Moenie dat skyn jou bedrieg nie

ONS het by ’n vriendin se gesellige huisie in die woud tuisgegaan, en ons het in die woonstelgedeelte wat half onder die grond was, geslaap. Die vensters was dus op ooghoogte vir ons wat binne was en op grondhoogte buite. Die eerste oggend, omstreeks sesuur, het ’n eienaardige tik-tik-geluid wat geklink het of dit uit verskillende dele van die woonstel kom my wakker gemaak. Ek het nie geweet wat aan die gang is nie en het opgestaan en na die kombuis gestap om te sien of dit die yskas of die verwarmer was wat die geraas gemaak het. Dit was nie een van die twee nie. Ek was nog verward toe ek skielik die geluid uit die gesinskamer hoor kom het. Ek het saggies ingestap, en tot my verbasing het ek ’n helderrooi voël buite gesien, ’n kardinaal, wat die vensterruite aanval! Hy het van venster tot venster om die huis gevlieg—die slaapkamer, die badkamer, die TV-kamer—waar daar ook al ’n venster op grondhoogte was. Ek was dronkgeslaan.

Toe ek stilletjies nader aan die venster beweeg het, het ek ’n sleutel tot die raaisel gevind—’n kardinaalwyfie buitekant, net ’n paar sentimeter verder, wat rustig na saadjies gepik het. Maar waarom het die mannetjie die vensters aangeval? Hy het blykbaar die heeltyd sy eie weerkaatsing vir ’n mededinger aangesien en hom probeer wegjaag! Hy is deur skyn bedrieg.

Ek het later bevestiging gekry dat dít die beweegrede vir die voël se eienaardige gedrag was. In haar boek The Cardinal sê June Osborne dat die kardinaalmannetjie “groot moeite doen om te verseker dat sy grondgebied veilig is teen alle ander mannetjies van sy soort wat daar indring. . . . [Hy] jaag nie net hierdie indringers weg nie, maar hy is bekend daarvoor dat hy . . . teen sy eie weerkaatsing in wieldoppe, motorspieëls of uitsigvensters en glasskuifdeure vasvlieg.” Dan voeg sy ’n gedagte by waarmee ons kon saamstem: “Dit kan nogal ’n huiseienaar se rustige lewe ontwrig.” Ons het dit vroeg elke oggend uitgevind.

Wat kan gedoen word om hierdie kompulsiewe gedrag van die mannetjie te laat ophou? Die skryfster June Osborne stel voor: “Soms moet blink oppervlaktes bedek word om rus en vrede te herstel . . . , en om te probeer keer dat die voël hom in hierdie amper-selfmoordaanvalle seermaak.”—Bygedra.