Sane Bimi He

◼ Mɛnɔ nɛ e sa kaa e ngma womi nɔ ní loo e gu Internet ɔ nɔ kɛ bi kaa Odasefoli nɛ a ba slaa lɛ loo a mane lɛ womi?

Behi fuu ɔ, a siɔ blɔ ngɛ wa womi ɔmɛ a se konɛ ke nɔ ko suɔ kaa a mane lɛ womi loo Yehowa Odasefono ko nɛ e ba slaa lɛ ɔ, nɔ ɔ nɛ e ngma nɔ ní kɛ mane asafo ɔ nítsumi he kɔni ɔ. Jehanɛ se hu ɔ, nihi ma nyɛ maa gu Internet nɔ ngɛ www.watchtower.org ɔ kɛ bi konɛ a kɛ mɛ nɛ kase Baiblo ɔ. Blɔ nya tomi nɛ ɔ ngɛ nihi babauu ye buae nɛ a ngɛ anɔkuale ɔ kasee. Se blɔ nɛ ɔ nɔ nɛ fiɛɛli komɛ guu kɛ toɔ blɔ nya konɛ a kɛ ye bua a wekuli loo ni kpahi nɛ a kase Baiblo ɔ kɛ haomi baa.

Ni komɛ nɛ a bi we ke asafo ɔ nítsumi he kɔni ɔ nɛ mane mɛ womi se asafo ɔ nítsumi he kɔni ɔ maneɔ mɛ womi ɔ tuɔ munyu kɛ siɔ asafo ɔ, nɛ a susuɔ kaa asafo ɔ ngɛ mɛ haoe ngɛ a biɛhi nɛ asafo ɔ kɛ piɛɛ nihi nɛ e maneɔ mɛ womi daa a he ɔ heje. Fiɛɛli nɛ a jeɔ mɛ kaa a ya slaa nɔ ko be mi nɛ nɔ ɔ de we ke Odasefoli nɛ ba slaa lɛ ɔ, ke a ya nɛ nɔ ɔ mi mi fu ɔ, a hɛ mi peeɔ mɛ yaa. Enɛ ɔ he ɔ, ke nɔ ko suɔ kaa a mane lɛ womi loo a kɛ lɛ nɛ ba kase Baiblo ɔ, e sa nɛ nɔ ɔ nitsɛ nɛ e ngma womi ɔ nɔ ní loo e gu Internet ɔ nɔ kɛ bi. Fiɛɛlɔ ko nɛ́ e ko pee lɔɔ kɛ ha nɔ ɔ. Ke wa yɔse kaa pi nɔ ɔ nitsɛ nɛ e ngma ní ɔ se nɔ ko nɛ e ngma kɛ ha lɛ ɔ, wa tsu we he ní.

Lɛɛ mɛni blɔ nɔ wa maa gu kɛ ye bua wa wekuli loo nihi nɛ wa le mɛ ɔ konɛ a kase Baiblo ɔ? Ke o suɔ nɛ e nine nɛ su womi ko nɔ ɔ, mɛni heje nɛ mo nitsɛ o kɛ mane we lɛ tɛɛ? Ke e bua jɔ anɔkuale ɔ he nɛ e suɔ nɛ Odasefoli nɛ a ba slaa lɛ, se o li bɔnɛ o maa pee nɛ o nine maa su asafo mi nikɔtɔmahi nɛ a ngɛ asafo nɛ ngɛ e kpɔ ɔ mi ɔ mi ɔ a nɔ ɔ, moo ngma Please Follow Up (S-43) womi ɔ nɔ ní nɛ o kɛ ha o we asafo ɔ mi womi ngmalɔ ɔ, e maa hyɛ nɛ e kɛ maa mane asafo ɔ nítsumi he kɔni ɔ. Se ke nɔ nɛ ngɛ munyu ɔ he bua jɔmi ɔ ji nɔ ko nɛ a wo lɛ tsu, loo nɔ nɛ a tsi e nya ngɛ hiɔ tsami he, loo he ko nɛ a tsiɔ nihi nɛ a kɛ tsopa yaya tsuɔ ní a nya ngɛ ɔ, nyɛ ko da e nane mi kɛ bi asafo ɔ nítsumi he kɔni ɔ nɔ́ ko kɛ ha lɛ. Mohu ɔ, nyɛ ma nyɛ maa wo lɛ he wami konɛ e na nyɛmimɛ nɛ a ya fiɛɛɔ ngɛ lejɛ ɔ loo lɛ nitsɛ e ngma kɛ ha asafo ɔ nítsumi he kɔni ɔ.