Hoe kan ek portuurdwang die hoof bied?

’n Brief van ’n polisieman uit Chicago, VSA, toon hoe belangrik dit is om die antwoord te ken. Hy skryf:

“Op 15 Januarie 1990 het ek ’n 18-jarige gevangene opgeneem wat ’n voortvlugtige was en van Mississippi na Chicago teruggebring is. Die opname behels onder andere dat al die besittings van die gevangene by hom weggeneem word. Hy het ’n boek by hom gehad, Vrae wat jongmense vra—Antwoorde wat werk.

“‘Het jy hierdie boek gelees?’, het ek gevra.

“‘Ja’, het hy geantwoord. ‘Terwyl ek in Mississippi weggekruip het, het ek op ’n plaas gewerk en twee van Jehovah se Getuies het hierdie boek vir my gegee.’ Toe het hy begin huil en byna onbedaarlik gesnik. Tussen die snikke deur het hy gesê: ‘Ek het die boek al talle kere gelees, en die hoofstuk wat ek oor en oor lees, is: “Hoe kan ek portuurdwang die hoof bied?”’ Hy het bygevoeg: ‘As ek tog net drie of vier jaar gelede hierdie informasie gehad het, sou ek nie vandag hier gewees het nie.’

“Die gevangene is weggeneem, en ek het die polisieverslag en die bekentenis wat hy aan die polisie gedoen het, gelees. Daarin het hy gesê: ‘Die leier van my bende het my aangesê om met die straat af te gaan en ’n lid van ’n mededingende bende te skiet wat in ons gebied kokaïen verkoop. Ek het gedoen soos ek gesê is. Ek was bang dat die ander bendelede sou dink dat ek nie ’n man is nie. Ek wou aanvaar word.’

“Hierdie 18-jarige gevangene is van moord aangekla en as hy skuldig bevind word, sal hy in die dodesel beland omdat hy gedoen het wat sy portuurs gesê het hy moet doen.”

Die Bybel bied betroubare riglyne en verstandige raad vir baie van vandag se probleme. As jy graag meer inligting of ’n gratis tuisbybelstudie wil hê, skryf gerus aan Wagtoring, Privaatsak 2067, Krugersdorp, 1740 of aan die gepaste adres op bladsy 5.