Tsɔɔ Ngmamihi A Mi Saminya

Yohane 10:33-36

OTI: Koo kane ngmami ɔ kɛkɛ nɛ o tsa o munyu ɔ nɔ. Ha nɛ o tue buli ɔmɛ nɛ a na tsakpa nɛ ngɛ ngmami nɛ o kane kɛ oti nɛ o ngɛ he munyu tue ɔ a kpɛti.

BƆ NƐ O MAA PEE LƐ HA:

• Ha nɛ a na munyu oti ɔmɛ. Ke o kane ngmami ɔ ta a, moo ma munyunguhi nɛ kɔɔ oti ɔ he ɔ nɔ mi. O ma nyɛ maa ti jamɛ a munyungu ɔmɛ a mi, aloo o ma nyɛ ma bi sane ko konɛ o tue buli ɔmɛ nɛ a na munyu oti ɔmɛ.

• Moo ma oti ɔ nɔ mi. Moo sɛ hlami nɛ o tsɔɔ tue buli ɔmɛ nɔ́ he je nɛ o yaa kane ngmami ɔ, lɔ ɔ se ɔ, ha nɛ a na tsakpa nɛ ngɛ ngmami ɔ kɛ nɔ́ nɛ o dɛ mɛ ɔ a kpɛti.

• Mi tsɔɔmi ɔ sisi numi ko ye. Ke o hla níhi a mi, nɛ o na ní komɛ nɛ o bua jɔ he, se a kɔ we oti ɔ he ɔ, koo ngɔ kɛ tsu ní. Mo bi o he ke, ‘Mɛni ye tue buli ɔmɛ le momo ngɛ sane ɔ he?’ Enɛ ɔ maa ye bua mo nɛ o maa le níhi nɛ o kɛ maa tsɔɔ oti ɔ mi konɛ a nu munyu ɔ sisi saminya.