Van ons lesers

Mislukte romanse Ek is 17 jaar oud en het die artikel “Jongmense vra . . . Hoe kan ek ’n mislukte romanse verwerk?” (8 Mei 1993) baie nuttig gevind. Ek was altyd terneergedruk omdat daar nie iemand is wat my liefhet nie. Nou spits ek my toe op ander dinge en bekommer ek my nie daaroor om so gou te trou nie.

S. M., Australië

Ek het romanties betrokke geraak by ’n seun wat nie ’n Christen is nie en het op hom verlief begin raak. Ek het weer by my sinne gekom en die romanse beëindig, maar ek het aan selfmoord gedink. Ek het gevoel ek kan nie sonder hom leef nie en was weke lank terneergedruk. Die artikel het my gehelp om positief te dink en te besef dat hierdie pynlike tydperk binnekort verby sal wees.

A. H., Verenigde State

Resepte Julle artikel “Nieu-Seeland se donserige klein vruggie” (22 Oktober 1992) het ’n resep gegee waarin lemoenlikeur as ’n bestanddeel gebruik word. Julle lesers moet daaraan herinner word dat hulle nie moet bestuur kort ná hulle iets geëet het wat alkohol bevat nie.

J. S., Verenigde State

Dit sal beslis gepas wees om vir gaste te sê indien daar alkohol in ’n gereg is. Die betrokke resep bevat ’n eetlepel lemoenlikeur in ’n vrugteslaai wat genoeg is vir tot ses mense—wat nie genoeg is om ’n mens aan te tas nie. In resepte waar die bestanddele gekook moet word, is die kanse dat ’n mens aangetas sal word selfs kleiner. Aangesien alkohol ’n lae kookpunt het, sal die meeste, indien nie alles nie, verdamp.—RED.

Joshua se wens Dankie dat julle die artikel “Joshua se wens” gepubliseer het (22 Junie 1993). Dit het my bemoedig. As hy so getrou kan wees hoewel hy ’n dodelike siekte [leukemie] het, hoe maklik is dit tog vir my om ook getrou te wees! Ek is nege jaar oud.

M. M., Verenigde State

Ek is diep geroer deur “Joshua se wens”. Sy moed, geloof en liefde vir Jehovah het my diep getref.

K. M., Verenigde State

Hedendaagse martelare Ek het so pas die reeks artikels met die titel “Seëvierend in die aangesig van die dood” klaar gelees (8 Mei 1993). Die onregverdige gruwels wat ons Christenbroers moes ly, het my geroer. Wanneer ek oor hulle volharding nadink, stroom die trane oor my wange. Wat my opval, is hulle geloof en lojaliteit selfs in die aangesig van die dood. Mag Jehovah ons die krag en volharding skenk om soos hulle altyd lojaal te bly.

B. D., Italië

Toe ek vir die eerste keer in my studie van die Bybel die kwessie teëgekom het om onder beproewing getrou te bly, kon ek nie begryp dat daar werklik gevalle is waar ’n mens ernstige toetse van jou geloof die hoof sal moet bied nie. Maar nadat ek die roerende ondervindinge gelees het van Christene wat in die aangesig van die dood hulle onkreukbaarheid gehandhaaf het, kan ek nie my trane bedwing nie. Ek spreek my diepste waardering uit vir hierdie reeks artikels.

J. P., Filippyne

Gesinsbeplanning Julle reeks artikels “Gesinsbeplanning—’n wêreldwye vraagstuk” (22 Februarie 1993) het gesê dat wanneer progestieninplantings [as ’n geboortebeperkingsmetode] gebruik word daar ’n moontlikheid is dat dit vrugafdrywend is. My dokter sê dat dit nie waar is nie.

M. D., Verenigde State

Navorsers is nie seker oor presies hoe progestieninplantings swangerskap voorkom nie. Party meen dit word gedoen deur ovulasie te voorkom. Ander sê daar is bewys dat hulle soms voorkom dat ’n bevrugte eier aan die baarmoeder vasgeheg word—wat daartoe lei dat die swangerskap geaborteer word. Aangesien dit nie duidelik is of hierdie geboortebeperkingsmetode vrugafdrywend is nie, moet Christenegpare self besluit of hulle dit gewetensgetrou kan gebruik of nie (Galasiërs 6:5).—RED.