NIHEWI KƐ YIHEWI BIƆ KE
Bɔ Nɛ Baiblo ɔ Ma Nyɛ Maa Ye Bua Mo Ha—Fã 2: Mɛni Ma Pee Konɛ Ye Bua Nɛ Jɔ Baiblo ɔ Kanemi He?
Jokuɛ nyumuyo ko nɛ a tsɛɛ lɛ ke Will ɔ de ke, “Ke o li bɔ nɛ o maa kane Baiblo ɔ ha nɛ́ o nu sisi ɔ, e kanemi ma nyɛ maa pee mo hejɔ.”
Anɛ o suɔ nɛ o le nɔ́ nɛ o maa pee konɛ o bua nɛ jɔ Baiblo ɔ kanemi he lo? Munyu nɛ ɔ maa ye bua mo.
Moo po he foni kaa o ngɛ lejɛ ɔ benɛ sane ɔ ngɛ nɔ yae ɔ
Níhi nɛ nyɛɛ se nɛ ɔmɛ nɛ o maa pee ɔ maa ye bua mo:
Moo hla Baiblo mi sane ko nɛ o suɔ kaa o maa kase he ní. O ma nyɛ maa hla sane ko nɛ ngɛ Baiblo ɔ mi, aloo munyu ko nɛ ngɛ Sane Kpakpa amɛ a mi, aloo Baiblo dramahi nɛ a ngɛ jw.org ɔ nɔ ɔ eko.
Moo kane sane ɔ he ní. Mo nitsɛ o ma nyɛ maa kane, aloo o kɛ o huɛmɛ kɛ o weku li ma nyɛ maa kane nɛ nyɛ tsuo nyɛɛ nu. Nɔ kake ma nyɛ maa kane amaniɛ bɔlɔ ɔ munyu ɔmɛ, nɛ nihi nɛ piɛ ɔ hu maa kane ni kpahi nɛ a ngɛ sane ɔ mi ɔ a munyu ɔmɛ.
Moo ka níhi nɛ nyɛɛ se nɛ ɔmɛ a kpɛti kake loo nɔ́ nɛ hiɛ pe jã:
Mo tɛni nɔ́ nɛ o ngɛ kanee ɔ he fonihi, aloo mo tɛni foni slɔɔtohi kɛ kale bɔ nɛ níhi ya nɔ ha a setsɔsetsɔ. Moo ngma munyu kpiti ko ngɛ foni ɔmɛ eko fɛɛ eko sisi kɛ tsɔɔ nɔ́ nɛ ngɛ nɔ yae ɔ.
Mo tɛni dakahi nɛ o kɛ ma nylɔ ní kasemi ɔ mi. Kaa nɔ hyɛmi nɔ́ ɔ, ke o ngɛ Mawu sɔmɔlɔ anɔkualetsɛ ko he ní kanee ɔ, o ma nyɛ maa ngma suhi nɛ e je kpo aloo níhi nɛ e pee, kɛ jɔɔmihi nɛ e ná a.
Moo pee kaa o ngɛ sane ɔ he amaniɛ bɔe ngɛ TV nɔ. Moo tu nɔ́ nɛ ba a he munyu, nɛ o “bi nihi nɛ sane ɔ kɔ a he ɔ, kɛ nihi nɛ a ngɛ lejɛ ɔ nɛ́ sane ɔ ba a munyu.”
Ke nɔ nɛ o ngɛ e he sane kanee ɔ mwɔ yi mi kpɔ ko nɛ dɛ ɔ, mo susu nɔ́ nɛ e sa nɛ e ko pee ɔ he. Kaa nɔ hyɛmi nɔ́ ɔ, mo susu benɛ Petro kua Yesu ɔ he nɛ o hyɛ. (Maako 14:66-72) Kɛ Petro ko nyɛ tsu sane ɔ he ní saminya ha kɛɛ?
Ke o ma nyɛ ɔ, moo da Baiblo mi sane ko nɔ kɛ ngma mo nitsɛ o sane nɛ a kɛ maa pee drama. Lɔ ɔ se ɔ, moo ngmaa nɔ́ nɛ o kase ngɛ sane ɔ mi.—Roma Bi 15:4.
O ma nyɛ ma ha nɛ Baiblo ɔ sane ɔmɛ nɛ a pee kaa nɔ́ ko nɛ ngɛ nɔ yae ngɛ o hɛ mi!
Mo hla sane ɔ mi!
Ke o to ní nyafinyafi a he hɛ, nɛ o susu he kɛ ya tsitsaa a, o ma nyɛ maa na junehi nɛ ngɛ ngmami ɔ mi ɔ. Be komɛ ɔ, munyungu kake aloo enyɔ pɛ nɛ e je kpo ngɛ ngmami ko mi ɔ ma nyɛ maa ye bua wawɛɛ.
Kaa nɔ hyɛmi nɔ́ ɔ, ngɔɔ Mateo 28:7 kɛ to Maako 16:7 ɔ he.
Mɛni he je nɛ Maako de ke Yesu ma je e he kpo kɛ tsɔɔ e kaseli ɔmɛ “kɛ Petro” ɔ?
Mo kadi: Maako nitsɛ nɛ́ níhi nɛ ya nɔ ɔ. E ngɛ heii kaa Petro lɛ de lɛ.
Junehi nɛ laa: Mɛni he je nɛ benɛ Petro nu kaa Yesu suɔ nɛ e na lɛ ekohu ɔ, lɔ ɔ wo e bua a? (Maako 14:66-72) Mɛni Yesu pee kɛ tsɔɔ kaa e ji Petro huɛ nitsɛnitsɛ? Mɛni o ma nyɛ maa kase ngɛ Yesu he konɛ o pee huɛ nitsɛnitsɛ kɛ ha ni kpahi?
Ke o ha nɛ Ngmami ɔ pee nɔ́ nɛ e hɛ ngɛ, nɛ o hla níhi a mi fitsofitso ɔ, lɔ ɔ ma ha nɛ o bua maa jɔ Baiblo ɔ kanemi he wawɛɛ!