Een godsdiens sal oorbly
STEL jou voor hoe dit sal wees as alle mense op aarde verenig is in een godsdiens, in die suiwer aanbidding van die enigste ware God. Wat ’n bron van eenheid sal dit tog nie wees nie! Daar sal nie meer godsdienstwis, -tweedrag of -oorlog wees nie. Is dit net ’n droom? Nee. Die apostel Johannes se visioen van die vernietiging van die hoer, die wêreldryk van valse godsdiens, toon dat een vorm van aanbidding ná haar vernietiging sal oorbly. Watter een?
Die stem wat Johannes uit die hemel gehoor het, gee ons ’n leidraad: “Gaan uit haar uit, my volk, as julle nie met haar in haar sondes wil deel nie, en as julle nie ’n deel van haar plae wil ontvang nie” (Openbaring 18:4). Dit is duidelik dat God self hier met sy volk praat. Let op dat hy nie sy volk beveel om met die hoer te meng in ’n ekumeniese poging om haar te red deur haar te help om te verander en ’n behoorlike lewe te lei nie. Nee, daar is geen redmiddel vir haar nie. Daarom beveel hy hulle om uit te kom en van haar af weg te bly om te voorkom dat hulle deur haar growwe sondes besoedel word en uiteindelik saam met haar geoordeel en vernietig word.
Die hemelse bevel om ‘uit haar uit te gaan’, help ook opregte waarheidsoekers om God se volk te identifiseer. Hulle vra hulle moontlik af: ‘Watter mense wat vandag op die aarde is, het hierdie bevel gehoorsaam deur lidmaatskap op te sê van enige godsdiens, organisasie of liggaam van aanbidders wat met “Babilon die Grote” verband hou? (Openbaring 18:2). Watter mense wat vandag op die aarde is, het hulle sodoende bevry van alle Babiloniese leerstellings, geloofsbelydenisse, gebruike en tradisies?’ Wie anders kan dit wees as Jehovah se Getuies? Onder die meer as 5,2 miljoen Getuies in meer as 230 lande het almal wat aan die een of ander Babiloniese godsdiens verbonde was, deur geboorte of bekering, uitdruklik as lidmate bedank—soms ten spyte van die besware en teenkanting van familielede, vriende en godsdiensleiers.
Een voorbeeld hiervan is Henry, ’n Suid-Afrikaanse man, wat die tesourier van sy kerk was en innig geheg daaraan was. Maar hy het na die waarheid gesoek, en eendag het hy ’n gratis tuisbybelstudie met Jehovah se Getuies aanvaar. Toe hy mettertyd besluit om ’n Getuie te word, het hy vir sy pastoor, wat ook sy buurman was, gesê dat hy uit die kerk wil bedank.
Die pastoor was geskok en het later die moderator en ander kerklidmate geneem om Henry te besoek. Hulle het gevra waarom hy hulle kerk verlaat het om lid van ’n godsdiens te word wat, volgens hulle, nie God se heilige gees het nie. “Ek was eers bang om hulle te antwoord”, het Henry gesê, “omdat hulle altyd ’n groot invloed op my gehad het. Maar ek het tot Jehovah gebid om hulp, en hy het my in staat gestel om my soos volg te verdedig: ‘Watter een van al die internasionale godsdienste is die enigste wat God se naam, Jehovah, gereeld gebruik? Is dit nie Jehovah se Getuies nie? Dink julle God sal hulle toelaat om sy naam te dra en hulle nie ook sy heilige gees gee nie?’” Die kerkamptenare kon hierdie redenasie nie weerlê nie, en Henry is nou een van Jehovah se Getuies.
Wanneer die stem uit die hemel dus beveel: “Gaan uit haar uit”, is daar ’n plek waarheen jy kan gaan (Openbaring 18:4). Daar is mense, aanbidders van die ware God, Jehovah, na wie toe jy kan vlug. Miljoene het al gevlug. Hulle staan as Jehovah se Getuies bekend en bestaan uit ’n internasionale Christenbroederskap, wat in meer as 78 600 gemeentes georganiseer is, en hulle ervaar nou die grootste groei in hulle geskiedenis. Hulle het meer as 1200 000 mense gedurende die afgelope vier jaar gedoop! Voor hulle doop het al hierdie mense ’n geestelik opbouende Bybelstudiekursus voltooi, wat hulle in staat gestel het om ’n persoonlike, gegronde besluit te neem om alle bande wat hulle voorheen met enige ander godsdiens gehad het te verbreek.—Sefanja 2:2, 3.
As jy nog nie ’n vergadering van Jehovah se Getuies by een van hulle Koninkryksale bygewoon het nie, kan jy dit gerus hierdie week doen. Wat jy sien en hoor sal heel moontlik ’n goeie indruk op jou maak. En as jy die Bybel wil verstaan, kan jy gerus een van Jehovah se Getuies vra om dit met jou te studeer, soos miljoene ander al gedoen het. As dit jou bede is om die ware begrip van God se Woord te verkry en in ooreenstemming met daardie Woord te lewe, sal jou gebed verhoor word.
[Prente op bladsy 9]
Miljoene wend hulle tot die aanbidding van Jehovah God