Womihi Nɛ A Tsɛ Se Ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ Mi

© 2024 Watch Tower Bible and Tract Society of Pennsylvania

MARCH 3-9

JUETLI NƐ NGƐ MAWU MUNYU Ɔ MI | ABƐ 3

Moo Tsɔɔ Kaa O Ngɛ Hɛ Kɛ Nɔ Fɔmi Ngɛ Yehowa Mi

ijwbv munyu 14 ¶4-5

Abɛ 3:5, 6​—“Koo Ngɔ O Hɛ Kɛ Fɔ Mo Nitsɛ O Nɔ́ Sisi Numi Nɔ”

“Ngɔɔ o hɛ kɛ fɔ Yehowa nɔ kɛ o tsui tsuo.” Ke wa pee níhi kaa bɔ nɛ Mawu suɔ ɔ, lɔ ɔ tsɔɔ kaa wa ngɛ hɛ kɛ nɔ fɔmi ngɛ e mi. E sa nɛ waa kɛ wa hɛ nɛ fɔ Mawu nɔ kɛ wa tsui tsuo. Ngɛ Baiblo ɔ mi ɔ, ke a kɛ tsui tsu ní ɔ, e tsɔɔ bɔ nɛ nɔ ko ji ngɛ mi mi blɔ, nɛ ji bɔ nɛ e nuɔ nɔ́ he ha, e susumi, e subai, kɛ yi mi tomi he je nɛ e peeɔ níhi. Lɔ ɔ, Mawu nɔ nɛ wa maa ngɔ wa hɛ kɛ fɔ kɛ wa tsui tsuo ɔ biɔ babauu pe he numi kɛkɛ nɛ wa ma ná. E ji yi mi kpɔ nɛ wa mwɔ kaa waa kɛ wa hɛ maa fɔ Mawu nɔ akɛnɛ wa ngɛ nɔ mi mami kaa wa Bɔlɔ ɔ le nɔ́ nɛ hi kɛ ha wɔ ɔ he je.​—Roma Bi 12:1.

“Koo ngɔ o hɛ kɛ fɔ mo nitsɛ o nɔ́ sisi numi nɔ.” E sa nɛ waa ngɔ wa hɛ kɛ fɔ Mawu nɔ ejakaa wa susumi nɛ yi mluku ɔ pɛ be nyɛe maa tsɔɔ wɔ blɔ nɛ da. Ke wa ngɔ wa hɛ kɛ fɔ wɔ nitsɛmɛ wa nɔ aloo wa ha nɛ wa he numi pɛ lɛ tsɔɔ wɔ nɔ́ nɛ waa pee ɔ, lɛɛ wa maa mwɔ yi mi kpɔ ko nɛ sisije ɔ, wa ma susu kaa nile ngɛ mi, se nyagbe ɔ, haomi mohu lɛ maa je mi kɛ ba. (Abɛ 14:12; Yeremia 17:9) Mawu juɛmi mi kuɔ kulaa pe wa nɔ́ ɔ. (Yesaya 55:8, 9) Ke wa ngmɛ blɔ nɛ Yehowa susumi kudɔ wɔ ɔ, wa si himi maa pee kpakpa.​—La 1:1-3; Abɛ 2:6-9; 16:20.

ijwbv munyu 14 ¶6-7

Abɛ 3:5, 6​—“Koo Ngɔ O Hɛ Kɛ Fɔ Mo Nitsɛ O Nɔ́ Sisi Numi Nɔ”

“Ngɛ nɔ́ fɛɛ nɔ́ mi ɔ, mo kai lɛ.” E sa nɛ wa hla Yehowa juɛmi ngɛ nɔ́ fɛɛ nɔ́ nɛ he hia ngɛ wa si himi mi ɔ he, kɛ ngɛ yi mi kpɔhi nɛ a he hia nɛ wa maa mwɔ ɔ hu he. Wa peeɔ jã kɛ guɔ sɔlemi nɛ wa sɔleɔ konɛ e tsɔɔ wɔ blɔ, kɛ nɔ́ fɛɛ nɔ́ nɛ e de ngɛ e Munyu nɛ ji Baiblo ɔ mi nɛ waa kɛ tsuɔ ní ɔ nɔ.​—La 25:4; 2 Timoteo 3:16, 17.

“E ma ha nɛ o blɔ ɔmɛ maa da tlɔmɔɔ.” Mawu haa nɛ wa blɔ ɔmɛ daa tlɔmɔɔ kɛ guɔ yemi kɛ buami nɛ e kɛ haa wɔ konɛ waa nyɛɛ ngɛ e dami mlaa amɛ a nya a nɔ. (Abɛ 11:5) Enɛ ɔ haa nɛ wa yuɔ wa he ngɛ níhi nɛ ma ha nɛ waa pee yayami ɔ he, nɛ e haa nɛ wa náa bua jɔmi wawɛɛ ngɛ si himi mi.​—La 19:7, 8; Yesaya 48:17, 18.

be 76 ¶4

Yaa O Hɛ Mi Ngɛ Mumi Mi

Ke nɔ ko kɛ si fɔfɔɛ slɔɔtoslɔɔtohi kpe hyɛ ngɛ e si himi mi, nɛ e hyɛ we nɛ hi ɔ, lɔ ɔ ma nyɛ maa pee ka kɛ ha lɛ ke e kɛ si fɔfɔɛ nɛ ɔ eko kpale kpe. E ma nyɛ ma ha nɛ́ e de e he ke: ‘I kɛ sisi fɔfɔɛ nɛ ɔ eko kpe hyɛ. I le nɔ́ nɛ ma pee.’ Se anɛ nile ngɛ mi kaa nɔ ko maa pee jã lo? Abɛ 3:7 bɔ wɔ kɔkɔ ke: “Koo bu o he ní lelɔ.” E sa nɛ níhi a si kpami nɛ wa ngɛ ngɛ si fɔfɔɛ ko nɛ waa kɛ kpe hyɛ ɔ he ɔ nɛ́ bli wa juɛmi nya ngɛ níhi nɛ e sa kaa wa susu he ke waa kɛ si fɔfɔɛ komɛ ngɛ kpee ngɛ si himi mi ɔ he. Se ke wa ngɛ hɛ mi yae ngɛ mumi mi ɔ, e sa nɛ níhi a si kpamihi nɛ wa ngɛ ɔ nɛ́ ná wa juɛmi kɛ wa tsui nɔ he wami, nɛ́ e ha nɛ waa le kaa wa hia Yehowa jɔɔmi loko wa ma nyɛ maa ye manye. Kɛkɛ ɔ, wa hɛ mi yami ɔ maa je kpo, pi ngɛ si fɔfɔɛhi nɛ ke waa kɛ kpe ɔ, wa maa bɔ mɔde kaa wa maa da nya ngɛ wɔ nitsɛmɛ wa dɛ he ɔ mi, mohu ɔ, kɛ gu Yehowa blɔ tsɔɔmi nɛ wa ma hla oya nɔuu ngɛ si fɔfɔɛ nɛ waa kɛ kpe ɔ mi ɔ nɔ. Nɛ nɔ mi mami nɛ wa ma ná kaa ja Yehowa ngmɛ blɔ loko nɔ́ ko ma nyɛ maa ba, kɛ wa hɛ kɛ nɔ fɔmi ngɛ e mi nɛ́ wa maa hɛɛ mi, nɛ́ wa ma ha nɛ huɛ bɔmi nɛ hi waa kɛ wa hiɔwe Tsɛ ɔ wa kpɛti ɔ maa tsɔɔ kaa wa ngɛ wa hɛ mi yae.

Ngmami ɔ Mi Junehi

w06 9/15 17 ¶7

Otihi Nɛ Ngɛ Abɛ Womi ɔ Mi

3:3. E sa nɛ waa na suɔmi nɛ se pui kɛ anɔkuale yemi kaa nɔ́ ko nɛ he jua wa wawɛɛ, nɛ wa je su nɛ ɔmɛ kpo, kaa bɔ nɛ ke wa nine su kuɛ ní ko nɛ he jua wa a nɔ nɛ́ wa maa wo nɛ nihi maa na a. Jehanɛ hu, e sa nɛ wa ha nɛ su nɛ ɔmɛ nɛ a hi wa tsui nɔ, nɛ́ wa ha nɛ a pee nɔ́ titli ngɛ wa si himi mi.

MARCH 10-16

JUETLI NƐ NGƐ MAWU MUNYU Ɔ MI | ABƐ 4

“Moo Bu O Tsui He”

w19.01 15 ¶4

Mɛni O Maa Pee Kɛ Po O Tsui He Piɛ?

⁴ Ngɛ Abɛ 4:23 ɔ, munyungu nɛ ji “tsui” ɔ daa si kɛ ha wa susumihi nɛ nɔ ko li, juɛmi nɛ waa kɛ peeɔ nɔ́ ko, kɛ níhi nɛ wa suɔ. Enɛ ɔ he ɔ, tsui ɔ ji bɔ nɛ wa ngɛ ha ngɛ wa mi, se tsa pi bɔ nɛ nihi naa wɔ ha kɛkɛ.

w19.01 17 ¶10-11

Mɛni O Maa Pee Kɛ Po O Tsui He Piɛ?

¹⁰ Loko wa ma nyɛ maa po wa tsui he piɛ ɔ, ja wa nyɛ nɛ wa yɔse Satan klama amɛ nɛ wa yu wa he oya nɔuu. Munyungu nɛ a tsɔɔ sisi ke ‘poo he piɛ’ ngɛ Abɛ 4:23 ɔ haa nɛ wa kaiɔ ní tsumi nɛ buli tsuɔ ɔ. Ngɛ Matsɛ Salomo be ɔ mi ɔ, buli daa gbogbo nɛ a po kɛ wo ma he ɔ yi mi konɛ ke a na kaa he nyɛli ma ma a tuami ɔ, a hɛli ma mi bi ɔmɛ si. Ke enɛ ɔ ngɛ wa juɛmi mi ɔ, e maa ye bua wɔ nɛ wa maa le nɔ́ nɛ e sa kaa waa pee kɛ tsi Satan nya konɛ e ko puɛ wa juɛmi.

¹¹ Blema a, buli nɛ a daa gbogbo yi mi kɛ agbo nya buli peeɔ kake kɛ tsuɔ ní. (2 Sam. 18:24-26) Ke a na kaa he nyɛlɔ ko ma a, a ngaa agbo ɔmɛ konɛ he nyɛlɔ ɔ ko ná he blɔ kɛ sɛ ma a mi. (Neh. 7:1-3) Wa he nile nɛ waa kɛ Baiblo ɔ tsɔse ɔ ngɛ kaa bulɔ. Be fɛɛ be nɛ Satan maa ka kaa e maa sɛ wa tsui mi aloo e ma puɛ wa susumi ɔ, wa he nile bɔɔ wɔ kɔkɔ. Ke wa nu kɔkɔ bɔmi ɔ, e sa nɛ waa bu tue nɛ wa nga wa tsui nɛ ji agbo ɔ.

w19.01 18 ¶14

Mɛni O Maa Pee Kɛ Po O Tsui He Piɛ?

¹⁴ Bɔ nɛ pee nɛ waa po wa tsui he piɛ ɔ, e sa nɛ waa ngmɛ wa tsui ɔ nya konɛ susumi yayahi ko sɛ mi. Se pi lɔ ɔ pɛ. E sa nɛ wa bli wa tsui ɔ konɛ ní kpakpahi nɛ a sɛ mi. Nyɛ ha nɛ wa susu ma nɛ a fia gbogbo kɛ wo he ɔ he ekohu nɛ waa hyɛ. Ke agbo nya bulɔ ɔ na kaa he nyɛlɔ ko ma a, e ngaa agbo ɔmɛ, se be kpahi hu ɔ, e bliɔ agbo ɔmɛ haa nihi nɛ a kɛ niye ní kɛ ní kpahi nɛ a he hia ma ma a mi ɔ. Ke a bli we agbo ɔmɛ gblee ɔ, hwɔ maa gbe ma mi bi ɔmɛ. Jã nɔuu kɛ̃ nɛ e sa kaa wa bli wa tsui ɔ kɛ ha Mawu susumihi.

w12 5/1 32 ¶2

“Moo Bu O Tsui He!”

Mɛni he je nɛ e sa kaa waa bu wa okadi peemi tsui ɔ he ɔ? Mawu ha nɛ Matsɛ Salomo ngma ke: “Ngɛ níhi tsuo nɛ o buɔ he ɔ a kpɛti ɔ, moo bu o tsui he pe nɔ́ fɛɛ nɔ́, ejakaa e mi lɛ wami jeɔ.” (Abɛ 4:23) Bɔ nɛ wa si himi ngɛ ha amlɔ nɛ ɔ, kɛ hwɔɔ se wami nɛ wa ma ná a daa si ngɛ bɔ nɛ wa okadi peemi tsui ɔ ngɛ ha a nɔ. Mɛni he je? Ejakaa Mawu naa nɔ́ nɛ ngɛ wa tsui mi. (1 Samuel 16:7) Nɔmlɔ nɛ wa ji ngɛ mi mi blɔ, nɛ ji, “tsui mi nɔmlɔ nɛ a nɛ” nɛ wa ji ɔ lɛ tsɔɔ bɔ nɛ Mawu naa wɔ ha.​—1 Petro 3:4.

Ngmami ɔ Mi Junehi

w21.08 8 ¶4

Anɛ O Maa To O Tsui Si Kɛ Hyɛ Yehowa Blɔ Lo?

⁴ Abɛ 4:18 ɔ tsɔɔ kaa “blɔ nɛ dali nyɛɛɔ nɔ ɔ ngɛ kaa mɔtu pu la nɛ ngɛ kpɛe hluu kɛ yaa si piani.” Kuku nɛ ɔ tsɔɔ heii kaa Yehowa yeɔ bua e we bi nɛ a nuɔ e yi mi tomihi a sisi bɔɔbɔɔbɔɔ. Kuku nɛ ɔ hu yeɔ bua wɔ nɛ wa naa bɔ nɛ Kristofo no ko peeɔ tsakemi ngɛ e si himi mi nɛ e hɛɛ kɛ suɔ Yehowa he ha. Wa be nyɛe maa ya wa hɛ mi ngɛ mumi mi si kake. E heɔ be. Ke wa bɔɔ mɔde nɛ wa kaseɔ Baiblo ɔ, nɛ waa kɛ ga womihi nɛ ngɛ mi kɛ blɔ tsɔɔmihi nɛ Yehowa asafo ɔ kɛ haa wɔ ɔ tsuɔ ní ɔ, bɔɔbɔɔbɔɔ ɔ, wa ma ba ná Kristo su ɔmɛ, nɛ wa ma ba ná Mawu he nile wawɛɛ. Nyɛ ha nɛ wa susu bɔ nɛ Yesu ngɔ nɔ́ he tomi nɔ́ ko kɛ tsɔɔ enɛ ɔ mi ɔ he nɛ waa hyɛ.

MARCH 17-23

JUETLI NƐ NGƐ MAWU MUNYU Ɔ MI | ABƐ 5

Moo Yu O He Kulaa Kɛ Je Ajuama Bɔmi He

w00 7/15 29 ¶1

O Je Mi Bami He Ma Nyɛ Ma Tsɔ Ngɛ Je Nɛ Nihi A Je Mi Bami Puɛ Ngɛ Mi Nɛ ɔ Mi

Ngɛ abɛ nɛ ɔ mi ɔ, a kale nɔ nɛ e je mi bami puɛ loo e wo blɔ yaya a kaa “yo nubwɔ”​—nɛ ji yo ajuama. Munyuhi nɛ e kɛ sisiɔ nihi ɔ ngɔɔ kaa hwo, nɛ a ngɛ tlotlootlo pe oliv nu. Ajuama bɔmihi fuu nɛ nihi kɛ a he wo mi ɔ je sisi kɛ munyu dɔkɔɔ nɛ a tu kɛ sisi mɛ. Kaa nɔ hyɛmi nɔ́ ɔ, mo susu yo ko nɛ e ye jeha 27 nɛ e ji womi ngmalɔ ngɛ ní tsumi ko mi, nɛ a tsɛɛ lɛ Amy, nɛ e he ngɛ fɛu ɔ níhi a si kpami ɔ he nɛ o hyɛ. E de ke: “Nyumu ko ngɛ́ ní tsumi he ɔ bua jɔ ye he nɛ e náa be kɛ haa mi, nɛ he blɔ fɛɛ he blɔ nɛ e ma ná a, e kɛ jeɔ ye yi. Ke nihi yɔseɔ mo ɔ, e haa nɛ o bua jɔɔ. Se i na heii kaa bɔmi nami ji nɔ́ titli he je nɛ e bua jɔ ye he ɔ nɛ. I be blɔ ngmɛe nɛ e ní peepee ɔ nɛ sisi mi.” Behi fuu ɔ, munyu dɔkɔɔ nɛ yo loo nyumu nɔ sisilɔ tuɔ ɔ gblaa nɔ, ja wa yɔse munyuhi nɛ a ji loko a be nyɛe maa sisi wɔ. Loko wa ma nyɛ maa pee jã a, ja waa kɛ nyɛmi nɛ a kɛ susuɔ níhi a he ɔ tsu ní saminya.

w00 7/15 29 ¶2

O Je Mi Bami He Ma Nyɛ Ma Tsɔ Ngɛ Je Nɛ Nihi A Je Mi Bami Puɛ Ngɛ Mi Nɛ ɔ Mi

Nɔ́ nɛ jeɔ je mi bami yayami nɛ nɔ ko kɛ e he woɔ mi kɛ baa a dooɔ pe agba, nɛ e nya ba pe klaate nya enyɔtsɛ​—nɔ́ yeyee kɛ gbenɔ lɛ jeɔ mi kɛ baa. Behi fuu ɔ, he nile nɛ buɔ nɔ fɔ, hɔ nɛ a ngɔɔ be mi nɛ a dla we he, kɛ bɔmi nami mi hiɔhi ji nyagbahi nɛ jeɔ je mi bami yaya nɛ ɔ mi kɛ baa. Nɛ moo hyɛ bɔ nɛ ke gba si himi he piɛɛlɔ kake yi anɔkuale ɔ, e maa dɔ nɔ kpa a wawɛɛ nɛ e maa ye aywilɛho ha. Ke he piɛɛlɔ kake yi anɔkuale nɛ e kɛ e he wo je mi bami yayami mi si kake pɛ po ɔ, e maa dɔ he piɛɛlɔ nɛ a tɔ̃ e nɔ ɔ wawɛɛ e wami be tsuo. Niinɛ, ajuama bɔmi yeɔ nɔ awi wawɛɛ.

w00 7/15 29 ¶5

O Je Mi Bami He Ma Nyɛ Ma Tsɔ Ngɛ Je Nɛ Nihi A Je Mi Bami Puɛ Ngɛ Mi Nɛ ɔ Mi

E sa nɛ waa yu wa he kɛ je nihi nɛ a kɛ a he woɔ je mi bami yayami mi ɔ a ní peepeehi a he kulaa konɛ a ko ná wa nɔ he wami. E sa nɛ waa yu wa he kɛ je a ní peepeehi a he kɛ gu, lahi nɛ sɛ, nɛ́ wa be tue bue, sɛnihi nɛ je mi bami yayami ní peepeehi ngɛ mi nɛ́ wa be hyɛe, kɛ ajuama bɔmi he foni loo videohi nɛ wa be hyɛe loo a he womihi nɛ wa be kanee ɔ nɔ. (Abɛ 6:27; 1 Korinto Bi 15:33; Efeso Bi 5:3-5) Nɛ hyɛ bɔ nɛ e maa pee nɔ́ nɛ juɛmi be mi kulaa ha kaa wa maa gbla a juɛmi kɛ ba wa nɔ, kɛ gu tadehi nɛ a sɛ nɛ wa maa wo kɛ wa he nɛ wa ma dla ngɛ blɔ nɛ sɛ nɔ ɔ nɔ!​—1 Timoteo 4:8; 1 Petro 3:3, 4.

Ngmami ɔ Mi Junehi

w00 7/15 29 ¶7

O Je Mi Bami He Ma Nyɛ Ma Tsɔ Ngɛ Je Nɛ Nihi A Je Mi Bami Puɛ Ngɛ Mi Nɛ ɔ Mi

Salomo tsɔɔ nɔ́ ko nɛ he jua wa nɛ ke nɔ ko ngɔ e he kɛ wo je mi bami yayami ní peepeehi a mi ɔ, e bɔɔ lɛ. Gba puɛmi haa nɛ bumi nɛ a ngɛ kɛ ha nɔ ko loo bumi nɛ lɛ nitsɛ e ngɛ kɛ ha e he ɔ puɛɔ. E ji hɛ mi si puemi nitsɛnitsɛ kaa nɔ ko maa ngɔ e he kɛ ha ajuama bɔmi konɛ nihi kɛ lɛ nɛ pee nɔ́ nɛ a kɛ maa gbe a bɔmi nami he akɔnɔ kɛkɛ, loo e maa ngɔ lɛ nitsɛ e he kɛ pee nɔ́ nɛ e kɛ maa gbe e bɔmi nami he akɔnɔ. Ke nɔ ko kɛ nɔ ko nɛ pi e he piɛɛlɔ ji lɛ ɔ ná bɔmi ɔ, e tsɔɔ kaa e be bumi kɛ ha lɛ nitsɛ e he.

MARCH 24-30

JUETLI NƐ NGƐ MAWU MUNYU Ɔ MI | ABƐ 6

Mɛni Wa Ma Nyɛ Maa Kase Ngɛ Tatu He?

it-1 115 ¶1-2

Tatu

‘Juɛmi Nɛ He Numi Lɛ Kudɔɔ Lɛ.’ Pi níhi a he susumi kɛ ya tsitsaa nɛ haa tatu ‘juɛmi,’ mohu ɔ, he numi nɛ a Bɔlɔ ɔ ngɔ kɛ wo a mi ɔ ji nɔ́ nɛ kudɔɔ a juɛmi. Baiblo ɔ tu tatu he munyu kaa “e hlaa e niye ní ngɛ mawulɛ be mi, nɛ e buaa e niye ní nya ngɛ ní kpami be mi.” (Abɛ 6:8) Tatu ko nɛ pɔ he wawɛɛ ngɛ Palestina, nɛ ji tatu ní kpalɔ loo tatu ngmɔ hulɔ ɔ (Messor semirufus), buaa ngma fuu nya ngɛ mawulɛ kɛ gbiɛ be mi, nɛ e yeɔ ngɛ jeha a mi, kɛ ngɛ ahlabata be mi, nɛ́ ji be nɛ niye ní nami yeɔ ɔ. A pɔɔ tatu nɛ ɔ nami ngɛ zugba ngɛ ngma fiaami hehi, nɛ́ ngma kɛ dumi wuhi fuu ngɛ lejɛ ɔ. Ke hiɔmi ha nɛ dumi wuhi loo ngma nɛ tatu nɛ ɔmɛ bua nya a pɔ ɔ, a ngɔɔ mɛ kɛ jeɔ kpo nɛ e ya kaa ngɛ pu nɔ. A le tatu nɛ ɔmɛ kaa a jeɔ ngma a loo dumi wu ɔ hɛngmɛ nɛ́ haa nɛ e puɛɛ̃ ɔ, bɔ nɛ pee nɛ ke a kɛ to ɔ, e ko nyɛ nɛ e puɛ̃. Blɔhi nɛ tatu ni kpali a kuu ɔ guɔ nɔ, kɛ jehanɛ ngma totohi nɛ a jeɔ a he ngɛ a muɔ ɔmɛ a nya a, haa nɛ nihi leɔ hehi nɛ tatu nɛ ɔmɛ ngɛ.

Bɔ Nɛ A Peeɔ A Ní Ha a Ji Nɔ Hyɛmi Nɔ́ Kɛ Ha Wɔ. Níhi a mi hlami bɔɔ nɛ kɔɔ tatu he nɛ wa susu he ɔ ha nɛ wa naa bɔ nɛ he wami womi munyu nɛ ɔ mi jiɔ ha. Nɛ lɔ ɔ ji: “Hejɔtsɛ, yaa tatu ngɔ nɛ o ya kase lɛ; moo to bɔ nɛ e peeɔ e ni ha a he hɛ konɛ o le ní.” (Abɛ 6:6) Pi bɔ nɛ a bɔ mɛ ha nɛ a buaa niye ní nya kɛ toɔ kɛ haa hwɔɔ se ɔ pɛ nɛ e sa nɛ waa kase, mohu ɔ, e sa nɛ waa kase bɔ nɛ a fĩɔ si kɛ bɔ nɛ a bɔɔ mɔde wawɛɛ ha nɛ́ behi fuu ɔ, a tlooɔ loo a gblaa níhi nɛ a jiɔmi pa mɛ nitsɛmɛ a jiɔmi si enyɔ loo nɔ́ nɛ pe jã kɛ jeɔ he kpa kɛ yaa he kpa, nɛ́ a peeɔ nɔ́ fɛɛ nɔ́ nɛ a ma nyɛ kɛ tsuɔ a ní tsumihi, nɛ́ ke a ngɛ nyɛɛe ngɛ he nɛ ma nyɛ ma ha nɛ a tsɔ kɛ ba nɔ si po ɔ, a kpale we a se ɔ. A peeɔ kake kɛ tsuɔ ní, a haa nɛ a muɔhi a mi tsɔɔ, a susuɔ a sibi a he, nɛ behi fuu ɔ, a yeɔ bua ni nɛmɛ nɛ a plaa loo pɔtɔ mɛ ɔ kɛ baa a muɔ ɔmɛ a mi. Enɛ ɔ ji nɔ́ ko nɛ sa kadimi.

w00 9/15 26 ¶3-4

Moo Po O Biɛ He Piɛ

Kaa bɔ nɛ tatuhi peeɔ ɔ, anɛ e sɛ nɛ wɔ hu waa kɛ hɛdɔ nɛ tsu ní lo? Ke wa tsuɔ ní wawɛɛ nɛ wa bɔɔ mɔde kaa wa maa ya wa hɛ mi ngɛ bɔ nɛ wa tsuɔ ní ha a mi, ke nɔ ko ngɛ wɔ hyɛe jio, nɔ ko hyɛ we wɔ jio ɔ, wɔ nitsɛmɛ lɛ wa ma ná he se. Ke wa ngɛ sukuu jio, wa ní tsumi he jio, wa ngɛ mumi mi níhi a he ní tsue jio, e sa nɛ waa bɔ wa he mɔde. Kaa bɔ nɛ tatu náa ní nɛ e tsuɔ wawɛɛ ɔ he se ɔ, jã kɛ̃ nɛ Mawu suɔ kaa wa ‘ná bua jɔmi ngɛ ní nɛ wa tsuɔ wawɛɛ ɔ tsuo mi.’ (Fiɛɛlɔ 3:13, 22; 5:18) Ke wa tsuɔ ní wawɛɛ ɔ, lɔ ɔ ma ha nɛ wa ma ná he nile kpakpa nɛ wa bua maa jɔ wa he.​—Fiɛɛlɔ 5:12.

Salomo ngɔ sane bimi enyɔ nɛ ma ha nɛ hejɔtsɛ nɛ susu e yi mi, nɛ́ e kpa hejɔ tomi ɔ kɛ tsu ní. E bi ke: “Mo hejɔtsɛ, o maa hwɔ si kɛ ya si mɛni be? Mɛni be nɛ o maa te si kɛ je o mahe ɔ mi?” Salomo tu nɔ́ nɛ hejɔtsɛ pɔɔ demi ɔ he munyu ke: “Oo, ma hwɔ mahe bɔɔ, ma de kɔnɛɛ bɔɔ, ma bua ye nine nya nɛ ma jɔɔ ye he bɔɔ, o hɛɛ mi jã nɛ ohia ma ba ná mo tlukaa kaa julɔ, nɛ o he maa fĩ mo kaa nɔ́ nɛ awi yelɔ ba tua mo.” (Abɛ 6:9-11) Be mi nɛ hejɔtsɛ kpã e he mi kɛ hwɔɔ si ɔ, ohia ma ba ná lɛ tlukaa kaa julɔ, nɛ e he maa fĩ lɛ kaa nɔ́ nɛ awi yelɔ ba tua lɛ. E kɛ we kɛkɛ hu kɛ miohi fuu puɛ ngɛ hejɔtsɛ ngmɔ mi. (Abɛ 24:30, 31) E kɛ we kɛkɛ e ní tsumi ɔ gu. Kɛ yaa si mɛni be nɛ nitsumitsɛ ko kɛ nɔ ko nɛ hejɔtsɛ ji lɛ ɔ ma tsu ní? Nɛ ke sukuuno ko peeɔ hejɔ ngɛ ní kasemi mi ɔ, anɛ e ma nyɛ maa hyɛ blɔ kaa e maa bɔ mɔde ngɛ sukuu lo?

Ngmami ɔ Mi Junehi

w00 9/15 27 ¶3

Moo Po O Biɛ He Piɛ

Yayami kpaago ɔmɛ nɛ a wo a ta ngɛ Abɛ womi ɔ mi ɔ, ji ní titli nɛ kɔɔ yayamihi tsuo a he. “He nɔ womi” kɛ “ga yaya tomi” ji yayamihi nɛ nɔ peeɔ ngɛ e susumi mi. “Lakpa yemi” kɛ “lakpa odase yemi” ji yayamihi nɛ nɔ peeɔ ngɛ e munyu tumi mi. “Nɔ nɛ pee we nɔ́ ko muɔ si puemi,” kɛ “he sɔmi kɛ nɔ́ yayami peemi” ji yiwutso ní peepeehi. Nɛ yayami ɔ eko nɛ Yehowa hiee wawɛɛ ji nɔ ko nɛ e bɔɔ mɔde kaa e maa wo nihi nɛ jinɛ a ko nyɛ ko hi si ngɛ tue mi jɔmi mi ɔ a kpɛti pɛ. Yayami nɛ ɔmɛ nɛ a je sisi kɛ je ekpa kɛ ya si kpaago ɔ tsɔɔ kaa pi lɔ ɔmɛ pɛ ji yayamihi nɛ Yehowa hiee, ejakaa daa nɛ ɔ, yayamihi nɛ adesahi peeɔ ɔ ngɛ hɛ mi yae.

MARCH 31–APRIL 6

JUETLI NƐ NGƐ MAWU MUNYU Ɔ MI | ABƐ 7

Yu O He Kɛ Je Si Fɔfɔɛhi Nɛ Ma Nyɛ Maa Ngɔ Mo Kɛ Wo Ka Mi ɔ He

w00 11/15 29 ¶5

“Moo Ye Ye Mlaa Amɛ A Nɔ Konɛ O Hi Wami Mi”

Saflɛ nɛ Salomo tu he munyu kaa e hyɛ zugba kɛ gu mi ɔ, ji saflɛ nɛ a kɛ tso tlaatlaahi pee nɛ́ eko ngɛ eko nɔ nɛ blɔ ngɛ a kpɛ. Benɛ je ngɛ jɔe ɔ, gbɛjegbɛ ɔmɛ a nɔ bɔni diblii womi. E hɛngmɛ gba niheyo ko nɛ́ he nɛ e ngɛ nyɛɛe ɔ ngɛ oslaa a nɔ. Akɛnɛ e be nɔ́ se kɔmi loo juɛmi he je ɔ, a kale lɛ kaa e be tsui nɛ nuɔ nɔ́ sisi. E ma nyɛ maa ba lɛ kaa e le bɔ nɛ kpɔ ɔ mi he nɛ e ngɛ nyɛɛe ngɛ ɔ ngɛ ha, kɛ nɔ́ nɛ ma nyɛ maa ba e nɔ. Niheyo nɛ ɔ ya be ngɛ “kɔ̃ nya” he ko nɛ́ yaa he nɛ yo ko ngɛ ɔ. Mɛnɔ ji yo nɛ ɔ? Nɛ mɛni e pɔɔ peemi?

w00 11/15 30 ¶4-6

“Moo Ye Ye Mlaa Amɛ A Nɔ Konɛ O Hi Wami Mi”

Yo nɛ ɔ nya mi munyuhi ngɛ dɔkɔɔ. E kɛ nɔ mi mami tu munyu nɛ zo pee we lɛ. E je blɔ susu nɔ́ nɛ e ma de konɛ e kɛ sisi niheyo ɔ he saminya. Yo nɛ ɔ gu munyuhi nɛ e tu kaa e sã tue mi jɔmi afɔlehi, nɛ e ye e si womi ɔmɛ a nɔ ɔ nɔ kɛ ngɛ tsɔɔe kaa, e peeɔ nɔ́ nɛ da, nɛ e kɛ e he woɔ Mawu jami mi níhi a peemi mi be fɛɛ be. Níhi nɛ a kɛ sãa tue mi jɔmi afɔle ɔmɛ ngɛ sɔlemi we nɛ ngɛ Yerusalem ɔ ji, muɔ lo, mamu, nu, kɛ wai. (3 Mose 19:5, 6; 22:21; 4 Mose 15:8-10) Akɛnɛ ke nɔ ko ya sã tue mi jɔmi afɔle nɛ́ e kɛ e weku ɔ ma nyɛ maa ye eko he je ɔ, yo nɛ ɔ ngɛ tsɔɔe kaa niye ní kɛ dã fuu ngɛ e we ɔ mi. Nɔ́ nɛ yo ɔ ngɛ tsɔɔe ɔ ngɛ heii. Lɔ ɔ ji: Niheyo nɛ ɔ bua maa jɔ e he wawɛɛ ke e ba e we ɔ mi. Nɛ e tsɔɔ kaa e je kpo konɛ e ba hla niheyo nɛ ɔ titli. Ke nɔ ko he yo nɛ ɔ munyu nɛ ɔ ye ɔ, e maa ta e tsui he wawɛɛ. Baiblo he ní lelɔ ko de ke: “E ji anɔkuale kaa yo ɔ je kpo konɛ e ya hlá nɔ ko, se anɛ niheyo nɛ ɔ pɔtɛɛ nɛ e ma hlami ɔ lo? Nɔ ko nɛ e biɛɛ saminya a lɛ e ma he e munyu ɔ ye.”

Benɛ yo nɔ sisilɔ nɛ ɔ dla e he konɛ e he nɛ pee niheyo ɔ akɔnɔ, kɛ munyu dɔkɔɔ nɛ e tu konɛ e kɛ gbe niheyo ɔ yi mi, kɛ fuami nɛ e fuaa lɛ, kɛ e nya he nɛ e fĩɔ ɔ se ɔ, e tu níhi nɛ a he via nɛ e kɛ dla e sa a nɔ ɔ he munyu konɛ e kɛ sisi niheyo ɔ nɛ́ e nyɛɛ e se. E de ke: “I ngɔ sa nɔ bo kpakpahi kɛ ha ye sa a nɔ, Egipt klala nɛ hɛɛ su slɔɔtohi. I ngɔ mimɛ, aloe, kɛ sinamon kɛ fĩa ye sa a nɔ.” (Abɛ 7:16, 17) E ngɔ Egipt klala kpakpahi nɛ a ngɛ fɛu saminya, níhi nɛ a jeɔ via kaa mimɛ, aloe kɛ sinamon kɛ dla e sa a nɔ.

Yo nɛ ɔ tsa e munyu ɔ nɔ ke: “Ba, ha nɛ wa je suɔmi kpo ha wa sibi kɛ ya si mɔtu; ha nɛ wa bla kɛ ná suɔmi mi ngɔɔmi.” Pi niye ní nɛ mɛ ni enyɔ ɔmɛ a ma ya ye ɔ he je nɛ e ngɛ niheyo nɛ ɔ nine fɔe ngɛ ɔ. Si nɛ e ngɛ lɛ woe ɔ tsɔɔ kaa e kɛ lɛ ma ná bɔmi. Niheyo nɛ ɔ na nine fɔmi ɔ kaa nɔ́ ko nɛ ma ha lɛ bua jɔmi nɛ́ e ma ná he se! Yo nɛ ɔ tsa e sisimi munyu ɔ nɔ ke: “Ejakaa ye huno ɔ be we mi; e hia blɔ kɛ ho he ko tsitsaa ya. E hɛɛ sika kɛ baagi kɛ ho, nɛ e be kpalee kɛ ba kɛ yaa si ligbi nɛ nyɔhiɔ ɔ maa wa.” (Abɛ 7:18-20) E wo lɛ si kaa nɔ ko nɔ ko be mɛ nae, ejakaa e huno ɔ hia blɔ ngɛ ní tsumi ko he je, nɛ e be bae kɛ ma ya si be ko. Yo nɛ ɔ hɛ mi tɛ̃ ngɛ blɔ nɔ nɛ e gu kɛ sisi niheyo ɔ ha a he! Ngmami ɔ de ke: “E ngɔ sisimi munyu kɛ gbe niheyo ɔ yi mi. E ngɔ munyu dɔkɔɔ kɛ mlɔɔ lɛ.” (Abɛ 7:21) Nɔ ko nɛ e ngɛ kã kaa bɔ nɛ Yosef ngɛ ɔ pɛ lɛ ma nyɛ ma kua munyu dɔkɔɔ nɛ ɔmɛ. (1 Mose 39:9, 12) Anɛ niheyo nɛ ɔ ngɛ nyɛmi ko kaa jã lo?

w00 11/15 31 ¶2

“Moo Ye Ye Mlaa Amɛ A Nɔ Konɛ O Hi Wami Mi”

Niheyo nɛ ɔ nyɛ we nɛ e kua nine fɔmi ɔ. Akɛnɛ e be juɛmi ko kulaa nɛ́ e susuu we níhi a he he je ɔ, e nyɛɛ yo ɔ se kɛ ho “kaa na ku nɛ a yaa gbe.” Kaa bɔ nɛ ke a bɔ nɔ ko pã nɛ́ e be nyɛe maa tu e tue gblami nya fo ɔ, jã nɔuu nɛ a gbla niheyo nɛ ɔ kɛ wo yayami mi ɔ nɛ. E nɛ́ oslaa nɛ ngɛ he ɔ kɛ ya si benɛ ‘kɛ̃ɛ̃ mi bi gbɔ e ko,’ nɛ lɔ ɔ ji, kɛ ya si benɛ e ná gbenɔ plaami. E gbenɔ ɔ ma nyɛ maa pee gbenɔ nitsɛ ejakaa, nɔ́ nɛ e ya pee ɔ ma nyɛ ma ha nɛ e ná hiɔhi nɛ jeɔ ajuama bɔmi mi kɛ baa a. Nɛ e ma nyɛ maa pee mumi mi gbenɔ hulɔ; ejakaa e kɔɔ “e wami” he. Nɔ́ nɛ e pee ɔ sa lɛ nitsɛ kɛ e wami si himi tsuo he wawɛɛ, nɛ jehanɛ hu e pee yayami nɛ hɛdɔ ngɛ he kɛ si Mawu. E kɛ oya yemi ngɔ e he kɛ ya wo gbenɔ dɛ mi kaa lohwe pɛlitsɛ nɛ e ngɛ oya yee kɛ yaa sɛ klama mi!

Ngmami ɔ Mi Junehi

w00 11/15 29 ¶1

“Moo Ye Ye Mlaa Amɛ A Nɔ Konɛ O Hi Wami Mi”

Salomo tsa e munyu ɔ nɔ ke: “Moo fĩ mɛ [ye mlaa amɛ] kɛ wo o nine nguɛhi a he; ngmaa mɛ ngɛ o tsui nɔ.” (Abɛ 7:3) Kaa bɔ nɛ wa hɛngmɛ ɔmɛ naa wa nine nguɛ ɔmɛ heii, nɛ́ wa nine nguɛ ɔmɛ hu yeɔ bua wɔ kɛ tsuɔ wa yi mi tomihi a he ní ɔ, jã nɔuu nɛ e sa nɛ wa hɛ nɛ hi tsɔsemi nɛ wa náa ngɛ Ngmami ɔ mi, aloo Baiblo mi anɔkuale nile nɛ wa ba ná amɛ a nɔ be fɛɛ be, nɛ wa ha nɛ a kudɔ wɔ ngɛ nɔ́ fɛɛ nɔ́ nɛ wa peeɔ ɔ mi. E sa nɛ waa ngma mɛ kɛ fɔ wa tsui nɔ, nɛ́ tsɔɔ kaa wa ma ha nɛ a kudɔ nɔ tutuutu nɛ wa ji ngɛ wa mi mi blɔ ɔ.

APRIL 7-13

JUETLI NƐ NGƐ MAWU MUNYU Ɔ MI | ABƐ 8

Moo Bu Yesu Nɛ́ A Kale Lɛ Kaa Juɛmi ɔ Tue

cf 131 ¶7

“I Suɔ Tsɛ ɔ”

⁷ Nile de ngɛ kuku 22 ke: ‘Yehowa bɔ mi kekleekle; e bɔ mi loko e je e nítsumi ɔmɛ a sisi blema lokoo.’ Pi nile nitsɛ he munyu nɛ a ngɛ tue ngɛ hiɛ ɔ, ejakaa a ‘bɔɛ’ nile. Nile be sisije ejakaa Yehowa ngɛ daa nɛ e ji ní lelɔ. (La 90:2) Se Mawu Bi ɔ lɛɛ, lɛ ji “nibɔ níhi tsuo a kpɛti tɛte.” A bɔ lɛ; Yehowa bɔ lɛ kɛ je e nítsumi ɔmɛ tsuo a sisi. (Kolosebi 1:15) Abɛ womi ɔ tsɔɔ kaa Bi ɔ ngɛ si himi mi loko a bɔ zugba a kɛ hiɔwe. Akɛnɛ a tsɛɔ lɛ ke Munyu ɔ, nɛ ji Mawu Munyu Nya Jelɔ he je ɔ, e je Yehowa nile ɔ kpo kɛ pi si.​—Yohane 1:1.

cf 131-132 ¶8-9

“I Suɔ Tsɛ ɔ”

⁸ Mɛni ji nɔ́ nɛ Bi ɔ tsu jehahi babauu nɛ e hi si loko e ba zugba a nɔ ɔ? Kuku 30 ɔ deɔ wɔ kaa e ngɛ Mawu kasa nya kaa “ga ní tsulɔ kpanaa.” Mɛni enɛ ɔ tsɔɔ? Kolosebi 1:16 tsɔɔ mi ke: “E nɔ lɛ Mawu gu kɛ bɔ nɔ́ tsuaa nɔ́ ngɛ hiɔwe kɛ zugba, . . . Mawu gu Kristo nɔ kɛ bɔ níhi tsuo, nɛ Kristo nɔuu a bɔ mɛ ha.” Lɔɔ he ɔ, Yehowa nɛ ji Bɔlɔ ɔ, gu e Bi ɔ nɛ ji Ga Ní Tsulɔ Kpanaa a nɔ kɛ bɔ ní kpahi tsuo​—kɛ je mumi mi adebɔ níhi nɛ a ngɛ hiɔwe, níhi nɛ ngɛ je mluku ɔ mi nɛ a naa kɛ hɛngmɛ, tso kɛ lohwe slɔɔtoslɔɔtohi nɛ a ngɛ zugba a nɔ ɔ a nɔ kɛ ya si adebɔ nɔ́ nɛ e nɔ kuɔ pe kulaa ngɛ zugba a nɔ, nɛ ji adesa a nɔ. Ngɛ blɔ ko nɔ ɔ, wa ma nyɛ maa ngɔ kake peemi nɛ ngɛ Tsɛ ɔ kɛ Bi ɔ a kpɛti ɔ kɛ to kake peemi nɛ ngɛ tsu mami he foni tɛnilɔ kɛ tsu malɔ nɛ le bɔ nɛ a hyɛɛ tsu mami he foni nɔ kɛ maa tsu ha saminya a kpɛti ɔ he. Ke adebɔ nɔ́ ko ha nɛ wa nya kpɛ wa he ɔ, lɔɔ tsɔɔ kaa wa ngɔ yi jemi kɛ ngɛ Ní Bɔlɔ Ngua a hae. (La 19:1) Se wa ma nyɛ ma kai huɛ bɔmi nɛ bua jɔmi ngɛ mi nɛ ngɛ Bɔlɔ ɔ kɛ e “ga ní tsulɔ kpanaa” a kpɛti ɔ hulɔ.

⁹ Be komɛ ngɛ nɛ ke adesahi enyɔ nɛ a yi mluku bla kɛ ngɛ ní tsue ɔ, pɛ sɛɔ a kpɛti. E be jã ngɛ Yehowa kɛ e Bi ɔ a blɔ fa mi! Bi ɔ kɛ e Tsɛ ɔ tsu ní jehahi babauu, nɛ daa nɛ ɔ, e ‘bua jɔɔ e he’ ngɛ e Tsɛ ɔ hɛ mi. (Abɛ 8:30) Niinɛ, e bua jɔɔ kaa e maa hi e Tsɛ ɔ kasa nya, nɛ kake peemi ngɛ a kpɛti nitsɛnitsɛ. Enɛ ɔ ha nɛ Bi ɔ je e Tsɛ ɔ saminya, nɛ e kase Mawu su ɔmɛ. E be nyakpɛ mɔ kaa suɔmi nɛ ngɛ Tsɛ ɔ kɛ Bi ɔ a kpɛti ɔ mi ba wa! A ma nyɛ ma de ngɛ blɔ nɛ da nɔ kaa e ji suɔmi nɛ e se kɛ, nɛ mi wa pe kulaa ngɛ je mluku ɔ mi.

w09 4/15 31 ¶14

Mo Ná Yesu, Nɛ Ji David Ngua a Kɛ Salomo Ngua a He Bua Jɔmi

¹⁴ Adesa kake pɛ lɛ e juɛmi mi kuɔ pe Salomo. Lɛ ji Yesu Kristo, nɛ́ e kale e he kaa “nɔ́ ko nɛ e pe Salomo” ɔ. (Mat. 12:42) Yesu tu “neneene wami munyu ɔmɛ.” (Yoh. 6:68) Kaa nɔ hyɛmi nɔ́ ɔ, ngɛ e Yoku ɔ Nɔ Fiɛɛmi ɔ mi ɔ, e blɛke sisi tomi mlaa komɛ nɛ a ngɛ Salomo abɛ ɔmɛ a mi ɔ mi. Salomo tu níhi fuu nɛ haa Yehowa sɔmɔlɔ bua jɔmi ɔ he munyu. (Abɛ 3:13; 8:32, 33; 14:21; 16:20) Yesu ma nɔ mi kaa nɔ́ nɛ ngɔɔ bua jɔmi nitsɛnitsɛ kɛ baa ji, níhi nɛ kɔɔ Yehowa sɔmɔmi kɛ e si womi ɔmɛ a mi bami ɔ he. E de ke: “Nihi nɛ a le kaa a hia mumi mi níhi ɔ ngɛ bua jɔmi, ejakaa a nɔ́ ji hiɔwe Matsɛ Yemi ɔ nɛ.” (Mat. 5:3) Nihi nɛ a kɛ sisi tomi mlaahi nɛ ngɛ Yesu ní tsɔɔmi ɔmɛ a mi ɔ tsuɔ ní ɔ, hɛɔ kɛ suɔ Yehowa nɛ́ “wami jeɔ” e ngɔ ɔ he. (La 36:9; Abɛ 22:11; Mat. 5:8) Kristo mi lɛ “Mawu juɛmi ɔ” ngɛ ɔ nɛ. (1 Kor. 1:24, 30) Yesu Kristo nɛ ji Mesia a kɛ Matsɛ ɔ ngɛ ‘juɛmi mumi’ nɛ mi kuɔ.​—Yes. 11:2.

Ngmami ɔ Mi Junehi

w22.10 18-19 ¶1-2

Nile Nitsɛnitsɛ Ngɛ Ngmlaa Kpae Boboobo

NGƐ mahi fuu a nɔ ɔ, wa naa nyɛmimɛ nɛ a pɔɔ si dami ngɛ hehi nɛ nihi fuu beɔ ngɛ, nɛ́ a ngɛ nihi wa womi ɔmɛ hae. Anɛ o kɛ o he wo fiɛɛmi ní tsumi ɔ fã nɛ ɔ nɛ ngɛ bua jɔmi ɔ eko mi hyɛ lo? Ke o kɛ o he wo mi hyɛ ɔ, atsinyɛ jemi ko be he kaa o kai nɔ́ he tomi nɔ́ nɛ ngɛ Abɛ womi ɔ mi ɔ, nɛ tsɔɔ kaa nile ngɛ ngmlaa kpae boboobo ngɛ magbɛ nɔ konɛ nihi nɛ a nu ga womi nɛ e ngɛ kɛ ha mɛ ɔ. (Kane Abɛ 1:20, 21.) ‘Nile nitsɛnitsɛ,’ nɛ ji Yehowa nile ɔ ngɛ Baiblo ɔ kɛ wa womi ɔmɛ a mi. Nile nɛ ɔ ji nɔ́ nɛ nihi hia konɛ a nyɛ nɛ a ná neneene wami. Ke nɔ ko ngɔ wa womi ɔmɛ eko ɔ, wa bua jɔɔ wawɛɛ. Se pi nɔ fɛɛ nɔ nɛ e ngɔɔ wa womi ɔmɛ eko. Ni komɛ sume kaa a maa le níhi nɛ Baiblo ɔ de ɔ. Ni komɛ hu muɔɔ wɔ. A susu kaa Baiblo ɔ ji womi nɛ e be be. Ni komɛ hu tuɔ munyu kɛ siɔ je mi bami he mlaahi nɛ ngɛ Baiblo ɔ mi ɔ, nɛ a susuɔ kaa nihi nɛ a kɛ Baiblo ɔ mi munyu ɔmɛ tsuɔ ní ɔ ngɛ kpɛii tsɔ, nɛ a buɔ a he dali. Se kɛ̃ ɔ, Yehowa yaa nɔ nɛ e haa nɛ anɔkuale nile hyɛɛ babauu, konɛ nɔ fɛɛ nɔ nine nɛ su nɔ. Ngɛ mɛni blɔ nɔ?

² Blɔ kake nɔ nɛ Yehowa guɔ kɛ haa nɛ nihi náa nile nitsɛnitsɛ ji kɛ gu e munyu nɛ ji Baiblo ɔ nɔ. Lɔ ɔ ji kaa nɔ fɛɛ nɔ ko ngɛ Baiblo ɔ eko. Nɛ womihi nɛ a da Baiblo ɔ nɔ kɛ pee ɔ hu nɛɛ? Wa bua jɔ kaa Yehowa ye bua nɛ a tsɔɔ womi nɛ ɔmɛ a sisi kɛ ya gbihi nɛ hiɛ pe 1,000 mi. Nihi nɛ a kaseɔ e mi munyu ɔmɛ, nɛ a kɛ níhi nɛ a kaseɔ ɔ tsuɔ ní ɔ ma ná he se. Se nihi fuu mwɔ a yi mi kpɔ kaa a be Yehowa tue bue. Ke a maa mwɔ yi mi kpɔ ko nɛ he hia a, a daa mɛ nitsɛmɛ a nile, aloo nɔ́ nɛ ni kpahi deɔ mɛ ɔ nɔ kɛ mwɔɔ a yi mi kpɔ. Ke wa mwɔ wa yi mi kpɔ kaa waa kɛ nɔ́ nɛ Baiblo ɔ de ɔ ma tsu ní ɔ, a buɔ wɔ kaa wa li nɔ́ ko. Ní kasemi nɛ ɔ maa tsɔɔ wɔ nɔ́ he je nɛ nihi peeɔ a ní jã a. Kekleekle ɔ, nyɛ ha nɛ wa susu blɔ nɔ nɛ wa maa gu kɛ ná nile nɛ je Yehowa ngɔ ɔ he.

APRIL 14-20

JUETLI NƐ NGƐ MAWU MUNYU Ɔ MI | ABƐ 9

Moo Pee O He Ní Lelɔ, Se Pi Nɔ He Fɛu Yelɔ

w22.02 9 ¶4

‘Moo Bu Munyuhi Nɛ Ní Leli Tuɔ ɔ Tue’

⁴ Ngɛ anɔkuale mi ɔ, e he ma nyɛ maa wa kaa wa maa bu ga womi tue nɛ wa kɛ tsu ní. Wa mi mi ma nyɛ ma fu ngɛ ga womi ko he po. Mɛni he je? Wa le kaa wa yi mluku, enɛ ɔ he ɔ, e he ma nyɛ maa wa ha wɔ kaa wa maa kplɛɛ ga womi nɔ ke nɔ ko na tɔ̃tɔ̃mi pɔtɛɛ ko ngɛ wa he nɛ e de wɔ. (Kane Fiɛlɔ 7:9.) Eko ɔ, wa maa ngɔ ní komɛ kɛ je wa nya. Wa ma nyɛ ma susu kaa nɔ nɛ ngɛ wɔ ga a woe ɔ hɛɛ susumi nɛ dɛ ngɛ wa he, aloo blɔ nɔ nɛ e gu kɛ wo wɔ ga a ma nyɛ ma ha nɛ wa mi mi nɛ fu. Wa ma nyɛ maa na tɔ̃tɔ̃mi komɛ ngɛ nɔ nɛ ngɛ wɔ ga a woe ɔ he nɛ wa ma susu ‘kaa e be he blɔ nɛ e woɔ wɔ ga. E sa nɛ e wo lɛ nitsɛ e he ga kekle!’ Ke wa bua jɔɛ ga womi ɔ he ɔ, waa kɛ be ní tsue loo wa ma bi nɔ kpa nɛ e wo wɔ ga ejakaa wa susu kaa jamɛ a nɔ ɔ ma de wɔ nɔ́ nɛ wa suɔ kaa waa nu.

w22.02 12 ¶12-14

“Moo Bu Munyuhi Nɛ Ní Leli Tuɔ ɔ Tue”

¹² Mɛni ma nyɛ maa ye bua wɔ konɛ waa kplɛɛ ga womi nɔ? E sa nɛ waa ba wa he si nɛ wa kai kaa wa yi mluku, enɛ ɔ he ɔ, wa ma nyɛ maa pee ní komɛ nɛ nile be mi. Kaa bɔ nɛ wa susu he kɛ sɛ hlami ɔ, Hiob ná juɛmi nɛ dɛ se pee se ɔ, e dla e juɛmi nɛ Yehowa jɔɔ lɛ. Mɛni he je nɛ Hiob pee jã a? Ejakaa e baa e he si. E ngɛ mi ka Hiob wa pe Elihu mohu lɛɛ se e kplɛɛ ga nɛ Elihu wo lɛ ɔ nɔ. Enɛ ɔ tsɔɔ kaa Hiob baa e he si. (Hiob 32:6, 7) Ke wɔ hu wa nu he kaa e sɛ nɛ a ko wo wɔ ga ko aloo wa wa pe nɔ nɛ wo wɔ ga a po ɔ, he si bami ma nyɛ maa ye bua wɔ nɛ waa kɛ ga womi ɔ ma tsu ní. Asafo mi nɔkɔtɔma ko nɛ e ngɛ Canada a de ke: “E he maa wa kaa wa maa ya wa hɛ mi ke wa kplɛɛ we nɛ nɔ ko nɛ wo wɔ ga.” E sa nɛ wɔ tsuo waa ya nɔ nɛ waa wo mumi ɔ yiblii ɔ nɛ waa pee sane kpakpa fiɛɛli kɛ tsɔɔli nɛ a he be.​—Kane La 141:5.

¹³ Moo na ga womi kaa blɔ nɛ Mawu gu nɔ kɛ ngɛ suɔmi kpo jee kɛ ngɛ mo tsɔɔe. Yehowa suɔ nɛ e hi ha wɔ. (Abɛ 4:20-22) Ke e gu e Munyu ɔ, Baiblo kasemi womi aloo Kristofo no ko nɛ e nane pi si ɔ nɔ kɛ wo wɔ ga a, lɔ ɔ tsɔɔ kaa e ngɛ suɔmi kpo jee kɛ ngɛ wɔ tsɔɔe. Hebri Bi 12:9, 10 tsɔɔ kaa “e peeɔ jã konɛ e hi kɛ ha wɔ.”

¹⁴ Ngɔɔ o juɛmi kɛ ma ga womi ɔ nɔ se pi blɔ nɔ nɛ a gu kɛ wo mo ga a. Be komɛ ɔ, blɔ nɔ nɛ a gu kɛ wo wɔ ga a ma nyɛ ma ha nɛ wa bua be ga womi ɔ he jɔe. Ngɛ anɔkuale mi ɔ, ke nɔ ko maa wo nɔ ko ga a, e sa nɛ e bɔ mɔde nɛ e ha nɛ ga womi ɔ nɔ kplɛɛmi nɛ ko ye ha nɔ nɛ e ngɛ lɛ ga a woe ɔ. (Gal. 6:1) Ke wɔ nɛ a ngɛ ga woe nɛ wa susu kaa nɔ nɛ ngɛ wɔ ga a woe ɔ ko nyɛ ko gu blɔ kpa ko nɔ kɛ pee jã po ɔ, e sa nɛ waa ngɔ wa juɛmi kɛ ma ga womi ɔ nitsɛ nɔ. Wa ma nyɛ ma bi wa he ke: ‘Ke ye bua jɔɛ blɔ nɔ nɛ nɔ ɔ gu kɛ wo mi ga a he po ɔ, anɛ nɔ́ ko ngɛ nɛ ma nyɛ ma kase ngɛ ga womi ɔ mi lo? Anɛ ma nyɛ ma je ye juɛmi ngɛ nɔ nɛ ngɛ mi ga a woe ɔ e fã tɔmihi a nɔ nɛ ma kase nɔ́ ko kɛ je ga womi ɔ mi lo?’ Ke a wo wɔ ga a, níle ngɛ mi kaa wa maa hyɛ nɔ́ nɛ wa ma nyɛ maa kase ngɛ mi nɛ wa kɛ tsu ní.​—Abɛ 15:31.

w01 5/15 30 ¶1-2

‘Nile Ma Ha Nɛ Wa Ligbi Ɔmɛ Maa Hiɛ Babauu’

Ke a kã ní lelɔ hɛ mi ɔ, e kplɛɛɔ nɔ, se ke a kã he fɛu yelɔ hɛ mi ɔ, e be nɔ kplɛɛe kulaa. Salomo de ke: “Mo kã ní lelɔ hɛ mi, nɛ e maa suɔ mo. Tsɔɔ ní lelɔ ní, nɛ e maa le ní wawɛɛ.” (Abɛ 9:8b, 9a) Ní lelɔ le kaa “tsɔsemi ko be nɛ amlɔ nɔuu ɔ, wa naa lɛ kaa e ji bua jɔmi nɔ́, mohu ɔ, e yeɔ nɔ; se pee se ɔ, e woɔ tue mi jɔmi yiblii nɛ ji dami kɛ haa ni nɛmɛ nɛ a gu nɔ kɛ tsɔɔ mɛ ní ɔ.” (Hebri Bi 12:11) Eko ɔ, wa maa na ga womi nɛ a kɛ ha wɔ ɔ kaa nɔ́ ko nɛ yeɔ nɔ loo e he wa mohu lɛɛ, se ke e ma ha nɛ waa pee ní lelɔ ɔ, lɛɛ mɛni he je nɛ e sa nɛ wa mi mi nɛ fu aloo waa ngɔ níhi kɛ je wa nya?

Matsɛ ní lelɔ ɔ tsa e munyu ɔ nɔ ke: “Tsɔɔ dalɔ ní, nɛ e maa le ní kɛ piɛɛ e nile ɔ he.” (Abɛ 9:9b) Nɔ ko be nɛ e le nɔ́ fɛɛ nɔ́ loo e wa tsɔ nɛ ma de ke e be ní kasemi nya he. Hyɛ bɔ nɛ e ngɛ bua jɔmi ha kaa nihi nɛ a wa ngɛ jeha mi po ngɛ anɔkuale ɔ nɔ kplɛɛe nɛ a ngɛ a he nɔ jɔɔe ha Yehowa ngɛ a bwɔmi si! Nyɛ ha nɛ wɔ hu waa fia wa pɛɛ si kaa wa maa hɛɛ suɔmi nɛ wa ngɛ kaa wa maa kase ní ɔ mi, konɛ waa kɛ ní kpakpahi nɛ hi wa juɛmi ɔ mi woe be fɛɛ be.

w01 5/15 30 ¶5

‘Nile Ma Ha Nɛ Wa Ligbi Ɔmɛ Maa Hiɛ Babauu’

E ji wɔ nitsɛmɛ wa blɔ nya ní tsumi kaa wa maa bɔ mɔde wawɛɛ konɛ wa ná juɛmi. Salomo ma bɔ nɛ enɛ ɔ he hia ha a nɔ mi ke: “Ke o pee ní lelɔ ɔ, mo nitsɛ lɛ o ma ná ní nɛ o le ɔ he se, se ke o ji he fɛu yelɔ ɔ, mo pɛ lɛ o maa na e mi nɔ́.” (Abɛ 9:12) Ní lelɔ náa lɛ nitsɛ e nile ɔ he se, nɛ nɔ he fɛu yelɔ naa e he fɛu yemi ɔ mi nɔ́, lɔ ɔ, e maa tloo lɛ nitsɛ e tlomi. Niinɛ, nɔ́ nɛ wa du ɔ, lɔ ɔ wa ma kpa. Enɛ ɔ he ɔ, nyɛ ha nɛ waa “bu juɛmi munyu tue.”​—Abɛ 2:2.

Ngmami ɔ Mi Junehi

w23.06 22-23 ¶9-10

Yaa Nɔ Nɛ O Ye Mawu Gbeye Konɛ O Ná He Se

⁹ Wa ngɛ yi mi tomi kpakpahi fuu a he je nɛ e sa nɛ waa yu wa he ngɛ ajuama bɔmi he. Ngmami ɔ tsɔɔ kaa “yo kuasia” a ngɛ dee ke: “Nyu jujui ngɔɔ.” Mɛni ji jamɛ a “nyu jujui” ɔ? Baiblo ɔ ngɔ bɔmi nami mi ní peepeehi nɛ nihi nɛ a sɛ gba si himi mi ɔ kɛ a he woɔ mi ɔ kɛ to nyu nɛ haa nɔ bua jɔmi ɔ he. (Abɛ 5:15-18) Nyumu kɛ yo nɛ a sɛ gba si himi mi ɔ ngɛ he blɔ nɛ a kɛ a he náa bɔmi. Ngɛ anɔkuale mi ɔ, enɛ ɔ ngɛ slɔɔto kulaa ngɛ “nyu jujui” he. Nyu jujui tsɔɔ bɔmi nami nɛ Yehowa kplɛɛ we nɔ. Nihi nɛ a kɛ a he woɔ jamɛ a ní peepee ɔ mi ɔ peeɔ jã ngɛ laami mi kaa bɔ nɛ julɔ juɔ ngɛ laami mi ɔ. E ma nyɛ maa pee kaa nɔ́ nɛ “nyu jujui” nɛ ɔ ngɔɔ ke ji kaa nihi nɛ a pee jã a susu kaa a ye a he nɛ nɔ ko nɔ ko be lee. Se e ji susumi nɛ dɛ! Yehowa naa níhi tsuo. Ngɛ anɔkuale mi ɔ, ke Yehowa kua nɔ ko ɔ, e ngɛ dɔmi wawɛɛ, nɛ e pi nɔ́ ko nɛ e “ngɔɔ” kulaa, mohu ɔ, e duɔ wawɛɛ. (1 Kor. 6:9, 10) Se pi lɔ ɔ pɛ.

¹⁰ Ke nɔ ko ya bɔ ajuama a, e ma nyɛ ma ha nɛ e hɛ mi nɛ pue si, nɛ e maa nu he kaa e he be se nami po. Jehanɛ se hu ɔ, e ma nyɛ ma ha nɛ nɔ ɔ nɛ ngɔ hɔ be mi nɛ e hyɛ we blɔ, nɛ e ma nyɛ ma puɛ wekuhi a kpɛti hulɔ. E ngɛ heii kaa nile ngɛ mi kaa wa ma kua yo kuasia a nine fɔmi ɔ. Jehanɛ hu ɔ, ke nɔ ko kɛ e he wo ajuama bɔmi mi ɔ, pi huɛ bɔmi nɛ ngɛ e kɛ Yehowa a kpɛti ɔ pɛ nɛ ma puɛ, e ma nyɛ maa nu gbenɔ hiɔ komɛ po. (Abɛ 7:23, 26) Abɛ yi 9 kuku 18 ɔ mwɔ nya ke: “Nihi tsuo nɛ ya sɛ e we ɔ mi ɔ, a wuhi a he je momo ngɛ gbeje.” Ke jã a, lɛɛ mɛni he je mɔ nɛ nihi fuu kplɛɛɔ yo kuasia a nine fɔmi ɔ nɔ nɛ a ngɔɔ haomihi babauu kɛ baa a nɔ ɔ?​—Abɛ 9:13-18.

APRIL 21-27

JUETLI NƐ NGƐ MAWU MUNYU Ɔ MI | ABƐ 10

Mɛni Ma Ha Nɛ Nɔ Ko Ma Ná Bua Jɔmi Nitsɛnitsɛ Ngɛ Si Himi Mi?

w01 7/15 25 ¶1-3

‘Dalɔ Nɔ́ Ji Jɔɔmi’

Dalɔ náa jɔɔmi ngɛ blɔ kpa ko hu nɔ. “Nɔ nɛ peeɔ hejɔ ɔ maa ye ohia, se nɔ nɛ tsuɔ ní wawɛɛ ɔ ma ná ní. Bi nɛ kɔɔ nɔ́ se buaa ngmɔ ní nya ngɛ mawulɛ be mi, se bi nɛ hwɔɔ mahe pɔ̃pɔ̃ɔ̃pɔ̃ ngɛ ní kpami be mi ɔ hɛ mi ma pue si.”​—Abɛ 10:4, 5.

Nɔ́ ko nɛ he ngɛ se sami wawɛɛ ji munyuhi nɛ matsɛ ɔ tu kɛ tsɔɔ ní tsuli nɛ e maa ye bua mɛ ngɛ ní kpami be mi. Pi ní kpami be ɔ ji be nɛ́ a kɛ peeɔ hejɔ. E ji be nɛ e sa kaa a kɛ ngmlɛfia fuu nɛ tsu ní kɛ hɛdɔ. Niinɛ, e ji be nɛ e sa kaa a kɛ oya yemi nɛ tsu ní.

Yesu de e kaseli ɔmɛ ke: “Ní nɛ a ma kpa a hiɛ, se ní tsuli ɔmɛ a he pi. Enɛ ɔ he ɔ, nyɛ kpa Ngmɔtsɛ ɔ [Yehowa Mawu] pɛɛ konɛ e wo ní tsuli blɔ nɛ a ba kpa ní ha lɛ.” (Mateo 9:35-38) Pi ngma nɛ a ma kpa he munyu nɛ Yesu ngɛ tue ɔ, se mohu nimli. Ngɛ jeha 2000 ɔ mi ɔ, nihi nɛ a he hiɛ pe ayɔ 14 sɔuu ya Yesu gbenɔ Kaimi ɔ​—yibɔ nɛ ɔ hiɛ pe Yehowa Odasefohi a yibɔ nɛ́ bɔ he si enyɔ. Mɛnɔ ma nyɛ maa je he atsinyɛ kaa ‘ngmɔ ɔmɛ hiɛ futaa nɛ e sa kaa a kpa a nɔ ní’? (Yohane 4:35) Anɔkuale jali kpaa Ngmɔtsɛ ɔ pɛɛ konɛ e wo ní tsuli fuu blɔ kɛ ba tsu ní be mi nɛ mɛ nitsɛmɛ a ngɛ a sɔlemi ɔ nya ní tsue kɛ gu kã nɛ a kɛ ngɛ kaselɔ peemi ní tsumi ɔ tsue ɔ nɔ. (Mateo 28:19, 20) Nɛ Yehowa jɔɔ e mɔde bɔmi ɔ nɔ wawɛɛ! Ngɛ jeha 2000 sɔmɔmi jeha a mi ɔ, a baptisi nihi nɛ a hiɛ pe 280,000. Nimli nɛ ɔmɛ hu fia a pɛɛ si kaa a maa tsɔɔ nihi Mawu Munyu ɔ. Nyɛ ha nɛ waa ngɔ wa he kɛ wo ní kpami be nɛ ɔ mi vii konɛ wa ná bua jɔmi nɛ ngɛ kaselɔ peemi ní tsumi ɔ mi ɔ eko.

w01 9/15 24 ¶3-4

Moo Nyɛɛ Ngɛ ‘Dami Blɔ ɔ Nɔ’

Salomo tsɔɔ se nami nɛ ngɛ dami ní peemi he. E de ke: “Niatsɛ níhi nɛ a he jua wa a ji e ma nɛ e fia gbogbo wo he. Nɔ́ nɛ kpataa ohiatsɛmɛ a hɛ mi ji a we ohia a. Dalɔ ní peepee kɛ lɛ yaa wami mi; se yiblii nɛ yiwutsotsɛ woɔ ɔ kɛ lɛ yaa yayami mi.”​—Abɛ 10:15, 16.

Ke nɔ ko ngɛ ní ɔ, e ma nyɛ maa po e he piɛ kɛ je si himi ɔ mi nyagba komɛ nɛ a baa tlukaa a he, kaa bɔ nɛ ma nɛ a fia gbogbo kɛ wo he ɔ ma nyɛ maa po nihi nɛ a ngɛ mi ɔ a he piɛ ɔ. Nɛ ohia ma nyɛ ma ha nɛ níhi a mi nɛ wa wawɛɛ kɛ ha nɔ ko ke níhi nɛ a hyɛ we blɔ ɔ ba tlukaa. (Fiɛɛlɔ 7:12) Se kɛ̃ ɔ, ngɛ nɔ́ nɛ matsɛ ní lelɔ ɔ de nɛ ɔ nya a, e ngɛ oslaa nɛ́ ngɛ ní nami kɛ ohia tsuo he ɔ hu he munyu tue. E maa pee niatsɛ kaa é ngɔ e hɛ kɛ fɔ níhi nɛ e ngɛ ɔ nɔ kɛ e tsui tsuo, kɛ susumi ɔ kaa e níhi nɛ a he jua wa a “ngɛ kaa he piɛ pomi gbogbo.” (Abɛ 18:11) Nɛ ohiatsɛ hu ma nyɛ ma ná susumi nɛ dɛ kaa ohia si himi mi nɛ e ngɛ ɔ ha nɛ hɛ kɛ nɔ fɔmi ko be kɛ ha lɛ hwɔɔ se. Enɛ ɔ ma ha nɛ niatsɛ kɛ ohiatsɛ ɔ tsuo be biɛ kpakpa náe ngɛ Mawu hɛ mi.

it-1 340

Jɔɔmi

Yehowa Jɔɔ Adesahi. “Yehowa jɔɔmi lɛ peeɔ nɔ niatsɛ, nɛ e kɛ nɔ́ nami ko piɛɛ we he.” (Abɛ 10:22) Yehowa jɔɔ nihi nɛ e kplɛɛ a nɔ ɔ kɛ gu a he piɛ nɛ e poɔ, he jɔmi nɛ a náa, blɔ tsɔɔmi nɛ e kɛ haa mɛ, manye nɛ e haa a yeɔ ngɛ si himi mi kɛ a hiami níhi nɛ e haa mɛ ɔ nɔ, nɛ ní nɛ ɔmɛ a he baa se nami kɛ haa mɛ.

Ngmami ɔ Mi Junehi

w06 5/15 30 ¶18

Bua Jɔmi Nɛ Wa Náa Ke Wa Nyɛɛ Ngɛ Anɔkuale Yemi Mi

¹⁸ “Yehowa jɔɔmi” ji nɔ́ nɛ haa nɛ e we bi hiɔ si slɔkee nɛ huɛ bɔmi kpakpa hiɔ a kɛ lɛ a kpɛti. Nɛ wa ngɛ nɔ mi mami kaa “e kɛ nɔ́ nami ko piɛɛ we he.” (Abɛ 10:22) Lɛɛ mɛni he je nɛ Mawu we bi kɛ kahi fuu kpeɔ nɛ́ haa nɛ a naa nɔ́ ɔ? Waa kɛ haomihi kɛ nyagbahi kpeɔ ngɛ yi mi tomi titli etɛ komɛ a he je. (1) Yayami su nɛ ngɛ wa mi. (1 Mose 6:5; 8:21; Yakobo 1:14, 15) (2) Satan kɛ e daimonio ɔmɛ. (Efeso Bi 6:11, 12) (3) Je yaya nɛ ɔ. (Yohane 15:19) E ngɛ mi kaa Yehowa ngmɛɛ blɔ nɛ ní yayamihi baa mohu lɛɛ, se pi lɛ ji nɔ nɛ ngɔɔ ní yayamihi kɛ baa. Ngɛ anɔkuale mi ɔ, “Nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si ɔ jeɔ hiɔwe, e kpleɔ si kɛ jeɔ hiɔwe kane ɔmɛ a Tsɛ ɔ ngɔ.” (Yakobo 1:17) Nɔ́ nami piɛɛ we Yehowa jɔɔmi ɔmɛ a he.

APRIL 28–MAY 4

JUETLI NƐ NGƐ MAWU MUNYU Ɔ MI | ABƐ 11

Ko De!

w02 5/15 26 ¶4

Anɔkuale Yemi Tsɔɔ Dali Blɔ

Anɔkuale nɛ dali yeɔ, kɛ yiwutso ní nɛ yayami peeli peeɔ ɔ tsuo náa ni kpahi a nɔ he wami. Israel matsɛ ɔ de ke: “Hemi kɛ yemi kualɔ ngɔɔ e nya kɛ kpataa e nyɛmi nɔmlɔ hɛ mi, se nile lɛ a kɛ kpɔ̃ɔ dali.” (Abɛ 11:9) Nɔ he guɛ gbelɔ, nɔ nɛ yeɔ nihi a he sieku, nɔ nɛ tuɔ munyu sasɛ, kɛ nɔ nɛ tuɔ munyu puu ɔ yeɔ ni kpahi awi, nɛ nɔ ko be nyɛe maa je enɛ ɔ he atsinyɛ. Se dalɔ nya mi munyu he tsɔ, nɛ e susuɔ munyu ɔ kɛ ni kpahi a he saminya loko e tuɔ. Dalɔ ma ná kpɔmi kɛ gu e nile ɔ nɔ ejakaa anɔkuale nɛ e yeɔ he je ɔ, e maa ná odase nɛ tsɔɔ kaa munyu nɛ nihi tuɔ kɛ siɔ lɛ ɔ ji lakpa.

w02 5/15 27 ¶2-3

Anɔkuale Yemi Tsɔɔ Dali Blɔ

Ke nihi nɛ a ngɛ kpɔ ko loo ma ko mi ɔ peeɔ nɔ́ nɛ da a, lɔ ɔ haa nɛ tue mi jɔmi hiɔ nihi a kpɛti nɛ níhi yaa nɔ saminya ngɛ ma a mi. Enɛ ɔ haa nɛ ma a yaa nɔ saminya. Nihi nɛ a tuɔ munyu kɛ gbeɔ nihi a he guɛ, nɛ a tuɔ munyu nɛ yeɔ nɔ awi kɛ lakpa munyuhi ɔ, haa nɛ basabasa peemi baa, nihi a mi gbaa, tue mi jɔmi laa, nɛ e ngɔɔ nyagbahi kɛ baa. Nɛ enɛ ɔ yaa nɔ wawɛɛ titli ɔ, ke nihi nɛ a peeɔ jã a hɛɛ blɔ nya ngɛ kpɔ ɔ mi loo ma a mi. Enɛ ɔ haa nɛ níhi yɛ nɔ saminya ngɛ jamɛ a ma a mi, a peeɔ ní yayamihi fuu, nɛ enɛ ɔ ma nyɛ ma ha nɛ ma a sika he blɔ nya tomi nɛ puɛ.

Sisi tomi mlaa nɛ ngɛ Abɛ 11:11 ɔ kɔɔ Yehowa we bi hu a he jã nɔuu ke a bua a he nya ngɛ a we asafo ɔmɛ a mi. Asafo nɛ nihi nɛ a ngɛ mi ɔ wa ngɛ mumi mi​—nɛ ji dali nɛ a haa nɛ a we anɔkuale yemi tsɔɔ mɛ blɔ, nɛ́ a náa ni kpahi a nɔ he wami ɔ, ba peeɔ asafo nɛ ngɛ kã kɛ bua jɔmi, nɛ a woɔ Mawu hɛ mi nyami. Yehowa jɔɔ asafo kaa jã, nɛ e waa ngɛ mumi mi. Eko ɔ, nihi bɔɔ komɛ ngɛ asafo ɔ mi nɛ a ji nihi nɛ nɔ́ muɛ a hɛ, nɛ́ a hlaa tɔmi ngɛ níhi a he, nɛ́ a tuɔ munyu nyanyaanya kɛ siɔ bɔ nɛ níhi yaa nɔ ha ngɛ asafo ɔ mi ɔ. Jamɛ a ni ɔmɛ ngɛ kaa “sipoku duɔtsɛ” nɛ́ e haa si, nɛ e ma nyɛ maa ngɔ e duɔ ɔ kɛ sã ni kpahi. (Hebri Bi 12:15) Nihi kaa jã a hlaa hɛ mi nyami kɛ blɔ nyahi ngɛ asafo ɔ mi. A gbɛɛ akeake munyuhi kɛ fĩaa kaa a yi dami sane, a haa nɛ nihi náa nihi nɛ a je wɛtso kpahi a mi ɔ a he ninyɛ, kɛ ní kpahi kaa jã ngɛ asafo ɔ mi. Niinɛ, a nya mi munyu ma nyɛ maa ngɔ mi gbami kɛ ba asafo ɔ mi. Mɛni he je po nɛ e sa kaa waa bu nihi kaa jã a munyu ɔmɛ tue? E sa nɛ waa pee nihi nɛ a wa ngɛ mumi mi, nɛ́ waa pee nihi nɛ a ma ha nɛ tue mi jɔmi kɛ kake peemi nɛ hi asafo ɔ mi.

w02 5/15 27 ¶5

Anɔkuale Yemi Tsɔɔ Dali Blɔ

Nɔ nɛ e nyɛ we nɛ e mwɔɔ yi mi kpɔhi nɛ da aloo nɔ nɛ e “be tsui nɛ nuɔ nɔ́ sisi” ɔ ní peepee yeɔ ni kpahi awi wawɛɛ! Akɛnɛ e yaa nɔ nɛ e tuɔ munyu nɛ sɛ he je ɔ, lɔ ɔ haa nɛ e tuɔ he guɛ gbemi aloo jɛmi munyuhi. E sa nɛ asafo mi nikɔtɔmahi kɛ oya yemi nɛ tsu sane kaa jã he ní konɛ e ko ná ni kpahi a nɔ he wami. Nɔ nɛ e kɔɔ nɔ́ se ɔ be kaa nɔ nɛ e “be tsui nɛ nuɔ nɔ́ sisi” ɔ, ejakaa nɔ nɛ kɔɔ nɔ́ se ɔ le be nɛ e sa kaa e pee dii. E je we laami sane kpo. Akɛnɛ nɔ nɛ e kɔɔ nɔ́ se ɔ le kaa lilɛ nɛ a kudɔɔ we lɛ ɔ ma nyɛ maa ngɔ haomihi fuu kɛ ba he je ɔ, e bɔɔ mɔde kaa e maa pee nɔ nɛ a ma nyɛ maa fĩa kɛ fɔ e nɔ loo “nɔ nɛ e yeɔ anɔkuale ngɛ mumi mi.” E yeɔ e nyɛmimɛ nyumuhi kɛ yihi anɔkuale, nɛ e je we a laami sanehi kpo nɛ́ lɔ ɔ ba ye mɛ awi. Nihi kaa kikɛ nɛ́ a ngɛ asafo ɔ mi ɔ ji jɔɔmi kɛ ha asafo ɔ!

Ngmami ɔ Mi Junehi

g20.1 11, daka

Bɔ Nɛ O Ma Plɛ Kɛ Da Yeyeeye Peemi Nya Ha

“KE O JEƆ MI MI JƆMI KPO Ɔ, LƆ Ɔ BE HAE NƐ O PEE YEYEEYE”

“Nɔ nɛ e mi mi jɔ ɔ, lɛ nitsɛ e náa he se, se nɔ nɛ e yi mi wa ngɔɔ haomi kɛ baa lɛ nitsɛ e nɔ.”​—ABƐ 11:17.

Womi nɛ ji Overcoming Stress ɔ hɛɛ munyuyi ko nɛ ji “Kill Your Stress with Kindness” (Ke O Jeɔ Mi Mi Jɔmi Kpo ɔ, Lɔ ɔ Be Hae Nɛ O Pee Yeyeeye). Nɔ nɛ ngma womi nɛ ɔ nɛ a tsɛɛ lɛ, Dr. Tim Cantopher a tsɔɔ kaa, ke o kɛ ni kpahi yeɔ ngɛ mi mi jɔmi mi ɔ, lɔ ɔ ma nyɛ ma ha nɛ o ná nɔmlɔ tso mi he wami kɛ bua jɔmi. Se nɔ nɛ e je we mi mi jɔmi kpo loo e yi mi wa a be bua jɔmi ejakaa be fɛɛ be ɔ, e tsɔ e he kɛ je ni kpahi a he.

Ke wɔ hu waa kɛ ni kpahi yeɔ ngɛ mi mi jɔmi mi ɔ, lɔ ɔ be hae nɛ waa pee yeyeeye loo waa hao. Kaa nɔ hyɛmi nɔ́ ɔ, e sɛ nɛ waa hyɛ níhi fuu loo níhi nɛ wa be nyɛe maa su he ɔ blɔ kɛ je wɔ nitsɛmɛ wa dɛ. Nɛ e sɛ nɛ waa nu he kaa wa he hia we loo se nami ko be wa he. Yesu Kristo de ke: “E sa nɛ o suɔ o nyɛmi kaa bɔ nɛ o suɔ o he ɔ.”​—Maako 12:31.