Van ons lesers
Deur die Ontwaak! gered ’n Paar jaar gelede (22 Augustus 1984) het die Ontwaak! aanbeveel dat elke gesin bespreek wat om in geval van ’n brand te doen en gereeld brandoefeninge doen. Ek en my man het hierdie raad gevolg. In Januarie vanjaar het ons die kans gekry om ons planne uit te voer toe ek wakker geword en besef het dat die grondverdieping van ons huis aan die brand was. Ons het elkeen dit gedoen wat ons geoefen het en veilig uitgekom. Ek was nog nooit so dankbaar vir ’n Ontwaak!-artikel nie!
G. E., Duitsland
Net Getuies neutraal? Julle nommer van 8 Mei 1995 (“Dis nie meer ’n geheim nie”) het gesê: “Net Jehovah se Getuies handhaaf hulle neutraliteit en weier om oorlog te leer of te voer.” Gedurende die Tweede Wêreldoorlog was net 940 van die 11 996 manne wat geweier het om te veg Jehovah se Getuies. Ek was self ’n gewetensbeswaarde. Die woord “net” in julle stelling is gebruik om die verkeerde indruk te skep dat net Jehovah se Getuies hierdie oortuiging gehuldig het.
P. B., Verenigde State
Ons besef dat party individue geweier het om aan oorlog deel te neem, en ons het dit in ons publikasies erken. (Sien die “Ontwaak!” van 8 September 1987, bladsy 7.) Maar die stelling wat hier ter sprake is, het spesifiek verwys na “Katolieke en Ortodokse gelowiges” se versuim om hulle neutraliteit te handhaaf in Rwanda, Liberië, die Balkanstate en ander plekke waar daar onlangs konflikte plaasgevind het. Van al die godsdiensorganisasies het net Jehovah se Getuies ’n volgehoue neutrale standpunt ingeneem.—RED.
Hospitaalseminare Baie dankie vir die artikel “Seminare om verhoudinge tussen dokters en Jehovah se Getuies te verbeter” (22 Maart 1995). Ek is so dankbaar vir die Hospitaalskakelkomitee. Ek is 81 jaar oud, en terwyl ek van die huis af weg was, het ek my heup en skouer gebreek. Die plaaslike komitee was 30 minute voor my by die hospitaal. Aangesien ek geen familie in die omgewing gehad het nie, het een van die broers gedurende die operasie by my gebly. Wat ’n verligting tog! Die HSK-reëling is werklik ’n seëning van Jehovah af.
A. W., Verenigde State
Gevare van drawwery Ek is ’n gereelde drawwer. Ek is seker dat baie van my mede-Christene my as ongebalanseerd sal beskou weens julle artikel “Geniet jou drawwery—Maar pas op vir die gevare!” (22 Maart 1995). Ek is ook bevrees dat baie mense drawwery sal vermy weens die negatiewe konnotasie wat julle daaraan geheg het. Drawwers is nie vatbaar vir hartaanvalle soos julle beweer nie. En endorfiene kom in die brein voor, nie in die liggaam se spiersenuwees soos julle sê nie.
C. D., Verenigde State
Dit was nie ons bedoeling om drawwery in ’n negatiewe lig te stel nie. Ons het die voordele van oefening erken, maar lesers aangespoor om gebalanseerd te wees en nie buitensporige eise aan hulle liggaam te stel nie. Nog navorsing sal gedoen moet word voordat daar gesê kan word presies hoe groot die gesondheidsgevaar is wat langafstandhardlopery vir sekere individue inhou. Wat endorfiene betref, bevestig “The New Encyclopædia Britannica” dat dit “in kenmerkende patrone regdeur die senustelsel versprei” is. Met betrekking tot die gevaar van hartaanvalle erken “The Medical Post” dat strawwe oefening die algehele gevaar van skielike hartstilstand verminder; maar dit sê dat daar “vir die een wat oefen gedurende die oefensessie self ’n groter gevaar” is.—RED.
Seëlversameling Ek het die artikel “Filatelie—’n boeiende stokperdjie en ’n reusebedryf” (8 Januarie 1995) baie geniet. Ek is daarvan oortuig dat die Ontwaak! niks oor die hoof sien nie—selfs nie posseëls nie. Ek versamel seëls as ’n stokperdjie en het gemeen dat die artikel baie volledig was. Dankie vir julle nuttige wenke.
R. C., Venezuela