“Op soek na die grootste kunstenaar”

Dit was die titel van die Ontwaak! van 8 November 1995. Die onderwerp het ’n gunstige reaksie onder lesers regoor die wêreld uitgelok.

Amang van Douala, Kameroen, het geskryf: “Die artikels het werklik ’n groot uitwerking op my gehad omdat ek lief is vir kuns, veral skilderye van goeie gehalte. Nou besef ek dat daar ’n Kunstenaar is wat beter is as Van Gogh, Rembrandt, Da Vinci en ander—niemand anders nie as Jehovah God self.”

Uit St. Barthelemy, in Frans-Wes-Indië, het Frederick gesê: “Ek het dit vier keer gelees, en ek is elke keer met dankbaarheid vervul vir die pragtige dinge wat ons Skepper ons gegee het.”

Assunta van Italië het geskryf: “Dit het by my die begeerte laat ontstaan om te skilder. Dit het my nog geesdriftiger gemaak vir God se nuwe wêreld.” En Irena, van die Tsjeggiese Republiek, het gesê: “Wanneer ons museums besoek, moet ons betaal om kunswerke te sien, terwyl die Skepper van alle natuurskoon dit elke dag gratis vir ons aanbied.” Aline van Brasilië het geskryf: “Hoewel ons dikwels artikels het wat ons help om Jehovah se persoonlikheid te waardeer, het hierdie artikels my hart geraak. Dit het baie besonderhede oor die skepping gegee wat ons waardering vir Jehovah se liefde vergroot.”

Uit die winterkoue van Wisconsin, VSA, het Anne geskryf: “Dit het my werklik gehelp om die prag van die skepping te waardeer. Soms is dit moeilik om daardie prag in die winter te vind. Dieselfde dag wat ek die artikels gelees het, het ek buitentoe gegaan en die ryp aan ’n tak, ’n sneeubedekte blaar en dierespore in die sneeu gesien. Nogmaals dankie vir die herinnering aan hoe ons ‘die grootste Kunstenaar’ kan waardeer.”

As jy graag meer inligting wil hê oor hoe jy hierdie tydskrif gereeld kan ontvang, kan jy gerus met Jehovah se Getuies in jou omgewing in aanraking kom of skryf na die naaste adres op bladsy 5.