’n Hedendaagse barmhartige Samaritaan
DEUR ONTWAAK!-MEDEWERKER IN MEXIKO
Baie van ons het al die Bybelverhaal gehoor van ’n goedhartige man wat dikwels die barmhartige Samaritaan genoem word (Lukas 10:29-37). In hierdie gelykenis het Jesus Christus vertel van ’n Samaritaanse man wat alles in sy vermoë gedoen het om liefde te betoon aan ’n man wat hulp nodig gehad het. Is daar vandag nog sulke barmhartige Samaritane? Beskou die volgende verslag uit Mexiko.
Betuel en sy gesin was ’n paar kilometer van die huis af toe hulle ’n verskriklike motorongeluk op die hoofweg sien. Hulle het stilgehou om hulp aan te bied. Een van die bestuurders wat by die ongeluk betrokke was, ’n dokter, het hulle gevra om sy swanger vrou en twee dogtertjies na die naaste hospitaal te neem vir behandeling. Hulle het dit gedoen, en daarna het Betuel na die ongelukstoneel teruggegaan om te hoor of hy verder kon help.
Betuel vertel: “Die federale hoofwegpatrollie was daar, en aangesien iemand gesterf het, moes die dokter aangehou word sodat hulle verder ondersoek kon instel. Toe die dokter my vra waarom ek hom help, het ek geantwoord dat ons Jehovah se Getuies is en dat die Bybel ons leer om ons naaste lief te hê. Ek het vir hom gesê dat hy hom nie oor sy vrou en kinders hoef te bekommer nie omdat ons na hulle sal omsien. Met trane van dankbaarheid in sy oë, het hy sy waardevolle artikels vir my gegee om vir hom te hou.”
Betuel en sy gesin het die man se gesin saam met hulle huis toe geneem en etlike dae lank na hulle omgesien. Betuel het van die geleentheid gebruik gemaak om ’n Bybelstudie met hulle te begin. Toe die dokter vrygelaat is, het hy sy bewondering vir Jehovah se Getuies uitgespreek en gesê hoe dankbaar hy is. Hy het belowe om die Bybelstudie in sy tuisdorp voort te sit en gesê dat hulle hulle baba na Betuel sal vernoem as dit ’n seun is. Betuel sê voorts: “Ons het nou, twee jaar later, die geleentheid gehad om by hulle te kuier. Tot my verbasing hét hulle hulle Bybelstudie voortgesit, en hulle seuntjie se naam is Betuel!”
[Prent op bladsy 13]
Betuel