Anɛ O Le Lo?

Mɛni he je nɛ blema Israel bi ɔmɛ woɔ yo he ní tsumi nya sika a?

BLEMA A, nyumu nɛ yaa ngɔ yo loo nyumu ɔ weku li woɔ yo he ní tsumi nya sika kɛ haa yo ɔ weku li ke weku enyɔ ɔmɛ tsuo kplɛɛ gba a nɔ. Yo he ní tsumi nya sika ma nyɛ maa pee nɔ́ ko nɛ he jua wa, lohwehi, loo sika nitsɛ. Be komɛ ɔ, nyumu ɔ nɛ yaa ngɔ yo ɔ ya tsuɔ ní kɛ toɔ nane mi. Jã nɛ e ba ngɛ Yakob blɔ fa mi. E kplɛɛ nɔ kaa e ma tsu ní ha Rahel papaa jeha kpaago konɛ e ngɔ Rahel kɛ ha lɛ kaa e yo. (1 Mose 29:17, 18, 20) Mɛni he je nɛ a woɔ yo he ní tsumi nya sika a?

Baiblo he ní lelɔ ko nɛ a tsɛɛ lɛ ke Carol Meyers de ke: “Yo nɛ a yaa tsu e he ní ɔ weku li ma nyɛ maa ngɔ yo he ní tsumi nya sika a kɛ da ní tsumi nɛ jinɛ a biyo ɔ tsuɔ ɔ nane mi. Enɛ ɔ he hia wawɛɛ kɛ ha wekuhi nɛ a huɔ ngmɔ loo a lɛɛ lohwehi.” Jehanɛ hu ɔ, yo he ní tsumi nya sika nɛ a haa a yeɔ bua nɛ huɛ bɔmi kpakpa hiɔ weku enyɔ ɔmɛ a kpɛti. Weku enyɔ nɛ ɔmɛ ma nyɛ maa ye bua a sibi ngɛ behi nɛ a mi wa mi. Jehanɛ hu ɔ, a woɔ yo he ní tsumi nya sika kɛ tsɔɔ kaa a maa ngɔ yo nɛ a bi e si momo ɔ kɛ je e tsɛ ɔ he bumi kɛ e nɔ hyɛmi sisi kɛ ho e huno ɔ sisi ya.

Ke a ha yo he ní tsumi nya sika ngɛ yo ko he ɔ, lɔ ɔ tsɔɔ we kaa a jua lɛ loo e huno ɔ he lɛ. Womi nɛ ji Ancient Israel​—Its Life and Institutions ɔ de ke: “Ngɛ blema Israel ɔ, ke a ha sika ko kaa jã loo a ha nɔ́ kpa ko ngɛ yo ɔ he kɛ ha yo ɔ weku li ɔ, e peeɔ kaa nɔ́ nɛ a he yo ɔ. Se e ngɛ kaa nɔ́ nɛ a kɛ yo he ní tsumi nya sika a toɔ ní tsumi nɛ jinɛ a bi ɔ ma tsu ɔ nane mi, se pi nɛ a woɔ nɛ a kɛ he yo ɔ.”

Mwɔnɛ ɔ, ngɛ ma komɛ a nɔ ɔ, nihi woɔ yo he ní tsumi nya sika loloolo. Ke fɔli nɛ a ji Kristofohi maa ngɔ yo he ní tsumi nya sika a, e sa nɛ a hyɛ nɛ e ko hiɛ tsɔ. Ke a pee jã a, lɔ ɔ ma ‘ha nɛ nihi tsuo maa le kaa a susuɔ nɔ́ he.’ (Filip. 4:5; 1 Kor. 10:32, 33) Kɛ gu jã peemi nɔ ɔ, a tsɔɔ kaa a pi “sika suɔli” nɛ a hɛ hu kɔɛ. (2 Tim. 3:2) Jehanɛ hu ɔ, ke fɔli nɛ a ji Kristofohi bi we sika nɛ hiɛ tsɔ loo níhi fuu ɔ, e be bae kaa nyumu ɔ maa tsɛ̃ gba si himi ɔ kɛ to kɛ ya si be nɛ e ma ná jamɛ a sika ngua a nɛ e kɛ ma ya tsu yo ɔ he ní. Aloo ke nyumu ɔ ji daa blɔ gbalɔ ɔ, e be bae kaa e maa ngmɛɛ blɔ gbami ní tsumi ɔ he nɛ e kɛ e be tsuo nɛ ya tsu ní bɔ nɛ pee nɛ e wo yo he ní tsumi nya sika ngua nɛ a bi kaa e wo ɔ.

Ngɛ ma komɛ a mi ɔ, ma a mlaa a lɛ tsɔɔ yo he ní tsumi nya sika abɔ nɛ nɔ ko nɛ wo. Fɔli nɛ a ji Kristofohi nɛ a ngɛ jamɛ a ma amɛ a nɔ ɔ yeɔ ma a mlaa a nɔ. Mɛni he je? Ejakaa Mawu Munyu ɔ hyɛɛ Kristofohi blɔ kaa a ‘ba a he si kɛ ha blɔ nyahi nɛ a nɔ kuɔ ɔ’ nɛ a ye mlaahi nɛ a ti si kɛ wui Mawu mlaa a nɔ.​—Rom. 13:1; Níts. 5:29.