Die kameel—betroubare woestynreisiger
DIE kameel dien al lank as pakdier en vervoermiddel vir die mens, veral in woestyngebiede. Daar is twee soorte kamele, die Baktriese en die Arabiese kameel. Die Baktriese kameel (Camelus bactrianus) het twee bulte op sy rug, is sterker as die Arabiese kameel en kan groter vragte dra; die Arabiese kameel (Camelus dromedarius), wat blykbaar die een is waarvan die Bybel gewoonlik praat, het net een rugbult.
Vanweë die kameel se kenmerke is hy baie goed aangepas by die lewe in woestyngebiede, waar hy gewoonlik die werk doen wat perde of donkies in ander lande doen. Hierdie dier se dik hare beskerm hom teen die hitte van die woestyn. Sy langwerpige neusgate kan na willekeur sluit, ’n nuttige voorsorgmaatreël teen die waaiende sand. Sy oë word deur dik ooglede en lang ooghare teen hewige sandstorms beskerm. Die kameel se voete, wat met harde vel bedek en kussingagtig is, is merkwaardig gevorm om op sagte en los sand te loop. Eeltkussings waarop die dier leun, beskerm sy bors en knieë. Hierdie kussings is reeds by geboorte daar. Die kameel se sterk tande stel hom in staat om feitlik enigiets te kou. Hierdie dier het nie veel graan nodig nie en kan van gewone woestynplante lewe, en daarom is hy heel ekonomies om te gebruik.
Die kameel se rugbult dien as ’n soort draagbare spens. Hier word die meeste van sy voedselreserwes in die vorm van vet geberg. As die kameel te lank op sy opgegaarde voedselvoorraad teer, val die vel van die rugbult om, pleks van regop te staan, en hang dit soos ’n leë sak langs die ruggraat. Net soos vandag, is vragte in die ou tyd op die rugbulte van kamele gelaai.—Jesaja 30:6.
Volgens volksoorleweringe berg die kameel water in sy rugbult, maar dit is nie waar nie. Daar word algemeen aanvaar dat die kameel lank sonder water kan klaarkom omdat sy liggaam die meeste van die water wat hy drink, kan behou. ’n Bydraende faktor is die ontwerp van sy neus, wat die dier in staat stel om waterdamp uit die lug uit te haal wanneer hy uitasem. Die kameel kan ’n waterverlies van tot 25 persent van sy gewig verdra, in teenstelling met 12 persent in die geval van mense.
Hy verloor nie so vinnig vog deur sweet soos ander diere nie, want sy liggaamstemperatuur kan ses grade Celsius wissel sonder enige merkbare uitwerking. Sy bloed is uniek, aangesien vogverlies minimaal is selfs as hy etlike dae nie water drink nie. Hy kan ook die liggaamsgewig wat hy verloor het, vervang deur tot 135 liter in tien minute te drink.
Dit is bekend dat party kamele verbasend vinnig kan hardloop. In 1 Samuel 30:17 word daar gesinspeel op kamele wat vinnig hardloop. Net die 400 jong manne wat op kamele gery het, het ontvlug toe Dawid die Amalekitiese invallers verslaan het.
Volgens die Wet was die kameel ’n onrein dier en is dus nie deur die Israeliete geëet nie (Levitikus 11:4). Kameelhare is egter gebruik om kledingstowwe mee te weef. Johannes die Doper het ’n kleed gedra wat van hierdie materiaal gemaak was (Mattheüs 3:4). Selfs vandag word die materiaal wat van kameelhare gemaak is, gebruik om kledingstukke mee te maak.