nyɛminyumu ko nɛ a tsɛɛ lɛ ke Arthura hao wawɛɛ ngɛ yayami ko nɛ e pee ɔ he, se Yehowa gu asafo mi nikɔtɔma amɛ a nɔ kɛ wo e bua. Arthur de ke: “I hyɛ bɔmi nami he foni loo video maa pee jeha kake. Benɛ i nu magbɛ nɔ munyu ko nɛ kɔɔ he nile he ɔ, i bɔ ye yo ɔ kɛ asafo mi nikɔtɔma amɛ amaniɛ. Lɔ ɔ se ɔ, ye tsui nɔ ye mi, se kɛ̃ ɔ, ye kɔni mi jɔ̃ ngɛ nɔ́ nɛ i pee ɔ he. Nikɔtɔma amɛ kai mi kaa Yehowa kua we mi. A ha nɛ i le kaa Yehowa tsɔseɔ wɔ ejakaa e suɔ wɔ. Akɛnɛ nikɔtɔma amɛ je mi mi jɔmi mi nɛ a kɛ mi tu munyu he je ɔ, ye tsui nɔ ye mi. Jehanɛ hu ɔ, a ye bua mi nɛ i dla ye susumi.” Mwɔnɛ ɔ, Arthur ngɛ sɔmɔe kaa blɔ gbalɔ kɛ asafo mi sɔmɔlɔ. Ke wa pee yayami nɛ hɛdɔ ngɛ he po, se wa pia wa he ɔ, Yehowa kɛ maa ke wɔ. Enɛ ɔ nɛ wa le ɔ, woɔ wa bua wawɛɛ nitsɛ!

YEHOWA HAA WƆ HƐNƆKAMI

8. (a) Mɛni hɛ kɛ nɔ fɔmi nɛ Yehowa kɛ ha Yudabi nɛ a ngɛ nyɔguɛ tso mi ɔ? (b) Ngɛ Yesaya 40:​29-31 ɔ nya a, kɛ hɛ kɛ nɔ fɔmi nɛ ɔ maa ye bua Yudabi nɛ a tsake a tsui ɔ ha kɛɛ?

⁸ Ngɛ adesahi a susumi nya a, e ngɛ kaa nɔ́ nɛ hɛnɔkami ko be kɛ ha Yudabi nɛ a ya je nyɔguɛ tso mi ɔ. Ejakaa a le Babilon nɛ ngɛ je ɔ tsuo nɔ yee ngɛ jamɛ a be ɔ mi ɔ kaa ke e nuu nihi nyɔguɛ ɔ, e ngmɛɛ we a he. (Yes. 14:17) Se kɛ̃ ɔ, Yehowa ha nɛ e we bi ɔmɛ ná hɛ kɛ nɔ fɔmi. Yehowa wo si kaa e ma ha nɛ e we bi maa ye a he, nɛ nɔ́ ko nɔ́ ko be nyɛe maa tsi e nya. (Yes. 44:26; 55:12) Ngɛ Yehowa hɛ mi ɔ, Babilonbi ɔmɛ ngɛ kaa bunyuku. (Yes. 40:15) Kaa bɔ nɛ kɔɔhiɔ fliɔ bunyuku nɛ e laa a, jã nɔuu kɛ̃ nɛ e he be wae ha Yehowa kaa e ma je e we bi kɛ je Babilon. Kɛ hɛ kɛ nɔ fɔmi nɛ Yehowa ha Yudabi ɔmɛ ɔ maa ye bua mɛ ha kɛɛ? E maa wo a bua. Se pi lɔ ɔ pɛ. Yesaya ngma ke: ‘Ni nɛmɛ nɛ ngɔɔ a hɛ ngɔ fɔɔ Yehowa nɔ ɔ, a náa he wami he.’ (Kane Yesaya 40:​29-31.) Ngɛ anɔkuale mi ɔ, hɛ kɛ nɔ fɔmi nɛ ɔ maa ye bua mɛ, nɛ a ma ná he wami kaa “kɔle nɛ ngɛ tee.”

9. Mɛni ha nɛ Yudabi nɛ a ngɛ nyɔguɛ tso mi ɔ ná nɔ mi mami kaa si nɛ Yehowa wo mɛ ɔ maa ba mi?

⁹ Jehanɛ hu ɔ, Yehowa ha nɛ Yudabi nɛ a nuu mɛ nyɔguɛ ɔ ná nɔ mi mami kaa e si womi ɔmɛ maa ba mi. Ngɛ mɛni blɔ nɔ? Mo susu gbamihi nɛ a ba mi momo ɔ he nɛ o hyɛ. Yudabi ɔmɛ le kaa Asiriabi ɔmɛ ye wɛtso nyɔngma nɔ yemi ɔ nɔ kunimi nɛ a nuu mɛ kɛ ho nyɔguɛ tso mi ya. (Yes. 8:4) A na nɛ Babilonbi ɔmɛ kpata Yerusalem ma a hɛ mi nɛ a nuu nihi nɛ a ngɛ ma a mi ɔ nyɔguɛ. (Yes. 39:​5-7) Benɛ a ywia Matsɛ Zedekia hɛngmɛ, nɛ a ngɔ lɛ kɛ ho Babilon ya a, mɛ nitsɛmɛ a na kɛ a hɛngmɛ. (Yer. 39:7; Eze. 12:​12, 13) Nɔ́ fɛɛ nɔ́ nɛ Yehowa gba kɛ fɔ si ɔ ba mi. (Yes. 42:9; 46:10) E ngɛ heii kaa ní nɛ ɔmɛ nɛ ya nɔ ɔ ha nɛ a ná nɔ mi mami nɛ mi wa kaa si nɛ Yehowa wo kaa a maa ye a he ɔ maa ba mi kokooko!

10. Mɛni maa ye bua wɔ konɛ wa hɛ kɛ nɔ fɔmi ɔ mi nɛ wa be fɛɛ be ngɛ nyagbe ligbi nɛ ɔmɛ a mi?

¹⁰ Mɛni wa kaseɔ ngɛ mi? Ke wa kɔni mi jɔ̃ ɔ, hɛ kɛ nɔ fɔmi nɛ wa ngɛ ɔ ma nyɛ maa wo wa bua nɛ e wo wɔ he wami. Wa ngɛ behi nɛ a mi wa mi, nɛ he nyɛli nɛ a he wa wawɛɛ ɔ teɔ si kɛ woɔ wɔ. Se kɛ̃ ɔ, e sɛ nɛ wa kɔni mi nɛ jɔ̃, ejakaa Yehowa ha wɔ hɛnɔkami nɛ se be. Lɔ ɔ ji kaa wa maa hi si kɛ ya neneene ngɛ Paradeiso zugba a nɔ. Wa maa hi si slɔkee nɛ wa tue mi maa jɔ wɔ. E sa nɛ waa ya nɔ nɛ waa ngɔ wa juɛmi kɛ ma hɛ kɛ nɔ fɔmi nɛ ɔ nɔ. Ke wa pee we jã a, wa maa pee kaa nɔ ko nɛ e ngɛ he ko nɛ ngɛ fɛu hyɛe kɛ gu glaasi saflɛ nɛ e sɛ mu mi. Se akɛnɛ glaasi ɔ mi sɛ mu he je ɔ, e nyɛ we nɛ e na bɔ nɛ lejɛ ɔ ngɛ fɛu saminya ha. Kɛ wa ma plɛ kɛ tsu wa okadi peemi saflɛ ɔ mi ha kɛɛ konɛ waa na wa hɛ kɛ nɔ fɔmi ɔ heii? E sa nɛ be fɛɛ be ɔ, wa he be kɛ pue wa yi mi tɛ ngɛ bɔ nɛ wa si himi ma ji ha ngɛ je ehe ɔ mi ɔ he. Wa ma nyɛ maa hyɛ asafo video ɔmɛ, waa bu asafo ɔ la amɛ tue, nɛ waa kane womihi nɛ tuɔ wa hɛ kɛ nɔ fɔmi ɔ he munyu ɔ. Jehanɛ hu ɔ, wa ma nyɛ maa sɔle nɛ wa de Yehowa níhi tsuo nɛ wa ngɛ blɔ hyɛe kaa a maa ba mi hwɔɔ se ɔ.

11. Benɛ nyɛmiyo ko nu hiɔ ko nɛ nya wa a, mɛni ye bua lɛ nɛ e nyɛ nɛ e fĩ si?

¹¹ Mo susu bɔ nɛ hɛ kɛ nɔ fɔmi wo nyɛmiyo ko nɛ a tsɛɛ lɛ ke Joy ɔ bua ha benɛ e nu hiɔ ko nɛ nya wa a he nɛ o hyɛ. E de ke: “Ke i ngɛ tsui yee ɔ, i deɔ Yehowa bɔ nɛ i ngɛ he nue ha a, ejakaa i le kaa e nuɔ mi sisi. Nɛ Yehowa hu haa mi ‘he wami nɛ pe adesahi a nɔ́ ɔ.’” (2 Kor. 4:7) Jehanɛ hu ɔ, Joy poɔ he foni kaa e ngɛ je ehe ɔ mi, he nɛ “nɔ ko nɔ ko be dee hu ke, ‘I be he wami.’” (Yes. 33:24) Ke wɔ hu wa deɔ Yehowa nɔ́ fɛɛ nɔ́ nɛ ngɛ wɔ haoe, nɛ wa ngɔ wa juɛmi kɛ ma wa hɛnɔkami ɔ nɔ ɔ, wa ma ná he wami kɛ da wa nyagba amɛ a nya.

12. Mɛni he je nɛ wa ngɛ nɔ mi mami kaa Yehowa si womi ɔmɛ tsuo maa ba mi ɔ? (Hyɛ foni ɔ hulɔ.)

¹² Kaa bɔ nɛ Yehowa ha nɛ Yudabi ɔmɛ ná nɔ mi mami kaa a ma nyɛ ma he e si womi ɔmɛ maa ye ɔ, mwɔnɛ hu ɔ, e pee jã kɛ ha wɔ. Mo susu gbami komɛ nɛ a ngɛ mi bae ɔ he nɛ o hyɛ. Kaa nɔ hyɛmi nɔ́ ɔ, wa na kaa Anglo-Amerika nɔ yemi ɔ ‘he fã mi wa kaa dade, nɛ he fã hu gbɔjɔ kaa zu.’ (Dan. 2:​42, 43) Jehanɛ hu ɔ, wa nuɔ kaa ‘zugba mimiɛɛɔ ngɛ he slɔɔtohi,’ nɛ wa ngɛ fiɛɛe ngɛ “zugba a nɔ hehi tsuo nɛ nimli ngɛ ɔ” hulɔ. (Mat. 24:​7, 14) Gbami nɛ ɔmɛ kɛ ekpahi ma nyɛ ma ha nɛ wa ná nɔ mi mami nɛ mi wa kaa Yehowa si womi ɔmɛ tsuo maa ba mi kokooko.

YEHOWA YEƆ BUAA WƆ NƐ WA YI GBEYE

13. (a) Ke be su nɛ Yudabi ɔmɛ maa ye a he ɔ, mɛni nyagbahi nɛ a kɛ maa kpe? (b) Kaa bɔ Yesaya 41:​10-13 ɔ tsɔɔ ɔ, mɛni blɔ nɔ Yehowa gu kɛ wo Yudabi ɔmɛ a bua?

¹³ Yehowa ha nɛ Yudabi nɛ a ngɛ nyɔguɛ tso mi ɔ ná hɛ kɛ nɔ fɔmi kaa a maa ye a he. Se Yehowa le hu kaa ke e piɛ bɔɔ nɛ Yudabi ɔmɛ maa ye a he ɔ, a kɛ haomi komɛ maa kpe. E ha nɛ a gba kaa matsɛ ko nɛ ngɛ he wami ɔ ma tua mahi nɛ a bɔle Babilon ɔ. Lɔ ɔ se ɔ, e ma tua Babilon ma a nitsɛ hulɔ. (Yes. 41:​2-5) Anɛ e sa nɛ Yudabi ɔmɛ nɛ a ye gbeye lo? Yehowa sɛ hlami nɛ e wo e we bi ɔmɛ a bua loko jamɛ a be ɔ su. Yehowa de ke: “Koo ye gbeye. I kɛ mo ngɛ! Ko ha nɛ nɔ́ ko nɛ wo o he gbeye. Imi ji o Mawu ɔ nɛ!” (Kane Yesaya 41:​10-13.) Benɛ Yehowa de ke “Imi ji o Mawu ɔ,” mɛni e ngɛ tsɔɔe? Akɛnɛ Yudabi ɔmɛ le kaa e sa nɛ a ja Yehowa momo he je ɔ, tsa pi nɛ Yehowa ngɛ mɛ kaie kaa a ja lɛ. Mohu ɔ, Yehowa ngɛ hlae nɛ Yudabi ɔmɛ nɛ a le kaa e kɛ mɛ ngɛ, nɛ e maa ye bua mɛ.—La 118:6.

14. Mɛni ji nɔ́ kpa ko nɛ Yehowa pee konɛ Yudabi ɔmɛ nɛ a ko ye gbeye?

¹⁴ Jehanɛ hu ɔ, Yehowa ha nɛ Yudabi ɔmɛ na kaa e ngɛ he wami kɛ nile nɛ se be. E pee jã kɛ wo a bua konɛ a ko ye gbeye. E de Yudabi nɛ a ngɛ nyɔguɛ tso mi ɔ kaa a hyɛ dodoe ɔmɛ ngɛ hiɔwe. E ha nɛ a le kaa pi nɛ e bɔ dodoe nɛ ɔmɛ pɛ kɛkɛ, mohu ɔ, e le eko fɛɛ eko kɛ e biɛ nɛ e kɛ tsɛɛ lɛ hulɔ. (Yes. 40:​25-28) Ke Yehowa le dodoe ɔmɛ eko fɛɛ eko biɛ ɔ, lɛɛ lɔ ɔ tsɔɔ kaa e le e sɔmɔli ɔmɛ hu a kpɛti nɔ fɛɛ nɔ ko kɛ e biɛ! Nɛ ke Yehowa ngɛ he wami nɛ e kɛ bɔ dodoe nɛ ɔmɛ ɔ, lɛɛ e ngɛ he wami nɛ e kɛ maa ye bua e we bi hulɔ. Ngɛ anɔkuale mi ɔ, e sɛ nɛ Yudabi nɛ a ngɛ nyɔguɛ tso mi ɔ nɛ a ye gbeye kulaa.

15. Mɛni blɔ nɔ Mawu gu kɛ dla Yudabi nɛ a ngɛ nyɔguɛ tso mi ɔ a juɛmi kɛ ha nɔ́ nɛ ma ngɛ a hɛ mi ɔ?

¹⁵ Jehanɛ hu ɔ, Yehowa dla e we bi ɔmɛ a juɛmi kɛ ha nɔ́ nɛ ma ngɛ a hɛ mi ɔ. Ngɛ Yesaya womi ɔ sisije ɔ, Mawu de e we bi ɔmɛ ke: “Nyɛ ya sɛ nyɛ we ɔmɛ a mi, nɛ nyɛɛ ngmɛ sinya amɛ a mi ngɔ wo nyɛ yi. Nyɛɛ laa nyɛ he be kpiti ko kɛ yaa si Mawu mi mi fumi ɔ nya maa be.” (Yes. 26:20) E ma nyɛ maa ba kaa Yudabi nɛ ɔmɛ kɛ fami nɛ ɔ tsu ní benɛ Matsɛ Sirus ba tua Babilon ma a nɛ e ye a nɔ kunimi ɔ. Blema Hela yi nɔ sane ngmalɔ ko tsɔɔ kaa “benɛ Sirus ba sɛ Babilon ma a mi ɔ, e fã e [ta buli ɔmɛ] kaa nɔ fɛɛ nɔ nɛ a maa na lɛ ngɛ kpo nɔ ɔ, a gbe lɛ.” E ngɛ heii kaa enɛ ɔ ma ha nɛ Babilonbi ɔmɛ maa ye gbeye wawɛɛ, se Yudabi ɔmɛ lɛɛ akɛnɛ a ngɔ Yehowa blɔ tsɔɔmi ɔ kɛ tsu ní he je ɔ, a ná yi baami.

16. Mɛni he je nɛ e sɛ nɛ waa ye gbeye ngɛ nɔ́ nɛ maa ba hwɔɔ se ɔ he? (Hyɛ foni ɔ hulɔ.)

¹⁶ Mɛni wa kaseɔ ngɛ mi? E be kɛe nɛ waa kɛ amanehlu ngua ko nɛ eko bɛ hyɛ ɔ maa kpe. Ke amanehlu ngua a je sisi ɔ, nihi tsuo nɛ a ngɛ je ɔ mi ɔ, maa ye gbeye nɛ a be lee nɔ́ nɛ a maa pee. Se Yehowa we bi lɛɛ e be jã bae ngɛ a blɔ fa mi kɔkɔɔkɔ. Wa le kaa Yehowa ji wa Mawu. Enɛ ɔ he ɔ, wa maa pee kã, ejakaa wa le kaa “e be kɛe nɛ a ma kpɔ̃ [wɔ].” (Luka 21:28) Ke je ma amɛ pee kake nɛ a ba tua wɔ po ɔ, wa maa ya nɔ maa da si kpɛii. Yehowa maa gu bɔfo ɔmɛ a nɔ kɛ po wa he piɛ, nɛ e ma ha wɔ blɔ tsɔɔmihi nɛ ma he wa yi wami. Mɛni blɔ nɔ Yehowa maa gu kɛ ha wɔ blɔ tsɔɔmi nɛ ɔmɛ? Wa li lolo. Se kɛ̃ ɔ, e ma nyɛ maa ba kaa wa nine maa su blɔ tsɔɔmi nɛ ɔmɛ a nɔ kɛ gu wa we asafo ɔmɛ a nɔ. Ngɛ jamɛ a be ɔ mi ɔ, wa “wehi a mi” nɛ wa ma ya laa wa he ngɛ konɛ waa hi slɔkee ɔ ma nyɛ maa pee wa we asafo ɔmɛ. Mɛni wa ma nyɛ maa pee kɛ dla wa he kɛ ha nɔ́ nɛ maa ba hwɔɔ se ɔ? E sa nɛ wa ha nɛ huɛ bɔmi gbagbanii nɛ hi waa kɛ wa nyɛmimɛ ɔmɛ wa kpɛti, nɛ waa je wa tsui mi nɛ waa kɛ teokrase blɔ tsɔɔmihi nɛ tsu ní, nɛ wa ná nɔ mi mami kaa Yehowa lɛ ngɛ asafo ɔ hɛ mi nyɛɛe.—Heb. 10:​24, 25; 13:17.

17. Mɛni nɔ mi mami wa ma nyɛ ma ná?

¹⁷ E ngɛ mi kaa Yudabi nɛ a ngɛ nyɔguɛ tso mi ɔ kɛ si himi nɛ mi wa kpe mohu lɛɛ, se kɛ̃ ɔ, Yehowa wo a bua. Jã kɛ̃ nɛ Yehowa maa wo wɔ hu wa bua. Ngɛ anɔkuale mi ɔ, bɔ fɛɛ bɔ nɛ níhi maa ya nɔ ha hwɔɔ se ɔ, wa ma nyɛ ma ná nɔ mi mami kaa Yehowa maa wo wa bua. Mo ná nɔ mi mami kaa e maa na e sɔmɔli mɔbɔ, nɛ e maa hyɛ a nɔ. Ha nɛ o hɛ kɛ nɔ fɔmi ɔ mi nɛ wa be fɛɛ be. Mo kai kaa ke Yehowa nɛ ji wa Mawu ɔ ngɛ wa kasa nya a, nɔ́ ko nɔ́ ko be nyɛe maa wo wa he gbeye.