Anɛ Bɔfohi Ma Nyɛ Maa Ye Bua Mo Lo?

Hɔgba piani ko ɔ, Kenneth kɛ Filomena nɛ a ngɛ Curaçao ya slaa weku ko nɛ a kɛ mɛ kaseɔ Baiblo ɔ.

Kenneth de ke, “benɛ wa su we ɔ mi ɔ, wa nɛ nɔ ko, a nga sinya a nɛ lɔle ɔ hu be we ɔ mi. Se nɔ́ ko de mi ke ma fia yo ɔ ngɛ tɛlifoo nɔ.”

Benɛ Kenneth fia yo ɔ, e he nɔ nɛ e tsɔɔ kaa e huno ɔ ho ní tsumi ya. E yɔse kaa Kenneth kɛ Filomena ngɛ we ɔ mi. Kɛkɛ nɛ e ba bli sinya a oya nɔuu nɛ e tsɛ mɛ kɛ sɛ tsu ɔ mi.

Kenneth kɛ Filomena to he hɛ kaa yo ɔ ngɛ ya foe loko e ba bli sinya a. Benɛ Kenneth sɔle konɛ a je ní kasemi ɔ sisi ɔ, yo ɔ bɔni ya fomi ekohu. Lɔ ɔ he ɔ, a bi lɛ nɔ́ he je nɛ e ngɛ ya foe.

Yo ɔ de mɛ ke, jinɛ e ma e he gbemi jamɛ a piani ɔ. Lɔ ɔ he ɔ, e ngɛ sɛ womi ngmae kɛ fɔ si ha e huno ɔ loko Kenneth kɛ fia a nɛ. E de mɛ ke e hao nɛ e pee yeyeeye. Kɛkɛ nɛ a kane bua womi munyu ko ngɛ Baiblo ɔ mi kɛ wo e bua. Bua womi munyu nɛ a kane ha lɛ ɔ ye bua lɛ wawɛɛ.

Kenneth de ke, “wa naa Yehowa si kaa e ha nɛ wa ye bua yo nɛ ɔ. Eko ɔ, e gu bɔfo loo E mumi klɔuklɔu ɔ nɔ kɛ wo wɔ he wami nɛ wa fia yo ɔ ngɛ be nɛ sa mi.”a

Anɛ e da kaa Kenneth kɛ Filomena ma de ke Mawu nɛ ye bua mɛ kɛ gu e bɔfo ko loo E mumi klɔuklɔu ɔ nɔ lo? Aloo e fia yo ɔ ngɛ be nɛ sa mi kɛkɛ?

Wa be nyɛe maa tsɔɔ. Se nɔ́ nɛ wa le ji Mawu guu e bɔfo ɔmɛ a nɔ kɛ yeɔ bua nihi ngɛ e jami mi. Kaa nɔ hyɛmi nɔ́ ɔ, Baiblo ɔ tsɔɔ kaa Mawu ha nɛ bɔfo ko tsɔɔ sane kpakpa fiɛɛlɔ Filipo blɔ nɛ e ya ye bua Ethiopia ma nɔkɔtɔma nɛ e ngɛ Mawu jami mi blɔ tsɔɔmi hlae ɔ.​—Bɔfo Ɔmɛ A Ní Tsumi 8:26-31.

Jamihi fuu woɔ nihi he wami konɛ a ná hemi kɛ yemi ngɛ mumi mi adebɔ níhi a mi. A tsɔɔ kaa mumi mi adebɔ ní nɛ ɔmɛ ekomɛ a mi mi jɔ nɛ a tsuɔ Mawu yi mi tomihi a he ní nɛ wa náa he se, nɛ ekomɛ hu buɔ wa he. Pi nɛ nihi he ye kaa bɔfohi ngɛ pɛ kɛkɛ, se mohu a he ye kaa a yeɔ bua wɔ ngɛ blɔ klɛdɛɛ komɛ a nɔ.

Anɛ bɔfohi ngɛ niinɛ lo? Ke a ngɛ ɔ, lɛɛ jije a je kɛ ba? Mɛni ji anɔkuale nɛ kɔɔ bɔfohi a he? A ma nyɛ maa ye bua mo lo? Mo ha nɛ waa hyɛ.