Sane Bimi He
◼ Anɛ e sa nɛ fiɛɛli nɛ a puɛ be babauu kɛ ye nihi odase ngɛ Intanɛti ɔ nɔ lo? Anɛ e sa nɛ a kɛ nihi nɛ a li mɛ nɛ a ngɛ ma se nɛ kase Baiblo ɔ lo?
Kɛ gu Intanɛti ɔ nɔ ɔ, fiɛɛli komɛ ná Baiblo mi ní kaseli ngɛ mahi nɛ a tsi wa ní tsumi ɔ nya ngɛ a mi, aloo ngɛ mahi nɛ fiɛɛli a he pi ngɛ mi ɔ a nɔ. Be komɛ ɔ, e woɔ yiblii. Se oslaa ngɛ he kaa fiɛɛli kɛ nihi nɛ a li mɛ maa sɛɛ ní, aloo a maa mane mɛ sɛ gbi kɛ gu Intanɛti ɔ nɔ. (Hyɛ July 2007 Wa Matsɛ Yemi Sɔmɔmi ɔ bf. 3.) E ngɛ mi kaa yi mi tomi ɔ ji kaa a kɛ nɔ ko nɛ e bua jɔ Matsɛ Yemi sɛ gbi ɔ he ɔ maa kase ní ngɛ Intanɛti ɔ nɔ mohu lɛɛ, se ní sɛɛmi kaa jã a ma nyɛ ma ha nɛ a kɛ nihi nɛ a be je mi bami kpakpa, aloo hemi kɛ yemi kuali maa bɔ. (1 Kor. 1:19-25; Kol. 2:8) Jehanɛ hu ɔ, ngɛ hehi nɛ a tsi wa ní tsumi ɔ nya ngɛ ɔ, ma nikɔtɔma amɛ ma nyɛ maa le níhi nɛ waa kɛ nihi sɛɛɔ, kɛ munyuhi nɛ waa kɛ maneɔ ngɛ Intanɛti ɔ nɔ ɔ. Enɛ ɔ ma nyɛ maa ngɔ wa nyɛmimɛ nɛ a ngɛ jamɛ a ma amɛ a mi ɔ kɛ wo sane mi. Lɔ ɔ he ɔ, e sɛ nɛ fiɛɛlɔ ko nɛ ya Intanɛti ɔ nɔ kaa e yaa hla nɔ ko ngɛ ma kpa nɔ nɛ e kɛ lɛ maa kase Baiblo ɔ.
Ke wa ye nubwɔ ko nɛ e je ma se odase, nɛ e kpale kɛ ho e ma mi ya a, e sɛ nɛ waa bɔ mɔde kaa waa kɛ lɛ maa hi ní sɛɛe, lɛɛ jã asafo ɔ ní tsumi kɔni ɔ ha wɔ he blɔ. Mohu ɔ, wa ma nyɛ maa tsɔɔ lɛ bɔ nɛ e maa pee ha nɛ e nine maa su wa he sanehi fuu nɔ ngɛ jw.org, aloo asafo ní tsumi kɔni nɛ ngɛ ma nɛ e je mi ɔ nɔ. Wa ma nyɛ maa wo lɛ he wami kaa ke e kpale kɛ ho ɔ, e bɔ mɔde nɛ e ya wa Matsɛ Yemi Asa nɛ ngɛ e kpɔ ɔ mi ɔ nɔ. Ngɛ anɔkuale mi ɔ, ma komɛ ngɛ nɛ Matsɛ Yemi Asa ko be a nɔ. Se ke e suɔ nɛ Odasefo no ko nɛ ngɛ e kpɔ ɔ mi nɛ ba slaa lɛ ɔ, lɛɛ e sa nɛ waa ngma Please Follow Up (S-43) womi ɔ nɔ ní, nɛ wa kɛ ha asafo womi ngmalɔ ɔ konɛ e kɛ mane ngɛ jw.org nɔ. Asafo ní tsumi kɔni nɛ hyɛɛ fiɛɛmi ní tsumi ɔ nɔ ngɛ nɔ ɔ ma a mi ɔ le si fɔfɔɛ pɔtɛɛ nɛ ngɛ lejɛ ɔ, nɛ mɛ lɛ a ma nyɛ maa ye kɛ bua lɛ.—Hyɛ June 2014 Wa Matsɛ Yemi Sɔmɔmi ɔ bf. 7, kɛ November 2011 Wa Matsɛ Yemi Sɔmɔmi ɔ bf. 2.
Ke nɔ ko nɛ waa kɛ lɛ ngɛ ní kasee amlɔ nɛ ɔ hia kɛ ho ma se ya, aloo waa kɛ nɔ ko kaseɔ ní amlɔ nɛ ɔ ngɛ Intanɛti ɔ nɔ ɔ, e sa nɛ waa ngɔ blɔ tsɔɔmi nɛ a kɛ ha ngɛ kukuhi nɛ sɛ hlami ɔ mi ɔ kɛ tsu ní. Se kɛ̃ ɔ, o ma nyɛ maa ya nɔ nɛ o ye bua lɛ kɛ ya si be nɛ fiɛɛlɔ ko nɛ ngɛ he nɛ e ngɛ ɔ ma ya slaa lɛ. Ke waa kɛ nɔ ko nɛ e ngɛ ma ko nɛ a tsi wa ní tsumi ɔ nya ngɛ mi ma susu Baiblo mi sanehi a he kɛ gu sɛ womi ngmami nɔ, loo tɛlifoo nɔ, loo Intanɛti ɔ nɔ ɔ, e sa nɛ waa hyɛ nɛ hi.—Mat. 10:16.