Wa He Nɛ Maa Be Ngɛ Fiɛɛmi Ní Tsumi ɔ Mi—Bɔ Nɛ Wa Ma Ha Wetsɛ Nɛ E Mi Mi Fu Heto Ha

Nɔ́ He Je Nɛ E He Hia: Nihi fuu nɛ wa fiɛɛ kɛ haa mɛ ɔ buɔ wɔ. Se Yesu gba kɛ fɔ si kaa ni komɛ maa nyɛ wɔ. (Yoh. 17:14) Enɛ ɔ he ɔ, ke ni komɛ a mi mi fu wɔ ɔ, e sɛ nɛ e pee wɔ nyakpɛ. Ke waa kɛ si fɔfɔɛ kaa kikɛ kpe ɔ, e sa nɛ waa pee wa ní bɔ nɛ maa sa Yehowa hɛ mi, ejakaa lɛ nɛ e tsɔ wɔ. (Rom. 12:17-21; 1 Pet. 3:15) Ke wa pee wa ní bɔ nɛ sa a, lɔ ɔ ma ha nɛ nɔ ɔ mi mi fumi ɔ nya maa ba si. E maa pee odase kɛ ha wetsɛ ɔ kɛ ni kpahi nɛ a ngɛ lejɛ ɔ, nɛ ke Yehowa Odasefohi ya lejɛ ɔ be kpa mi ɔ, a maa bu mɛ tue.—2 Kor. 6:3.

Blɔ Nɔ Nɛ O Maa Gu Kɛ Pee:

Moo to o tsui si nɛ o je huɛ bɔmi su kpo. Jã a nɛ o maa pee ɔ ma ha nɛ nɔ ɔ he maa jɔ. Ko susu kaa wetsɛ ɔ kɛ mo lɛ ná. (Fiɛlɔ 7:9) Eko ɔ, ní komɛ lɛ ngɛ e nya gbae, loo be nɛ o kɛ ya lejɛ ɔ nɛ e dɛ lɛ. Ke ji kaa e bua jɔɛ wa munyu ɔ he po ɔ, e ma nyɛ maa ba kaa nihi lɛ a gbe wa he guɛ kɛ ha lɛ.—2 Kor. 4:4.
O kɛ gbi blɛuu nɛ tu munyu. (Abɛ 15:1) Eko ɔ, o ya tsɛ̃ɛ lɛ ngɛ mahe mi, loo o ya po e ní sɛɛmi ko mi. E ngɛ mi kaa ke wa ya nihi a ngɔ ɔ, wa tɔ̃ we mohu lɛɛ, se o ma nyɛ maa je bumi mi kɛ kpa nɔ ɔ pɛɛ kaa o ba e ngɔ ngɛ be nɛ dɛ lɛ mi. Ke a de lɛ lakpa munyu ko ngɛ wa he nɛ lɔ ɔ lɛ ha nɛ e mi mi fu ɔ, o ma nyɛ ma de lɛ ke: “I nu nɔ́ he je nɛ o mi mi fu ɔ sisi. Se nɔ́ nɛ a de mo ngɛ wa he ɔ be mi jã. I suɔ nɛ ma tsɔɔ mo nya.” Ke e kɛ wɔ kpa we gbi ngɛ wa tsɔɔmi komɛ kaa nɔ fiemi, loo muɔ nɛ wa nguɛ ɔ he ɔ, o ma nyɛ ma de ke: “I nu mo sisi. Ni komɛ hu ngɛ nɛ a nui wa tsɔɔmi ɔmɛ ekomɛ a sisi. I suɔ nɛ ma tsɔɔ mo nɔ́ nɛ Baiblo ɔ de ngɛ jamɛ a tsɔɔmi ɔ he.”
Ke o na kaa nɔ ɔ mi mi fu wawɛɛ ɔ, lɛɛ nile ngɛ mi kaa o maa je kpoo. Ke e wo mo si kaa e hla we Yehowa Odasefohi ngɛ e we ɔ mi hu ɔ, o ma nyɛ ma de lɛ kaa wa maa ye e si womi ɔ nɔ.

Moo Ka Enɛ ɔ Ngɛ Nyɔhiɔ ɔ Mi:

Ke nyɛ ngɛ nyɛ weku Mawu jami pee ɔ, nyɛɛ pee bɔ nɛ nyɛ ma plɛ kɛ ha wetsɛ ko nɛ e mi mi fu heto ɔ he peemi kɛ tsɔɔ.
Ke nyɛ je wetsɛ ko nɛ e mi mi fu ngɔ kɛ yaa a, o kɛ fiɛɛlɔ nɛ piɛɛ o he ɔ nɛ susu blɔ kpa ko nɛ jinɛ nyɛ ko gu nɔ kɛ ha wetsɛ ɔ heto ɔ he.