Suurstofsuperverryking help nie

ATLETE kom uit-asem van die veld af en begin suiwer suurstof inasem. Daar is dikwels suurstofsilinders langs die waterbottels. Laat dit jou gouer herstel of beter presteer? Nie volgens ’n verhandeling wat in die mediese tydskrif Hippocrates se nommer vir September/Oktober 1989 gepubliseer is nie. Atlete het op ’n trapmeul gehardloop totdat hulle uitgeput was, en daarna het hulle suiwer suurstof ingeasem. Daarna het hulle weer op die trapmeul geoefen, maar hierdie keer het hulle lug ingeasem uit ’n silinder wat gewone lug bevat het. Hulle het dit twee keer gedoen. Toe hulle suiwer suurstof ingeasem het, het hulle niks beter gevaar as toe hulle gewone lug ingeasem het nie. Party het volgehou dat hulle die silinders uit mekaar kon ken, maar heel dikwels was hulle verkeerd.

Bloedmonsters wat voor en na elke toets geneem is, “het die idee omvergegooi dat suiwer suurstof jou vinniger laat herstel deur meer van die gas na moeë spiere te stuur. . . . In die bloed het die hoeveelheid laktaat—’n chemikalie wat tydelik in die bloed opbou wanneer spiere wat hard werk nie genoeg suurstof kry nie—nie eintlik verskil nie, ongeag watter silinder gebruik is. As meer suurstof die spiere bereik het, sou die hoeveelheid laktaat laer gewees het.”

Bloed dra net ’n sekere hoeveelheid suurstof en kan dit maklik uit atmosferiese lug verkry. Suiwer suurstof superverryk nie die bloed met ’n oormaat suurstof nie en help nie die atleet om vinniger te herstel na inspannende oefening nie. As jy uit-asem is, herstel jy wanneer die hart vinniger pomp en meer bloed na die spierselle vervoer word, meer suurstof word sodoende voorsien. Die bloed dra nie ekstra suurstof nie. Dit voorsien net die suurstof vinniger, en dít laat jou gouer herstel.