Ontwaak! help rokers om die gewoonte af te leer!

VYFTIGMILJOEN. Dit is hoeveel rokers daar net in die Verenigde State is. Twee derdes van hulle sal graag die gewoonte wil afleer. En dit is geen wonder nie, want in die Verenigde State sterf bykans 400 000 mense elke jaar as gevolg van die gebruik van tabakprodukte. In Frankryk sterf 65 000 mense jaarliks as gevolg van die rookgewoonte. In Duitsland is die syfer 70 000.

Met die doel om lewens te red, het die Ontwaak! ’n reeks artikels oor die rookgewoonte in sy nommer van 8 Julie 1989 gepubliseer met die tema “Dood te koop”. Die voorbladfoto—’n skedel met ’n sigaret in sy mond—was treffend en ook verontrustend. Dit het ’n skerp kontras gevorm met die slotartikel: “Tien maniere om op te hou rook.” Die vraag was: Sou die tydskrif strawwe rokers werklik help?

Rolf, een van Jehovah se Getuies wat in Duitsland woon, het besluit om uit te vind. Hy het ’n kollega gehad wat al baie jare lank ’n strawwe roker was en wat verskeie kere tevergeefs probeer het om op te hou. Rolf het dus vir hom ’n eksemplaar van die “Dood te koop”-nommer van die Ontwaak! gegee. Die gevolg?

“Danksy die raad wat julle in die Ontwaak! gegee het”, vertel Rolf, “rook hy nou al 18 maande nie meer nie. Elke keer wanneer hy na ’n sigaret wou gryp, het hy die tydskrif uit sy lessenaarlaai gehaal, en die prentjie van die skedel met die sigaret in sy mond was genoeg om te keer dat hy weer rook.” Hierdie opvallende verandering het nie ongemerk verbygegaan nie. ’n Ander kollega het die eerste een gevra hoe hy dit reggekry het om op te hou rook. Hy het die Ontwaak! vir hom gegee en gesê: “Met behulp hiervan.” Die gevolg? Hy rook nou al langer as ’n jaar nie meer nie!