“’n Betekenisvolle bydrae tot die mediese wetenskap”
DEUR ONTWAAK!-MEDEWERKER IN MEXIKO
Jehovah se Getuies is wêreldwyd daarvoor bekend dat hulle bloedlose behandeling vir hulle mediese probleme verkies. Party mense kritiseer hierdie Bybelse standpunt. Maar soos berig is die koerant Reforma, ’n groot koerant in Mexikostad het dr. Ángel Herrera, hoofchirurg by die Nasionale Instituut vir Onkologie, gesê: “Die Getuies is nie dom nie. Hulle is ook nie fanaties nie. . . . [Hulle] het ’n betekenisvolle bydrae tot die mediese wetenskap gemaak deur die mediese wêreld bewus te maak van hoe belangrik dit is om bloedverlies te voorkom.”
Vyftien jaar gelede het dr. Herrera ’n span narkotiseurs en chirurge saamgestel om operasies te doen sonder die gebruik van bloed. Dr. Isidro Martínez, ’n narkotiseur op daardie span, het gesê: “As ’n korrekte narkoseprosedure gevolg word, is dit moontlik om al die tegnieke om bloedverlies te voorkom, uit te voer. Ons kan Jehovah se Getuies dus beslis help en terselfdertyd hulle godsdiensstandpunt respekteer.”
Daar is meer as 30 alternatiewe vir bloedoortappings, soos Reforma in Oktober 2006 berig het. Byvoorbeeld, bloedvate kan gekouteriseer word, organe kan met ’n spesiale gaas bedek word wat chemiese stowwe vrystel om bloeding te beperk, en bloedvolume-uitdyers kan gebruik word.a
Dr. Moisés Calderón, hoofhartchirurg by die La Raza- Algemene Hospitaal in Mexikostad, doen gereeld operasies sonder die toediening van bloed. Hy het in Reforma gesê: “’n Oortapping is nie ’n onskadelike prosedure nie. Die gevaar bestaan dat virusse, bakterieë of parasiete oorgedra kan word. ’n Allergiese reaksie kan ook ontwikkel wat die werking van die niere en longe aantas.” Met die oog op hierdie gevare het dr. Calderón gesê: “Ons doen operasies op alle pasiënte asof hulle Jehovah se Getuies is. Ons probeer bloeding so ver moontlik beperk, herwin bloed wat verloor word en gebruik medisyne wat die pasiënt help om minder te bloei.”
Die koerant het Handelinge 15:28, 29 aangehaal, ’n sleutelteks waarop Jehovah se Getuies hulle standpunt baseer. In hierdie teks het die apostels die volgende bevel gegee: “Die heilige gees en ons het dit goedgedink om geen verdere las vir julle by te voeg nie, behalwe hierdie noodsaaklike dinge: om julle voortdurend te onthou van afgodsoffers en van bloed en van wat verwurg is en van hoerery.”
Die Hospitaalinligtingsafdeling by die takkantoor van Jehovah se Getuies in Mexiko berig dat daar 75 Hospitaalskakelkomitees in hierdie land is met 950 vrywilligers wat dokters besoek om vir hulle inligting te voorsien oor alternatiewe vir bloedoortappings. Sowat 2 000 dokters in Mexiko is bereid om Jehovah se Getuies te behandel sonder om bloed te gebruik. Die Getuies het groot waardering vir die samewerking van hierdie dokters, wat gevolglik ook beter toegerus geword het om pasiënte te help wat nie Getuies is nie.
[Voetnoot]
a Ontwaak! beveel nie enige spesifieke vorm van bloedlose behandeling aan nie omdat dit iets is waaroor elkeen self moet besluit.
[Prent op bladsy 30]
Dr. Ángel Herrera
[Prent op bladsy 30]
Dr. Isidro Martínez
[Prent op bladsy 30]
Dr. Moisés Calderón