Is jou huis veilig?—20 dinge om na te gaan

“UITEINDELIK tuis!” Miskien slaak jy ook ’n sug van verligting wanneer jy ná ’n besige dag by die werk tuiskom, bly om weer veilig by die huis te wees. Maar is jy werklik veilig? Dit is ironies dat party mense onbewustelik aan ernstige gevare by die huis blootgestel word. Dit is veral diegene met klein kindertjies wat weldeurdagte voorsorgmaatreëls moet tref om die aantal ongelukke in die huis te beperk. Gebruik gerus die volgende lys om jou huis te ondersoek en aantekeninge te maak van enige veranderinge wat aangebring moet word?

✔ Plante. As jy klein kinders het, moet jy seker maak dat jy nie giftige plante het nie. Onthou, nuuskierige kindertjies sal omtrent enigiets in hulle mond sit.

✔ Gordyne. Hou gordynkoorde buite bereik. Klein kinders kan daarin verstrengel raak—en hulle kan hulleself daarmee verwurg.

✔ Laaie en kaste. Oorweeg dit om veiligheidslotte te installeer. Dit sal verhoed dat kinders aan skerp voorwerpe en gevaarlike skoonmaakmiddels raak.

✔ Trappe. Is dit goed verlig en nie vol onnodige goed nie? Het jy veiligheidshekke geïnstalleer om te keer dat kinders kan afval?

✔ Stoof. Draai die handvatsels van potte en panne weg sodat dit na die agterkant van die stoof wys, veral terwyl jy kook.

✔ Braaipan. Maak dit gereeld skoon. ’n Braaipan wat vol olie is, kan ’n brand in die kombuis laat ontstaan.

✔ Brandblusser. Daar moet ten minste een in die huis wees, en maak seker dat almal wat oud genoeg is, weet hoe om dit te gebruik.

✔ Bababed. Sporte moet na aan mekaar wees. Die spasie om die matras moet nie so groot wees dat ’n baba se kop daarin kan vassit nie.

✔ Vensters. Veiligheidstralies sal keer dat kinders uitval en kan maklik in die geval van ’n brand deur ’n volwassene verwyder word.

✔ Vitamiene en medisyne. Hou dit in ’n kas wat toegesluit word of op ’n plek wat buite die bereik van kinders is.

✔ Bad. Moet nooit ’n klein kindjie sonder toesig in die bad los nie. Kinders kan vinnig—en in net ’n bietjie water—verdrink.

✔ Mikrogolfoonde. Onthou dat kos vinnig warm word in ’n mikrogolfoond. ’n Baba se melkformule kan byvoorbeeld vuurwarm wees, al voel die bottel dalk net warm.

✔ Kaggel. Laat jou kaggel gereeld nagaan om koolstofmonoksiedlekke te vind.

✔ Braairoosters. Maak seker dat kinders ’n veilige afstand van die rooster af is wanneer dit warm is.

✔ Garagedeur. Leer kinders om nooit onderdeur ’n bewegende garagedeur te hardloop nie, veral nie as dit ’n elektriese deur is nie.

✔ Rookverklikkers. Hou dit skoon, en gaan dit gereeld na. Sit elke jaar nuwe batterye in.

✔ Elektriese kabels en kragpunte. Gooi beskadigde elektriese kabels weg. Dit is die beste as ongebruikte kragpunte veiligheidskappe of -proppe het.

✔ Elektriese toestelle. Hou toestelle weg van die bad of die opwasbak. Aard die elektriese skakelbord om skok te voorkom.

✔ Speelgoedkiste. Maak een of meer luggate in ’n speelgoedkis en sit skarniere aan wat sal keer dat die deksel skielik toeslaan.

✔ Strykyster. Hou jou strykyster—sowel as sy loshangende koord—buite die bereik van kinders.