“ Nyɛɛ Hɛɛ Mumi ɔ Kake Peemi ɔ Mi”
BƆFO Paulo wo Kristofohi nɛ a ngɛ Efeso ɔ he wami kaa a ya nɔ ‘nɛ a ná a sibi a he tsui ngɛ suɔmi mi, nɛ a bɔ mɔde wawɛɛ nɛ a hɛɛ mumi ɔ kake peemi ɔ mi ngɛ tue mi jɔmi nɛ fĩɔ mɛ kɛ peeɔ kake ɔ mi.’—Efe. 4:2, 3.
“Kake peemi” nɛ ngɛ wa kpɛti ɔ je ‘mumi ɔ mi.’ Enɛ ɔ tsɔɔ kaa kɛ gu Mawu he wami ɔ nɔ nɛ kake peemi nɛ ɔ hiɔ wa kpɛti. Se kaa bɔ nɛ Paulo de ɔ, e sa nɛ waa baa kake peemi nɛ ngɛ wa kpɛti ɔ yi. Enɛ ɔ he ɔ, e sa nɛ Kristofono fɛɛ Kristofono nɛ e pee e blɔ fami nɔ́ kɛ “hɛɛ mumi ɔ kake peemi ɔ mi.”
Moo ngɔ lɛ kaa nɔ ko he lɔle ehe kɛ ke mo. Mɛnɔ lɛ e sa kaa e hyɛ nɛ a dla lɔle ɔ be fɛɛ be? Heto ɔ ngɛ heii. Ke o hyɛ we lɔle ɔ nɔ saminya nɛ e puɛ ɔ, o be nyɛe ma pia nɔ nɛ e he lɔle ɔ kɛ ke mo ɔ.
Jã nɔuu kɛ̃ nɛ kake peemi nɛ ngɛ wa kpɛti ɔ ji nike ní nɛ je Yehowa ngɔ, se e ji wa blɔ nya ní tsumi kaa wa maa baa yi. Ke huɛ bɔmi kpakpa be waa kɛ wa nyɛmi Kristofono ko wa kpɛti ɔ, e sa nɛ wa bi wa he ke, ‘Anɛ i ngɛ ye blɔ fami nɔ́ pee konɛ ma hɛɛ mumi ɔ kake peemi ɔ mi kɛ gu i kɛ ye nyɛmi ɔ wa kpɛti nɛ wa ma dla a nɔ lo?’
MOO “BƆ MƆDE WAWƐƐ” NƐ O BAA KAKE PEEMI YI
Nɔ́ nɛ Paulo ngma a tsɔɔ kaa pi be fɛɛ be nɛ e ngɛ gbɔjɔɔ kaa waa kɛ wa nyɛmimɛ maa hi si ngɛ tue mi jɔmi mi, titli ke a kpɛti nɔ ko pee wɔ nɔdɔ nɔ́ ko. Se anɛ be fɛɛ be nɛ e sa nɛ o kɛ nɔ nɛ pee mo nɔdɔ nɔ́ ɔ nɛ tu nyagba a he munyu lo? Dɛbi. Mo bi o he ke, ‘Ke i kɛ lɛ sɛɛ nyagba a he ní ɔ, anɛ lɔ ɔ maa baa kake peemi nɛ ngɛ wa kpɛti ɔ yi aloo e ma puɛ sane ɔ kulaa?’ Be komɛ ɔ, nile ngɛ mi kaa wa ma ma wa hɛ kɛ fɔ nyagba a nɔ aloo waa kɛ nɔ ɔ tɔmi nɛ ke lɛ nɛ́ e he be hiae kaa waa kɛ lɛ nɛ sɛɛ nyagba a he ní.—Abɛ 19:11; Maak. 11:25.
Mo bi o he ke, ‘Ke i kɛ lɛ sɛɛ nyagba a he ní ɔ, anɛ lɔ ɔ maa baa kake peemi nɛ ngɛ wa kpɛti ɔ yi aloo e ma puɛ sane ɔ kulaa?’
Kaa bɔ nɛ bɔfo Paulo ngma a, nyɛ ha nɛ waa ya nɔ nɛ wa ‘ná wa sibi a he tsui ngɛ suɔmi mi.’ (Efe. 4:2) Womi ko de ke, a ma nyɛ maa tsɔɔ munyu nɛ ɔ sisi kaa nɛ “wa maa kplɛɛ nihi a nɔ kaa bɔ nɛ a ngɛ ɔ.” Enɛ ɔ tsɔɔ kaa wa kplɛɛ nɔ kaa wa nyɛmimɛ ɔmɛ yi mluku kaa wɔ nɔuu. Ngɛ anɔkuale mi ɔ, wa ngɛ mɔde bɔe kaa wa maa “wo su ehe ɔ.” (Efe. 4:23, 24) Se kɛ̃ ɔ, wa ti nɔ ko be nɛ e ma nyɛ maa wo su ehe ɔ kɛ pi si. (Rom. 3:23) Anɔkuale munyu nɛ ɔ nɛ maa hi wa juɛmi mi ɔ ma ha nɛ wa ná wa sibi a he tsui, nɛ waa ngɔ a tɔmihi kɛ ke mɛ. Jã nɛ wa maa pee ɔ maa ye bua wɔ konɛ waa “hɛɛ mumi ɔ kake peemi ɔ mi.”
Ke wa ya nɔ nɛ wa ngɔ ni kpahi a he yayami kɛ ke mɛ, nɛ wa je wa juɛmi ngɛ nɔ́ ɔ, lɔ ɔ ma ha nɛ waa baa ‘tue mi jɔmi nɛ fĩɔ wɔ kɛ peeɔ kake’ ngɛ asafo ɔ mi ɔ yi. A kɛ Hela munyungu nɛ a tsɔɔ sisi ngɛ Efeso Bi 4:3 ɔ kaa “fĩɔ nyɛ” ɔ hu tsu ní ngɛ Kolose Bi 2:19 ɔ mi kaa “wu nya pani.” Wu nya panihi ji nɔ́ ko nɛ he wa nɛ tsaa nɔmlɔ wuhi kɛ blaa. Jã nɔuu kɛ̃ nɛ tue mi jɔmi nɛ ngɛ waa kɛ wa nyɛmimɛ wa kpɛti, kɛ suɔmi nɛ wa ngɛ kɛ ha mɛ ɔ haa nɛ huɛ bɔmi nɛ ngɛ waa kɛ mɛ wa kpɛti ɔ mi waa ke a pee wɔ nɔ́ ko nɛ wa bua jɔɛ he po.
Lɔ ɔ he ɔ, ke nyɛmi ko tɔ̃ o nɔ, aloo e wo o mi mi la a, moo bɔ mɔde kaa o maa nu lɛ sisi mohu pe nɛ o maa kojo lɛ. (Kol. 3:12) Wɔ tsuo wa yi mluku nɛ be komɛ ɔ, wa tɔ̃ɔ ni kpahi a nɔ. Enɛ ɔ nɛ o ma kai be fɛɛ be ɔ maa ye bua mo nɛ́ o pee o blɔ fami nɔ́ kɛ “hɛɛ mumi ɔ kake peemi ɔ mi.”