Mo Ná Nɔ Mi Mami Kaa Yehowa Ngɛ He Wami Nɛ E Kɛ Heɔ Nɔ Yi Wami

Kane 4 Mose 13:25–14:4 ɔ, o maa na ngɛ lejɛ ɔ kaa Israelbi ɔmɛ be nɔ mi mami ngɛ Yehowa mi kaa e ma nyɛ ma he a yi wami.

Moo kase babauu kɛ kɔ sane ɔ he. Mɛni he je nɛ e sa nɛ Israelbi ɔmɛ ko ná hɛ kɛ nɔ fɔmi ngɛ Yehowa mi kaa e ngɛ he wami nɛ e kɛ ma nyɛ ma he a yi wami benɛ a je Egypt ɔ? (La 78:​12-16, 43-53) Mɛni he je nɛ a nyɛ we nɛ a ngɔ a hɛ kɛ fɔ Yehowa nɔ ɔ? (5 Mose 1:​26-28) Mɛni Yoshua kɛ Kaleb pee nɛ tsɔɔ kaa a kɛ a hɛ fɔ Yehowa nɔ?—4 Mose 14:​6-9.

Mo hla níhi a mi fitsofitso. Mɛni nɛ e sa nɛ Israelbi ɔmɛ ko pee konɛ a kɛ wo hɛ kɛ nɔ fɔmi nɛ a ngɛ ngɛ Yehowa mi ɔ mi he wami? (La 9:10; 22:4; 78:11) Mɛni he je nɛ ke wa buɔ Yehowa a, lɔ ɔ ma ha nɛ waa ngɔ wa hɛ kɛ fɔ e nɔ ɔ?—4 Mose 14:11.

Mo susu níhi nɛ o kase ɔ he. Mo bi o he ke:

• ‘Mɛni si fɔfɔɛ komɛ lɛ ma nyɛ maa ka hɛ kɛ nɔ fɔmi nɛ i ngɛ ngɛ Yehowa mi ɔ?’

• ‘Mɛni ma pee kɛ wo hɛ kɛ nɔ fɔmi nɛ i ngɛ ngɛ Yehowa mi amlɔ nɛ ɔ kɛ hwɔɔ se ɔ mi he wami?’

• ‘Loko amanehlu ngua a maa je sisi ɔ, mɛni nɔ mi mami ma nyɛ ma ná?’—Luka 21:​25-28.