’n Ander manier van stap!
DEUR ONTWAAK!-MEDEWERKER IN FINLAND
Het jy al van die Nordiese stapsport gehoor? Hierdie manier van stap het een van die gewildste oefeninge in Finland geword. Stokke soortgelyk aan ski-stokke word gebruik. Hoe het dit ontwikkel en watter voordele hou dit in?
’N NORDIESE stapper sal jou dalk aan ’n langafstandskiër sonder ski’s laat dink. Om die waarheid te sê, dit was langafstandskiërs wat met die Nordiese stapsport begin het, toe hulle as deel van hulle oefening in die somer met hulle ski-stokke begin stap het. In die 1980’s is dit as ’n doeltreffende oefening aan ander atlete bekend gestel. Teen die laat 1990’s het die algemene bevolking aan die Nordiese stapsport begin deelneem. ’n Gallup-opname wat in 2004 gedoen is, het getoon dat 760 000 Finne—19 persent van die bevolking—ten minste een keer per week daaraan deelneem. “Die Nordiese stapsport het die tweede gewildste vorm van oefening in Finland geword, en stap is die gewildste”, sê Tuomo Jantunen, uitvoerende direkteur van Suomen Latu, die organisasie wat die opname laat doen het. Die Nordiese stapsport was blykbaar nie net ’n tydelike gier nie. In onlangse jare het dit geleidelik ook in ander lande posgevat.
Baie mense is bewus van die voordele wat stap inhou, maar waarom is dit voordelig om met stokke te stap? “Een groot voordeel is dat die Nordiese stapsport die bolyf oefen, met inbegrip van die spiere in die arms, die rug en die maag”, sê Jarmo Ahonen, ’n fisioterapeut en deskundige op die gebied van die Nordiese stapsport. “Dit help ook om spanning in die nek en skouers te verlig, wat ’n algemene probleem onder kantoorwerkers is”, voeg hy by.
Omdat ’n mens in die Nordiese stapsport meer spiere gebruik as wanneer jy gewoonweg stap, verbrand dit ook meer kilojoules. Die gebruik van stokke maak dit vir ’n mens makliker om vinnig te stap en sorg vir ’n vinniger polsslag. Maar dit is nie al nie. Voorstanders beweer dat wanneer die stokke korrek gebruik word, dit ’n mens help om regop te loop, wat die postuur verbeter. “Die Nordiese stapsport verlig ook druk op die gewrigte omdat ’n deel van die liggaamsgewig na die stapstokke oorgedra kan word”, beweer Ahonen. Een Nordiese stapper verduidelik dat die gespitste stokke hom help om sy balans te hou wanneer hy op glibberige oppervlakke stap. Om hierdie rede het ouer stappers gedurende die winter op hierdie nuwe manier begin stap omdat die grond dan dikwels met sneeu of ys bedek is.
[Venster op bladsy 20]
Hoe om te begin
Die Nordiese stapsport verg nie duur toerusting nie. Jy het net ’n goeie paar skoene nodig en stokke van die regte lengte wat spesiaal vir dié doel ontwerp is. As jy op harde oppervlakke stap, kan jy die skerp punte van die stokke met rubberomhulsels bedek. Die Nordiese stapsport is nie te moeilik om baas te raak nie. Jy kan leer hoe om dit te doen. Maar as jy ’n beginner is, sal dit goed wees om ’n ervare Nordiese stapper te raadpleeg.