Stap 5
Stel roetines vas en bly daarby
Waarom is hierdie stap nodig? Roetines maak ’n groot deel uit van die lewe as volwassene. Werk, aanbidding en selfs ontspanning word gewoonlik volgens vasgestelde roetines gedoen. Ouers benadeel hulle kinders as hulle hulle nie leer om hulle tyd te beplan en by ’n rooster te bly nie. Aan die ander kant “toon studies dat reëls en struktuur kinders veilig en geborge laat voel en hulle selfbeheersing en selfstandigheid leer”, sê dr. Laurence Steinberg, ’n professor in die sielkunde.
Die uitdaging: Die lewe is gejaagd. Baie ouers werk lang ure, wat hulle dalk min geleentheid gee om gereeld tyd saam met hulle kinders deur te bring. Om roetines vas te stel en daarby te bly, vereis selfdissipline en vasbeslotenheid om ’n kind se aanvanklike weerstand teen die roetines te oorkom.
Die oplossing: Pas die beginsel van hierdie Bybelraad toe: “Laat alles welvoeglik en volgens reëling geskied” (1 Korintiërs 14:40). Talle ouers besluit byvoorbeeld heel wyslik op ’n vasgestelde slapenstyd terwyl hulle kinders nog baie jonk is. Slapenstyd moet egter aangenaam gemaak word. Tatiana, wat in Griekeland woon en die moeder van twee jong dogters is, sê: “Wanneer die kinders in die bed is, gee ek hulle drukkies en soentjies en vertel ek hulle wat ek gedoen het terwyl hulle by die skool was. Dan vra ek hulle of hulle my wil vertel van ’n paar van die dinge wat hulle daardie dag gedoen het. Hulle is ontspanne. Dikwels praat hulle openlik met my.”
Kostas, Tatiana se man, lees vir die meisies stories. “Hulle lewer kommentaar oor die storie”, sê hy, “en dikwels begin hulle ook praat oor die dinge wat hulle kwel. Dit werk nooit as ek hulle net vra om my te vertel wat hulle pla nie.” Namate jou kinders ouer word, sal dit natuurlik goed wees om hulle slapenstyd aan te pas. Maar as jy die roetine handhaaf, sal jou kinders waarskynlik aanhou om hierdie tyd te gebruik om met jou te praat.
Daarbenewens sal dit verstandig wees as gesinne ’n gewoonte daarvan maak om ten minste een maaltyd per dag saam te eet. Om in hierdie gewoonte te kom, sal ’n mens dalk aanpasbaar moet wees wanneer dit by maaltye kom. “Ek kom soms eers laat van die werk af”, sê Charles, die vader van twee dogters. “My vrou sal die meisies dalk iets ligs gee om te eet, maar sy maak altyd seker dat ons ons ete saam as ’n gesin kan geniet. Ons bespreek die dag se bedrywighede en ’n Bybelteks, praat oor probleme en lag saam. Ek kan nie genoeg beklemtoon hoe belangrik hierdie roetine vir die geluk van ons gesin is nie.”
Om sukses te hê met hierdie stap, moet jy nie toelaat dat die najaging van materiële besittings gesinsroetines verdring nie. Pas die Bybel se raad toe om “seker [te] maak van die belangriker dinge”.—Filippense 1:10.
Wat kan ouers nog doen om kommunikasie met hulle kinders te verbeter?
[Lokteks op bladsy 7]
“Laat alles welvoeglik en volgens reëling geskied.”—1 Korintiërs 14:40