Die Bybel—Betroubare geskiedenis?
HULLE het heersers bestraf. Hulle het priesters berispe. Hulle het die gewone mense weens hulle goddeloosheid tereggewys. Hulle het selfs hulle eie tekortkominge en sondes in openbare verslae ingesluit. Hulle is vervolg, en party is selfs vermoor omdat hulle die waarheid gepraat en geskryf het. Wie was hulle? Die profete van die Bybel, van wie baie dele van die Heilige Skrif geskryf het.—Matteus 23:35-37.
Page Smith skryf in sy boek The Historian and History: “[Die Hebreërs] was net so genadeloos teenoor hulle helde as teenoor die boosdoeners onder hulle, teenoor hulleself as teenoor hulle vyande, omdat hulle ten aanskoue van God geskryf het en niks kon baat deur geveins te wees nie, maar baie daardeur kon verloor.” Smith het ook geskryf dat “in vergelyking met die vervelige chronologie van die stryderkonings van Sirië of Egipte, is die verslag van die beproewinge en die oorwinnings van ’n volk wat deur God gekies is . . . ’n boeiende verhaal. Die Hebreeuse kroniekskrywers het een van die noodsaaklikste elemente van geskiedenis ontdek—dat die rolspelers daarin ware mense is, met al hulle foute en tekortkominge.”
Die Bybelskrywers was ook uiters akkuraat. Nadat hy die Bybel in die lig van die geskiedenis en argeologie ontleed het, het die skrywer Werner Keller in die inleiding van sy boek The Bible as History gesê: “Met die oog op die groot hoeveelheid betroubare en goed gestaafde getuienis wat nou beskikbaar is . . . , het hierdie een sin die heeltyd by my opgekom: ‘Die Bybel is toe al die tyd reg!’”
Dinamiese geskiedenis met kragtige lesse
Die Bybelskrywers was oor die algemeen gewone mense—boere, herders, vissermanne. En tog het wat hulle oor ’n tydperk van ongeveer 1 600 jaar geskryf het, meer mense beïnvloed as enige ander geskrifte, uit die ou of moderne tyd. Daarbenewens is hulle geskrifte van alle kante aangeval, maar tevergeefs (Jesaja 40:8; 1 Petrus 1:25). Vandag kan die Bybel in sy geheel of ten dele in sowat 2 200 tale gelees word—baie meer as enige ander boek! Waarom is die Bybel so uniek? Die volgende aanhalings help om hierdie vraag te beantwoord.
“Die hele Skrif is deur God geïnspireer en is nuttig om te onderrig, om tereg te wys, om dinge reg te stel, om in regverdigheid te dissiplineer, sodat die mens van God volkome bevoeg kan wees, ten volle toegerus vir elke goeie werk.”—2 Timoteus 3:16, 17.
“Alles wat tevore geskryf is, is tot ons onderrigting geskryf, sodat ons deur ons volharding en deur die vertroosting van die Skrif hoop kan hê.”—Romeine 15:4.
“Hierdie dinge het hulle [die Israeliete] as voorbeelde bly oorkom, en dit is opgeskryf as ’n waarskuwing vir ons [Christene] op wie die eindes van die stelsels van dinge gekom het.”—1 Korintiërs 10:11.
Ja, as ’n Goddelik geïnspireerde en bewaarde verslag van mense wat regtig gelewe het—waarvan party God behaag het en ander nie—is die Bybel bo alle ander boeke verhewe. Dit is alles behalwe ’n kliniese lys van moets en moenies of ’n versameling van oulike stories om kinders mee te vermaak. God het weliswaar menseskrywers gebruik, maar dit het net in die Bybel se guns getel en dit ’n aantrekkingskrag gegee wat mense se harte geslag ná geslag geraak het. Die argeoloog William Albright het gesê: “Die diep sedelike en geestelike leringe van die Bybel, wat ’n unieke openbaring van God aan die mens vorm deur die kanale van mense se ondervindinge, is net so waar vandag as wat dit twee- of drieduisend jaar gelede was.”
Om die Bybel se tydlose waarde toe te lig, kan ons teruggaan na die begin van die mens se geskiedenis—waarheen net die Bybel ons kan neem—en ’n paar belangrike lesse uit die boek Genesis ondersoek.
’n Ou verhaal vol tydige lesse
Die boek Genesis lig ons onder andere in omtrent die begin van die mensegesin—name en al. Wat hierdie onderwerp betref, is geen ander geskiedkundige werk so spesifiek nie. ‘Maar van watter waarde is dit vandag om te weet wie ons oorspronklike voorouers was?’ vra jy dalk. Dit is van onskatbare waarde, want Genesis verwyder enige grondslag vir rassisme deur te openbaar dat alle mense—ongeag hulle kleur, stam of nasie—dieselfde voorouers het.—Handelinge 17:26.
Genesis bied ook sedelike leiding. Dit bevat die verslag oor Sodom, Gomorra en hulle buurstede, wat God vernietig het weens die growwe onsedelikheid van hulle inwoners (Genesis 18:20–19:29). Vers 7 van die Bybelboek Judas sê: “Sodom en Gomorra en die stede om hulle, nadat hulle . . . uitermate hoerery gepleeg en vir onnatuurlike gebruik agter vlees aan geloop het, [word] ons as ’n waarskuwende voorbeeld voorgehou.” Die mense van Sodom en Gomorra het nie enige sedewette van God ontvang nie; maar soos alle mense het hulle ’n godgegewe gewete gehad. Gevolglik kon God daardie mense tereg vir hulle dade aanspreeklik hou (Romeine 1:26, 27; 2:14, 15). God sal eweneens vandag alle mense aanspreeklik hou vir hulle dade, hetsy hulle sy Woord, die Heilige Bybel, aanvaar of nie.—2 Tessalonisense 1:8, 9.
’n Geskiedenisles in oorlewing
’n Reliëf op die Titusboog in Rome beeld Romeinse soldate af wat heilige voorwerpe van die tempel in Jerusalem wegdra ná die stad in 70 G.J. vernietig is. Meer as ’n miljoen Jode is doodgemaak. Maar gehoorsame Christene het oorleef, danksy Jesus se waarskuwing: “Wanneer julle Jerusalem deur leërkampe omsingel sien, dan moet julle weet dat sy verwoesting naby gekom het. Laat dié wat in Judea is dan na die berge begin vlug, en laat dié wat in die midde van die stad is, uitgaan, en laat dié wat in die plattelandse plekke is nie daar ingaan nie; want dit is dae waarin die reg toegepas sal word.”—Lukas 21:20-22.
Jerusalem se verdrukking is beslis nie net ou geskiedenis nie, want dit het aspekte van ’n groter verdrukking afgebeeld wat binnekort die hele wêreld gaan raak. Maar daar sal weer eens oorlewendes wees. Hulle word beskryf as “’n groot skare . . . uit alle nasies en stamme en volke en tale”. Hulle “[kom] uit die groot verdrukking” weens hulle geloof in Jesus se vergote bloed—’n geloof wat stewig op Bybelgeskiedenis en -profesie gegrond is.—Openbaring 7:9, 14.
Geskiedenis wat hom nooit sal herhaal nie
Ons lewe vandag in die tyd waarin die Anglo-Amerikaanse Wêreldmoondheid, die laaste van Bybelprofesie, aan die bewind is. Volgens die patroon van die geskiedenis moet hy soos sy voorgangers tot ’n einde kom. Maar hoe? Volgens die Bybel sal hierdie moondheid se einde waarlik uniek wees. Daniël 2:44 het vooruit gewys na 1914 G.J. en het van die heersende politieke moondhede, of “koninkryke”, gesê: “In die dae van dié konings sal die God van die hemel ’n koninkryk verwek wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie; dit sal al daardie koninkryke verbrysel en daar ’n einde aan maak, maar self sal dit vir ewig bestaan.”
Ja, God se Koninkryk—sy hemelse regering onder leiding van Christus Jesus—sal die laaste spoor van onderdrukkende menseheerskappy by Armageddon, die klimaks van die voormelde “groot verdrukking”, uitwis. Daarna sal hierdie Koninkryk “aan geen ander volk oorgelaat word nie”, wat beteken dat dit nooit omvergewerp of uitgestem sal word nie. Dit sal “tot by die eindes van die aarde” heerskappy uitoefen.—Psalm 72:8.
Uiteindelik sal die wrede kringloop van oorheersing deur valse godsdiens, onderdrukkende politiek en hebsugtige handel tot ’n einde kom. Psalm 72:7 beloof: “Die regverdige [sal] bloei en volheid van vrede, totdat die maan nie meer is nie.” In die plek van selfsug en trots sal God se voortreflike eienskap liefde die planeet vul (1 Johannes 4:8). Jesus het gesê: ‘Julle moet mekaar liefhê.’ Die geskiedkundige Will Durant het hieroor gesê: “Die grootste les wat die geskiedenis my geleer het, is dieselfde as dié van Jesus. . . . Liefde is die praktiesste ding in die wêreld.”
God se liefde vir mense het hom beweeg om die opskrifstelling van die Bybel te inspireer. Dit alleen werp lig op die verlede, die hede en die toekoms. Ondersoek gerus die lewegewende boodskap daarvan deur van jou tyd opsy te sit om die Bybel te bestudeer. Met hierdie doel voor oë en in gehoorsaamheid aan Jesus se opdrag vertel Jehovah se Getuies hulle bure van die “goeie nuus van die koninkryk”. Hierdie goeie nuus sal binnekort meer as net profesie wees. Dit sal lewende geskiedenis word.—Matteus 24:14.
[Lokteks op bladsy 9]
“Die Bybel is toe al die tyd reg!”—WERNER KELLER
[Lokteks op bladsy 11]
“Die diep sedelike en geestelike leringe van die Bybel . . . is net so waar vandag as wat dit twee- of drieduisend jaar gelede was.”—WILLIAM ALBRIGHT, ARGEOLOOG
[Prente op bladsy 9]
Die Moabitiese Steen: Bevat koning Mesa se weergawe van die konflik tussen Moab en Israel (2 Konings 3:4-27), die name van verskeie Bybelplekke en God se naam in eertydse Hebreeuse letters.
[Erkenning]
Musée du Louvre, Paris.
Silwerdenarius: Replika bevat beeld en inskripsie van Tiberius Caesar (Markus 12:15-17).
Naboniduskroniek: ’n Spykerskriftablet wat die skielike val van Babilon voor Kores bevestig (Daniël, hoofstuk 5).
[Erkenning]
Photograph taken by courtesy of the British Museum.
Klipblad: Met name van Pontius Pilatus in Latyn.
[Erkenning]
Photograph © Israel Museum, Jerusalem; courtesy of Israel Antiquities Authority.
Agtergrond van Dooie See-rol: ’n Studie van die Jesaja-teks het bewys dat hierdie boek oor ’n tydperk van 1 000 jaar wat dit met die hand oorgeskryf is feitlik onveranderd gebly het.
[Erkenning]
Shrine of the Book, Israel Museum, Jerusalem.
[Prente op bladsy 10]
’n Reliëf op die Titusboog bevestig Jerusalem se vernietiging in 70 G.J.
[Erkenning]
Soprintendenza Archeologica di Roma