Die Bybelse beskouing

Goddeloosheid—Wie se skuld is dit?

TOE sy by haar huis instap, het sy gou besef dat daar iets verkeerd is. Terwyl sy vlugtig in die huis rondgekyk het, is haar ergste vermoedens bevestig—die televisie, die stereo, ’n paar kledingstukke en ander artikels was weg. Toe het ’n verontrustende gedagte haar te binne geskiet: ‘Sê nou die indringers is nog in die huis?’ Sy het na die veiligheid van ’n buurman se huis gevlug om die polisie te ontbied. Ja, sy was nóg ’n slagoffer van misdaad.

As jy self nog nie ’n slagoffer van misdaad was nie, ken jy heel waarskynlik iemand wat wel was. Dit is iets wat hom dikwels rondom die wêreld afspeel waarby slagoffers onwillig betrek word. Volgens ’n opname wat deur die Verenigde Nasies se Komitee vir die Voorkoming en Beheer van Misdaad gedoen is, styg gerapporteerde misdaadsyfers vinniger as wat nasionale ekonomieë en bevolkings groei.

Opregte, regskape mense oor die hele wêreld bekommer hulle oor die misdaad, afgryslike moorde, ongeregtigheid en korrupsie wat die wêreld besmet, en hulle is vreesbevange oor die geweld wat voor die voet gepleeg word. Baie vra: ‘Waarom maak God nie ’n einde daaraan nie?’

Dit is ’n goeie vraag, en die Bybel gee wel die antwoord. Maar om die antwoord te kan verstaan, is dit belangrik om te besef wie of wat die bron, die grondoorsaak, van goddeloosheid is.

Dit is nie God se skuld nie

“Is daar miskien onreg by God?” vra die Bybelskrywer Paulus. “Nee, stellig nie!” antwoord hy (Romeine 9:14). Maar party meen dalk dat aangesien God almagtig is hy verantwoordelik is vir alles wat gebeur. Dit is egter nie die geval nie. Byvoorbeeld: ’n Argitek ontwerp ’n pragtige maar praktiese gebou. Die afwerking is van die hoogste gehalte, en die materiale wat gebruik is, is die beste. Maar die huurders verniel en misbruik die gebou. Kort voor lank het dit omvangryke herstelwerk nodig. Jy sal beslis saamstem dat die huurders, en nie die ontwerper of die bouer nie, verantwoordelik is vir die treurige toestand van die gebou! Dit is ook vandag die geval met die mens en die aarde. Soos Deuteronomium 32:4, 5 verduidelik, is Jehovah se werke volmaak. “Al sy weë is geregtigheid. ’n God van getrouheid, by wie geen onreg is nie” (NW). Maar wie moet dan die skuld gegee word vir baie van die moeilikheid wat vandag op die aarde is?

Die teks sê voorts: “Hulle het van hul kant verderflik gehandel . . . Die gebrek lê by hulleself.” Baie van die moeilikheid in die wêreld vandag is inderdaad die regstreekse gevolg van die mens se eie swakheid of, miskien, moedswilligheid. Maar daar is nog ’n veel groter bron en oorsaak van goddeloosheid.

Die werklike oorsaak word ontmasker

In Openbaring 12:9 lees ons dat Satan die Duiwel, “wat die hele wêreld verlei”, neergewerp is na die omgewing van die aarde. Die gevolg? Vers 12 van dieselfde hoofstuk sê voorts: “Wee die bewoners van die aarde en die see, want die duiwel het na julle neergedaal met groot woede, omdat hy weet dat hy min tyd het.” Dit is dus hy, die groot Teenstander, wat die ongeregtighede veroorsaak wat die wêreld vul. Daar is weliswaar mense wat sy pogings ondersteun; tog is hý die een wat beskryf word as “’n mensemoordenaar van die begin af” (Johannes 8:44). Die Bybel toon vir ons dat Satan die Duiwel die grondoorsaak van die mens se probleme is. Hy is nie net die oorsaak daarvan nie maar hy het gesorg dat goddeloosheid bly voortbestaan, en in hierdie “laaste dae” verskerp hy sy pogings (2 Timotheüs 3:1-5, 13). Jehovah God is dus nie die oorsaak van goddeloosheid nie. Maar gee hy genoeg om om ’n einde aan die mens se lyding te maak?

Sal God ’n einde aan goddeloosheid maak?

Ja, hy gee om, en hy sal ’n einde aan goddeloosheid en lyding maak. Hy is ’n God van liefde, en as ’n liefdevolle Vader weet hy watter behoeftes en begeertes sy kinders het en wil hy dit bevredig (Psalm 145:16; 1 Johannes 4:8-10). Die feit dat God dit nog nie gedoen het nie, is nie ’n teken van onverskilligheid nie. Sy selfbeheersing en geduld is eerder ’n bewys van sy almagtigheid en alwetendheid. Hy weet wanneer dit die beste is om ’n einde aan hierdie goddelose stelsel van dinge te maak, en hy sal dit op presies die regte tyd doen.

Die situasie kan vergelyk word met dié van ’n swanger ma. Hoewel sy ietwat senuweeagtig wag op die koms van haar baba weet sy dat sy nie te bang hoef te wees nie. Sy begryp dat dit ’n sekere hoeveelheid tyd neem vir die baba in haar baarmoeder om ten volle te ontwikkel. Sy sal sonder twyfel ’n bietjie bang en ongemaklik tydens die swangerskap voel, maar die koms van ’n gesonde, ten volle ontwikkelde voltermynbaba maak al die bekommernis en gewag die moeite werd.

Dit is ook die geval met die wonderlike nuwe wêreld van vrede wat in die Bybel beskryf word. Dit sal kom onmiddellik ná God se Koninkryk in menslike aangeleenthede ingegryp het en ’n einde aan die teenswoordige, onregverdige wêreld maak. Dan sal alle goddeloosheid tot die verlede behoort. Lyding, pyn, siekte en die dood—al hierdie dinge sal nie meer bestaan nie (Openbaring 21:3, 4). Daar sal ook ontslae geraak word van diegene wat verantwoordelik is vir al die lyding. Daar sal met Satan en sy demone, sowel as mense wat ’n deel van sy stelsel van dinge geword het, afgereken word.—Maleagi 4:1; Openbaring 20:1-4.

Niemand sal meer, soos die vrou wat aan die begin van hierdie artikel genoem is, bang hoef te wees om alleen huis toe te kom nie. Soos sy en haar man dit gestel het: “Ná daar by ons huis ingebreek is, het ons ’n alarmtoestel laat installeer. Dit is nou al ’n paar jaar sedert die diefstal, en ons voel dus nie meer so beangs daaroor nie. Maar ons weet dat ons slegs in die toekoms, onder God se Koninkryksreëling, ware vrede en veiligheid sal kan geniet.”

Totdat daardie dag binnekort aanbreek, moet ons die tyd wat ons nou het verstandig gebruik. Petrus sê ons moet “die geduld van onse Here as redding” beskou (2 Petrus 3:15, NW). En dit beteken ook vir ander redding, want as ons vir mense van hierdie wonderlike hoop vertel, ‘sal ons onsself red sowel as die wat ons hoor’ (1 Timotheüs 4:16). Dit is nóú die tyd om aan die eienskappe te werk wat ons die soort mense sal maak wat in daardie nuwe wêreld gaan lewe, waar goddeloosheid tot die verlede sal behoort (Psalm 37:9-11). Ons moet die Bybel nie net vir antwoorde op ons vrae deursoek nie, maar ook vir die leiding wat ons nodig het om ons lewe in ooreenstemming met God se wil te bring.

[Prent op bladsy 28]

Doré’s illustration of Lucifer for Dante’s Divine Comedy