Die Bybel se beskouing

Is nederigheid ’n swakheid of ’n sterk punt?

MENSE wat trots of aanmatigend is, word dikwels as navolgenswaardig uitgebeeld deur die wêreld. Die nederiges en die sagmoediges word gewoonlik as swak, onseker van hulleself of gedwee beskou. Maar is ware nederigheid werklik ’n swakheid? En is trots in werklikheid ’n sterk punt? Wat sê die Bybel?

Eerstens moet daar gesê word dat die Bybel gunstig praat van sekere vorme van trots. Christene moet byvoorbeeld trots daarop wees dat Jehovah hulle God is en dat hy hulle ken (Psalm 47:4; Jeremia 9:24; 2 Tessalonisense 1:3, 4). Ouers kan trots wees op hulle kinders wanneer hulle ’n goeie voorbeeld stel in Christelike gedrag en moedig ’n standpunt vir ware aanbidding inneem (Spreuke 27:11). Maar trots het ook ’n donker kant.

Trots en nederigheid van naderby beskou

Een definisie van trots is ’n oordrewe gevoel van eiewaarde. Daardie soort trots maak ’n mens verwaand en skep ’n onvanpaste gevoel van meerderwaardigheid, dalk weens skoonheid, ras, stand, talente of rykdom (Jakobus 4:13-16). Die Bybel praat van mense wat “opgeblase van trots” is (2 Timoteus 3:4). Met ander woorde, hulle het ’n te hoë dunk van hulleself, een wat ongegrond is.

Aan die ander kant probeer nederige mense hulleself eerlik en objektief beskou, en hulle erken hulle onvolmaakthede sowel as hulle nederige posisie voor God (1 Petrus 5:6). Wat meer is, hulle erken—en is selfs verheug oor—die voortreflike eienskappe wat hulle in ander sien (Filippense 2:3). Hulle word dus nie bitter van afguns of verteer deur jaloesie nie (Galasiërs 5:26). Dit spreek dus vanself dat ware nederigheid help om goeie verhoudinge met ander aan te kweek en bydra tot emosionele veiligheid en stabiliteit.

Kyk na die voorbeeld van Jesus. Voordat hy aarde toe gekom het, was hy ’n magtige geesskepsel in die hemel. En toe hy op die aarde was, was hy ’n volmaakte mens, sonder sonde (Johannes 17:5; 1 Petrus 2:21, 22). Sy vermoëns, intelligensie en kennis was ongeëwenaard. En tog het hy nooit daarmee gespog nie; hy het altyd nederig gebly (Filippense 2:6). Hy het selfs by een geleentheid sy apostels se voete gewas, en hy het opregte belangstelling in kindertjies getoon (Lukas 18:15, 16; Johannes 13:4, 5). Trouens, met ’n kind aan sy sy het Jesus gesê: “Elkeen . . . wat hom soos hierdie jong kind sal verneder, hy is die grootste in die koninkryk van die hemele” (Matteus 18:2-4). Ja, in die oë van Jesus—en in dié van sy Vader—spruit ware grootheid voort uit nederigheid, nie uit trots nie.—Jakobus 4:10.

Nederigheid is ’n sterk punt

Hoewel Jesus ’n toonbeeld van nederigheid was, was hy geensins ’n gedweë swakkeling wat geen selfvertroue gehad het nie. Hy het die waarheid moedig gepraat en absoluut geen mensevrees gehad nie (Matteus 23:1-33; Johannes 8:13, 44-47; 19:10, 11). Om dié rede het hy selfs die respek van party van sy teenstanders afgedwing (Markus 12:13, 17; 15:5). Maar Jesus was nooit dominerend nie. Hy het eerder deur nederigheid, goedhartigheid en liefde mense se hart bereik op ’n manier wat die trotses nooit sal kan regkry nie (Matteus 11:28-30; Johannes 13:1; 2 Korintiërs 5:14, 15). Selfs vandag onderwerp miljoene hulle lojaal aan Christus uit hulle opregte liefde en diep respek vir hom.—Openbaring 7:9, 10.

God se Woord moedig nederigheid aan omdat die nederiges van hart raad maklik aanvaar en dit ’n vreugde is om hulle te leer (Lukas 10:21; Kolossense 3:10, 12). Soos Apollos, ’n welsprekende vroeë Christenonderrigter, is hulle bly om hulle oogpunt te verander wanneer akkurate nuwe inligting aan hulle voorgelê word (Handelinge 18:24-26). En hulle is nie bang om vrae te vra nie, terwyl die trotses hulle dikwels daarvan weerhou omdat hulle bang is dat hulle onkunde blootgelê sal word.

Kyk na die voorbeeld van ’n eerste-eeuse Etiopiese eunug, wat onseker was oor ’n sekere Skrifgedeelte. “Verstaan u werklik wat u lees?” het die Christendissipel Filippus hom gevra. Die Etiopiër het geantwoord: “Hoe sou ek tog ooit kon, tensy iemand my lei?” Watter nederigheid tog—veral as ’n mens in ag neem dat die eunug heel moontlik ’n vername man in sy tuisland was! Danksy sy nederigheid het hy diepe insig in die Skrif ontvang.—Handelinge 8:26-38.

Die Etiopiër vorm ’n skerp teenstelling met die Joodse skrifgeleerdes en Fariseërs, wat hulleself as die godsdienstige elite van hulle tyd beskou het (Matteus 23:5-7). In plaas van nederig na Jesus en sy volgelinge te luister, het hulle hulle verag en met hulle probeer foutvind. Hulle trots het hulle dus in geestelike duisternis gehou.—Johannes 7:32, 47-49; Handelinge 5:29-33.

Is jy soos sagte klei of harde klei?

Die Bybel vergelyk Jehovah met ’n pottebakker en mense met klei (Jesaja 64:8). Nederigheid help ’n mens om soos sagte klei in God se hande te wees, iemand wat hy tot ’n begeerlike voorwerp kan vorm, terwyl die hoogmoediges soos droë, harde klei is wat net verbrysel kan word. ’n Berugte voorbeeld van die laasgenoemde is die trotse Farao van eertydse Egipte wat Jehovah uitgedaag het ten koste van sy lewe (Eksodus 5:2; 9:17; Psalm 136:15). Farao se ondergang is ’n goeie toeligting van die spreuk: “Trots kom voor ’n ineenstorting en ’n hoogmoedige gees voor struikeling.”—Spreuke 16:18.

Die voorgenoemde gedagtes impliseer nie dat God se volk nooit met trots worstel nie. Jesus se apostels het byvoorbeeld dikwels gestry oor wie die grootste onder hulle was (Lukas 22:24-27). Hulle was egter nie deur trots verteer nie, maar hulle het na Jesus geluister en het uiteindelik hulle gesindheid verander.

“Die gevolg van nederigheid en die vrees van Jehovah is rykdom en heerlikheid en die lewe”, het Salomo geskryf (Spreuke 22:4). Watter goeie redes het ons tog om nederigheid aan te kweek! Dit is nie net ’n sterk en aantreklike eienskap nie, maar dit help ons ook om God se guns en die beloning van die ewige lewe te verkry.—2 Samuel 22:28; Jakobus 4:10.

HET JY AL GEWONDER?

◼ Is alle vorme van trots sleg?—2 Tessalonisense 1:3, 4.

◼ Hoe help nederigheid ons om kennis in te neem?—Handelinge 8:26-38.

◼ Moet God se knegte nederigheid aankweek?—Lukas 22:24-27.

◼ Watter toekoms is daar vir die nederiges?—Spreuke 22:4.

[Prent op bladsy 20, 21]

Kinders was aangetrokke tot Jesus omdat hy ’n nederige mens was