Դատավորներ
10 Աբիմելեքից հետո Իսրայելին փրկելու համար դատավոր նշանակվեց Թոլան՝ Իսաքարի ցեղից Դոդայի որդի Փուայի որդին:+ Նա բնակվում էր Սամիրում՝ Եփրեմի լեռնային շրջանում: 2 Թոլան Իսրայելում դատավորություն արեց 23 տարի, հետո մահացավ ու թաղվեց Սամիրում:
3 Նրանից հետո դատավոր դարձավ գաղաադցի Հայիրը, որը Իսրայելում դատավորություն արեց 22 տարի: 4 Նա ուներ 30 որդի, որոնք 30 ավանակ էին հեծնում: Նրանք ունեին 30 քաղաք, որոնք գտնվում են Գաղաադում և մինչև այսօր կոչվում են Հավոթ-Հայիր:+ 5 Հայիրը մահացավ ու թաղվեց Կամոնում:
6 Իսրայելացիները դարձյալ արեցին այն, ինչը չար էր Եհովայի աչքին.+ նրանք սկսեցին ծառայել Բահաղներին,+ Աստարտեի կուռքերին, Արամի* աստվածներին, Սիդոնի աստվածներին, Մովաբի+ աստվածներին, ամմոնացիների+ աստվածներին և փղշտացիների աստվածներին:+ Նրանք թողեցին Եհովային ու չծառայեցին նրան: 7 Այդ պատճառով էլ Եհովայի բարկությունը բորբոքվեց Իսրայելի դեմ, և նա իսրայելացիներին փղշտացիների ու ամմոնացիների ձեռքը մատնեց:*+ 8 Նրանք սկսեցին նեղել ու սաստիկ ճնշել իսրայելացիներին. 18 տարի այդպես վարվեցին այն բոլոր իսրայելացիների հետ, որոնք Հորդանանի մյուս կողմում էին ապրում՝ ամորհացիների երկրում՝ Գաղաադում: 9 Ամմոնացիները նաև անցնում էին Հորդանանը, որ կռվեն Հուդայի, Բենիամինի և Եփրեմի ցեղերի դեմ: Իսրայելացիները ծանր վիճակում էին հայտնվել: 10 Ուստի Եհովային օգնության կանչեցին՝+ ասելով. «Մենք մեղք ենք գործել քո դեմ, որովհետև թողել ենք քեզ՝ մեր Աստծուն, և Բահաղներին ենք ծառայել»:+
11 Բայց Եհովան ասաց նրանց. «Երբ Եգիպտոսը,+ ամորհացիները,+ ամմոնացիները, փղշտացիները,+ 12 սիդոնացիները, Ամաղեկն ու Մադիանը ձեզ նեղում էին, մի՞թե ես չէի փրկում ձեզ: Երբ ինձ օգնության էիք կանչում, փրկում էի ձեզ նրանց ձեռքից: 13 Բայց դուք թողեցիք ինձ և ուրիշ աստվածների ծառայեցիք:+ Դրա համար էլ ես ձեզ չեմ փրկի:+ 14 Գնացեք և օգնության կանչեք այն աստվածներին, որոնց ընտրել եք:+ Թող նրա՛նք ձեզ փրկեն նեղության ժամանակ»:+ 15 Սակայն իսրայելացիներն ասացին Եհովային. «Մենք մեղք ենք գործել: Մեզ հետ վարվիր այնպես, ինչպես ուզում ես, միայն թե, խնդրում ենք, փրկիր մեզ այսօր»: 16 Նրանք իրենց միջից հեռացրին օտար աստվածներն ու Եհովային ծառայեցին,+ և նա այլևս չկարողացավ հանդուրժել Իսրայելի տառապանքը:+
17 Որոշ ժամանակ անց ամմոնացիները+ հավաքեցին իրենց զորքը և բանակ դրեցին Գաղաադում: Այդ ընթացքում իսրայելացիներն էլ հավաքվեցին ու բանակ դրեցին Մասփայում: 18 Գաղաադի ժողովուրդն ու իշխաններն իրար ասացին. «Ո՞վ կառաջնորդի մեզ ամմոնացիների դեմ պատերազմում:+ Թող նա էլ լինի Գաղաադի բոլոր բնակիչների գլուխը»: