’n Lewe gevul met vrees

ROXANAa is bang om vir haar man te sê dat sy ’n deeltydse werk wil kry. Toe sy hom busgeld gevra het om vir haar ma te gaan kuier, het hy Roxana so erg geslaan dat sy mediese behandeling moes kry. Sy lewe voortdurend in vrees.

Rolando het sy vrou gewoonlik toegelaat om saans met openbare vervoer huis toe te kom, maar nou gaan haal hy haar met sy motor. Daar was al soveel berigte van geweld in die omgewing dat hy bekommerd is oor haar veiligheid.

Haidé werk in die hartjie van ’n hoofstad. Eenkeer, toe sy op pad huis toe was, het sy haar in die middel van ’n protesoptog bevind wat gewelddadig geraak het. Elke keer as sy nou ’n optog hoor verbygaan, voel sy gespanne. “Ek voel nie veilig nie”, sê sy. “Ek wil nie meer hier werk nie. Maar ek het geen keuse nie.”

Roxana, Rolando en Haidé ervaar vrees—en nie net wanneer ’n noodsituasie opduik nie. Dit is iets wat hulle deurentyd ervaar. Wanneer mense in vrees lewe, kan hulle uitgemergel voel. Vrees kan hulle van vreugde beroof omdat dit hulle verhinder om te doen wat hulle graag wil. Vrees kan mense se denke oorheers en keer dat hulle aan ander dinge aandag skenk.

Dit is uiters stresvol om in vrees te lewe. Dit lei dikwels tot depressie en kan ’n mens se gesondheid verwoes. “Stres onderdruk die immuunstelsel en is ’n bydraende faktor by die meeste siektes”, verduidelik ’n gesondheidstydskrif. “Die liggaam sal simptome van aftakeling vertoon, veral by die organe wat betrokke is. Hoë bloeddruk, hartkwale, niersiekte, gastroïntestinale probleme, maagsere, hoofpyne, slaaploosheid, depressie en angstigheid kan ontwikkel. As hierdie toestand lank voortduur, lei dit tot vermoeidheid.”

In vandag se wêreld is dit algemeen dat mense in vrees lewe. Sal ons ooit ’n wêreld sien waar mense die lewe sonder vrees kan geniet?

[Voetnoot]