Van ons lesers

Selfbehandeling Ek was verheug om die reeks artikels “Selfbehandeling—Kan dit jou help of benadeel?” (8 Julie 1998) te sien. Dit is goed geskryf en gee ’n gebalanseerde oorsig van die onderwerp, wat in die meeste lande regoor die wêreld prakties kan wees. Dit het die punt goed beklemtoon dat ons deur ’n gesonde lewenswyse persoonlik verantwoordelikheid vir ons gesondheid moet aanvaar, pleks van ’n ‘pil vir elke kwaal’ te hê.

J. M. J., Engeland

Flankeerdery Dankie vir die artikel “Die Bybelse beskouing: Wat is verkeerd met flankeerdery?” (8 Julie 1998). My gesin is besig om te herstel van die gevolge van my flankeerdery. Ek het myself toegelaat om die pyn te ignoreer wat ek my gesin besorg het, veral my liefdevolle vrou. As daar iets is wat ek vir my Christenbroers en -susters kon sê, sou dit wees: “Luister asseblief na ons Vader, Jehovah. Moenie flankeer nie, kry hulp, bid tot Jehovah en vlug, vlug, vlug vir die kwaad.”

D. B., Verenigde State

Vir my het hierdie artikel die feit bevestig dat flankeerdery nie ’n kleinigheid is nie. Ons gesin is deur ’n swaar slag getref in die vorm van ’n egskeiding, en oënskynlik onskuldige skertsery het ’n sleutelrol in die probleem gespeel. Ek hoop hierdie raad sal diegene help wat nie op hulle eie sou vooruitsien watter uitwerking hulle gedrag, spraak of lyftaal op die ander geslag kan hê nie.

O. M., Tsjeggiese Republiek

Dit was soos strelende salf vir die gebroke harte van baie susters. Deur hierdie artikel het ons gesien dat Jehovah bewus is van ons diepste gevoelens en daaroor besorg is.

A. M. P., Spanje

Die paragraaf onder die onderhofie “Emosionele verhoudings” was ’n openbaring vir my. My man was besig om op ’n intellektuele vlak geheg te raak aan ’n ander suster in die gemeente omdat hulle soortgelyke agtergronde het. In ons 17 jaar van getroude lewe het hy my nog nooit enige rede gegee om hom te wantrou nie, maar ek was nie meer so seker nie. Dit was nie maklik om dit vir my man te sê nie. Aanvanklik was hy uit die veld geslaan, maar hy het probeer om my oogpunt te verstaan. Hy het gesê dat hy nie vir my of ons drie kinders wil seermaak nie en het onmiddellik alle kontak met haar beëindig. Sy reaksie was ’n groot verligting vir my.

D. T., Kanada

Nazi-gevaar Ek het die artikel “Jehovah se Getuies—Moedig ten spyte van Nazi-gevaar” met groot belangstelling gelees (8 Julie 1998). In die Christelike bediening het ek al dikwels mense ontmoet wat, hetsy uit onkunde of kwaadwilligheid, Jehovah se Getuies daarvan beskuldig het dat hulle met die Nazi-regime saamgewerk het. Ek sal die inligting in hierdie artikel kan gebruik om opregte mense te help om die geskiedkundige waarheid te verstaan agter die valse beskuldigings wat oor ons versprei word.

A. F., Slowenië

Baie dankie vir die artikel. ’n Paar maande gelede het my man, wat nie my geloof deel nie, negatiewe materiaal gesien wat deur afvalliges uitgegee is. Ek is so dankbaar vir die artikel wat sulke leuens weerlê.

C. G., Duitsland

Voëlkykery Ek is ’n sewejarige dogtertjie. Ek het gehou van die artikel “Voëlkykery—’n Fassinerende stokperdjie vir almal?” (8 Julie 1998). Die foto’s en verduidelikings het my rêrig gehelp om te sien dat Jehovah die wêreld wonderlik gemaak het. Die voël waarvan ek die meeste gehou het, is die mahem van Afrika—omdat hy snaaks lyk. Dankie vir die navorsing wat julle gedoen het.

F. C., Italië