Beskerm jou kind teen ongelukke
DEUR ONTWAAK!-MEDEWERKER IN SWEDE
HANNA, byna drie jaar oud, was saam met haar ouers, Karl-Erik en Birgitta, toe hulle besig was om ’n buurman wat oorlede is se huis skoon te maak. Ná ’n rukkie het Hanna uit ’n kamer gekom met ’n bottel pille in haar hand. Sy het ’n paar van hulle geëet. Birgitta het haar yskoud geskrik toe sy na die bottel kyk. Dit was ’n bottel van die buurman se hartpille.
Hanna is inderhaas na ’n hospitaal toe geneem, waar sy oornag in die waakeenheid gehou is. Al het sy ’n dosis medisyne ingekry wat haar gesondheid ’n permanente knou kon gegee het, was daar geen ernstige gevolge nie. Waarom nie? Omdat sy ’n bietjie pap geëet het net voordat sy die pille ingesluk het. Van die gif is deur die pap geabsorbeer, wat uitgekom het toe sy opgegooi het.
Hanna se ondervinding is glad nie uniek nie. Wêreldwyd is daar elke dag duisende kinders in ongelukke betrokke wat maak dat hulle na ’n dokter of ’n hospitaal geneem moet word. Jaarliks ontvang 1 uit elke 8 kinders in Swede mediese behandeling ná ’n ongeluk. As jy ’n ouer is, is daar dus ’n groot moontlikheid dat iets soortgelyks met jóú kind kan gebeur.
Dit is nie ongewoon dat kinders dikwels in ’n bekende omgewing, soos in en om die huis, beseer word nie. Die soort beserings wat hulle opdoen, verander namate hulle ouer word. ’n Baba kan maklik van die tafel afval waar sy doeke omgeruil word of hy kan verstik aan ’n stukkie kos of iets kleins wat in sy keel vassit. Klein kindertjies val dikwels wanneer hulle op goed klouter, of hulle doen brandwonde op of word vergiftig wanneer hulle aan dinge binne hulle bereik vat of proe. Kinders van skoolgaande ouderdom word gewoonlik beseer in verkeersongelukke of wanneer hulle buite speel.
Baie van hierdie ongelukke kan voorkom word. Met ’n bietjie voorsorg en kennis van jou kind se ontwikkelingsvlak kan jy beserings of selfs ’n noodlottige ongeluk help voorkom. Hierdie feit is bewys deur ’n georganiseerde kinderveiligheidsprogram wat sedert 1954 in Swede in gebruik is. Voor daardie tyd het meer as 450 kinders elke jaar in ongelukke gesterf. Vandag het die jaarlikse sterftesyfer tot ongeveer 70 gedaal.
Binne die huis
“Jy kan nie ’n een-, twee- of driejarige leer om gevare te vermy en dan daarop reken dat hy dit sal onthou nie”, sê die kindersielkundige Kerstin Bäckström. Gevolglik rus die verantwoordelikheid om jou kind te help om ongelukke te vermy op jou as ouer—of op ander volwassenes by wie jou kind soms bly.
Om mee te begin, kyk ’n bietjie in jou huis rond. Gebruik die lys in die venster hier langsaan. Van die veiligheidstoestelle is dalk nie in alle lande beskikbaar nie of miskien nie teen ’n redelike prys nie. Maar met ’n bietjie vindingrykheid en verbeelding kan jy waarskynlik aan oplossings dink wat in jou spesifieke omstandighede sal werk.
As jou kombuislaaie se handvatsels byvoorbeeld daarvoor geskik is, kan jy die laaie sluit deur ’n stok deur die handvatsels te steek. Jy kan ook die oonddeur op ’n soortgelyke wyse sluit. Dit is baie veiliger om plastiese sakke te knoop wanneer jy dit bêre.
Miskien kan jy aan ander eenvoudige maniere dink om ongelukke in en om die huis te voorkom en dan kan jy vriende en kennisse met klein kindertjies daarvan vertel.
Buite die huis
Ondersoek die plekke waar jou kind speel. Kinders ouer as vier doen meestal beserings op wanneer hulle buite speel. Hulle val en maak hulleself seer of val dalk van hulle fiets af. Die algemeenste noodlottige ongelukke buite die huis waarin kinders tussen die ouderdomme van drie en sewe betrokke is, is verkeersongelukke en verdrinking.
Wanneer jy speelplekke inspekteer, moet jy seker maak dat die apparate in ’n goeie werkende toestand is sodat jou kind nie sal seerkry wanneer hy daarop speel nie. Is daar sagte oppervlakke, soos los sand, onder swaaie, klimrame en soortgelyke apparate sodat jou kind nie sal seerkry as hy val nie?
Is daar waterpoele of stroompies naby jou huis? ’n Een- of tweejarige kan in net ’n paar sentimeter water verdrink. “Wanneer ’n klein kindjie met sy gesig in ’n poel water val, verloor hy sy sin van wat bo en onder is”, sê die kindersielkundige Bäckström. “Die kind kan net nie weer opstaan nie.”
Die eenvoudigste reël is dus: Moet nooit ’n kind tussen een en drie jaar oud sonder volwasse toesig alleen buite laat speel nie. As daar water in die buurt is, moet jy wag totdat die kind heelwat ouer is voordat jy hom toelaat om sonder toesig buite te speel.
In die verkeer
Dieselfde geld as daar verkeer om jou huis is. “’n Voorskoolse kind kan net konkrete boodskappe inneem en kan net op een ding op ’n slag konsentreer”, sê Bäckström. “Maar in die verkeer is daar soveel abstrakte begrippe en verwarrende boodskappe.” Moenie jou kind toelaat om ’n straat alleen oor te steek voordat hy oud genoeg is om skool toe te gaan nie. Volgens deskundiges word kinders nie as volwasse genoeg beskou om alleen in besige verkeer fiets te ry voordat hulle ten minste 12 jaar oud is nie.
Leer jou kind om ’n valhelm te dra wanneer hy fietsry, perdry, rolskaats of slee ry. Dit is moeilik om kopbeserings te behandel en dit kan permanente skade veroorsaak—of selfs noodlottig wees! By een kinderhospitaal het 60 persent van die kinders wat in fietsongelukke was kop- en gesigbeserings opgedoen, maar dié wat valhelms gedra het, het geen ernstige kopbeserings opgedoen nie.
Maak ook seker dat jou kind veilig is wanneer julle in die motor ry. Baie lande het wette wat vereis dat klein kindertjies in spesiaal ontwerpte veiligheidstoeltjies vasgegordel moet wees. Dit het die aantal beserings en sterftes onder kinders wat in verkeersongelukke betrokke is drasties verminder. As veiligheidstoeltjies beskikbaar is waar jy woon, kan dit goeie lewensversekering wees om een te gebruik. Maar maak seker dat dit ’n goedgekeurde model is. Let daarop dat stoeltjies vir babas van dié verskil wat vir kinders van ongeveer driejarige ouderdom en ouer bedoel is.
Ons kinders is kosbare geskenke van Jehovah, en ons wil in alle opsigte vir hulle sorg (Psalm 127:3, 4). As goeie ouers was Karl-Erik en Birgitta nog altyd besorg oor die beskerming van hulle kinders—voor en ná die voorval met Hanna. “Maar ons was natuurlik nog versigtiger ná daardie voorval”, erken Karl-Erik. “Nou het ons kleinkinders, en ons maak altyd seker dat ons medisyne toegesluit is”, sê Birgitta.
[Venster op bladsy 22]
Veiligheid in jou huis
• Medisyne: Hou dit buite die kind se bereik in ’n kas wat kan sluit. Dieselfde geld vir voorskrifvrye sowel as natuurlike medisyne. Vra ook dat oornaggaste hulle medisyne op ’n veilige plek bêre.
• Huishoudelike chemikalieë: Bêre dit buite die kind se bereik in ’n kas wat kan sluit. Hou dit in die oorspronklike houer sodat jy duidelik kan sien wat dit is. Hou altyd ’n ogie oor die produkte wanneer jy dit gebruik, en bêre dit altyd, selfs as jy die vertrek net ’n kort rukkie verlaat. Moet nooit seep in jou skottelgoedwasser laat agterbly nie.
• Stoof: Draai altyd panne se handvatsels na binne op die stoof. Bring ’n kastrolskerm aan indien dit beskikbaar is. Sorg dat die stoof nie kan omkantel nie, al klim die kind dalk op die oop oonddeur. Die oonddeur self moet kan sluit. Kan die kind hom brand as hy aan die oonddeur raak? Dan moet jy ’n skerm aanbring sodat hy nie aan die warm deur kan raak nie.
• Gevaarlike huishoudelike gereedskap: Messe, skêre en gevaarlike toestelle moet in kaste of laaie met slotte of knippe gehou word of dit moet buite bereik van die kind gebêre word. Wanneer jy sulke toestelle gebruik en hulle ’n rukkie eenkant sit, moet jy hulle nie naby die rand van die tafel of toonbank neersit waar die kind dit kan bykom nie. Vuurhoutjies en plastieksakke is ook gevaarlike artikels vir klein kindertjies.
• Trappies: Installeer hekkies, ten minste 75 sentimeter hoog, aan die bo- én onderpunt van die trappies.
• Vensters en balkondeure: Bring kinderslotte of kettings of ’n ander veiligheidsmeganisme hoog teen die venster of deur aan wat keer dat die kind dit kan oopmaak of deur die opening kan beur wanneer dit oop is om vars lug in die vertrek in te laat.
• Boekrakke: As die kind daarvan hou om teen goed op te klim en daaraan te hang, moet jy boekrakke en ander hoë meubels teen die muur vasmaak om te keer dat hulle omval.
• Muurproppe en elektriese drade: Muurproppe wat nie gebruik word nie, moet op die een of ander manier toegemaak word. Drade van artikels soos tafellampe moet teen die muur of aan die meubels vasgemaak word sodat die kind nie die lamp kan aftrek en dit op hom val nie. Andersins moet sulke lampe weggeneem word. Moet nooit die elektriese strykyster op die strykplank los nie, en moenie die draad laat afhang nie.
• Warm water: As jy die temperatuur van die warm water in jou huis kan verstel, moet jy dit tot ongeveer 50 grade Celsius verminder sodat dit die kind nie sal brand as hy of sy die kraan oopdraai nie.
• Speelgoed: Raak ontslae van speelgoed met skerp rante of hoeke. Gooi klein speelgoed of speelgoed wat in klein stukkies gebreek kan word weg, aangesien die kind daaraan kan verstik as hy dit in sy mond steek. Die oë en neus van die kind se teddiebeer moet goed vas wees. Leer ouer broers en susters om hulle klein speelgoed op te tel wanneer die baba op die vloer is.
• Lekkergoed en peuselhappies: Moenie lekkergoed en peuselhappies, soos grondboontjies of harde lekkers, binne bereik los nie. Dit kan in die kind se keel vassit.
[Erkenning]
Bron: Die kantoor van die Kinders se Ombudsman
[Venster op bladsy 22]
In geval van ’n ongeluk
• Vergiftiging: As die kind die een of ander giftige vloeistof gedrink het, moet jy sy mond deeglik uitspoel en hom een of twee glase water of melk gee om te drink. Bel daarna ’n dokter of ’n inligtingsentrum oor vergiftiging vir raad. As die kind ’n bytmiddel in sy oog gekry het, moet jy dit onmiddellik ten minste tien minute lank met heelwat water uitspoel.
• Brandwonde: In geval van geringe brandwonde kan jy dit ten minste 20 minute lank onder koue water (nie te koud nie) hou. As die wond groter as die kind se handpalm is of as dit aan die gesig, ’n gewrig of die onderbuik of geslagsdele is, moet jy die kind na ’n ongevalleafdeling toe neem. Dieper velwonde moet altyd deur ’n dokter behandel word.
• Verstikking: As iets in die kind se lugpyp vassit, is dit uiters belangrik om die voorwerp so gou moontlik uit te kry. Een doeltreffende metode wat jy kan gebruik, is die Heimlich-maneuver. As jy nie weet hoe om dit te doen nie, kan jy met jou dokter in verbinding tree om meer oor hierdie metode uit te vind, of jy kan ’n kinderongeluk- of noodhulpkursus volg waar hierdie metode geleer word.
[Erkenning]
Bron: Die Sweedse Rooi Kruis
[Prent op bladsy 23]
Dra ’n beskermende valhelm vir fietsry
[Prent op bladsy 23]
Veilig in ’n motorstoeltjie