Hoe beskou God en Christus vroue?

HOE kan ons ’n geheelbeeld kry van hoe Jehovah God vroue beskou? Een manier is om die gesindheid en gedrag van Jesus Christus te ondersoek, wat “die beeld van die onsigbare God” is en wat God se beskouing van sake volmaak weerspieël (Kolossense 1:15). Die manier waarop Jesus met vroue van sy dag gehandel het, toon dat Jehovah en Jesus vroue respekteer en dat hulle beslis nie die onderdrukkende behandeling goedkeur wat vandag so algemeen in baie lande is nie.

Neem byvoorbeeld die keer toe Jesus met ’n vrou by ’n put gepraat het. “’n Vrou van Samaria het gekom om water te skep”, sê Johannes se Evangelieverslag, en “Jesus het vir haar gesê: ‘Gee my ’n bietjie water om te drink.’” Jesus was bereid om in die openbaar met ’n Samaritaanse vrou te praat, selfs al het die meeste Jode niks met Samaritane te doen gehad nie. Volgens The International Standard Bible Encyclopedia was dit vir Jode “veral skandelik om ’n gesprek met ’n vrou in ’n openbare plek te hê”. Maar Jesus het vroue met respek en bedagsaamheid behandel en het mense nie op grond van hulle ras of geslag geoordeel nie. Trouens, dit was teenoor die Samaritaanse vrou dat Jesus hom vir die eerste keer openlik as die Messias geïdentifiseer het.—Johannes 4:7-9, 25, 26.

By ’n ander geleentheid is Jesus genader deur ’n vrou wat 12 jaar lank aan bloedvloeiing gely het, ’n uitmergelende toestand wat vir haar ’n verleentheid was. Toe sy aan hom raak, is sy oombliklik genees. “Jesus het omgedraai, haar opgemerk en gesê: ‘Skep moed, dogter; jou geloof het jou gesond gemaak’” (Matteus 9:22). Volgens die Mosaïese Wet was ’n vrou in haar toestand nie veronderstel om in ’n skare te wees nie, wat nog te sê om aan ander te raak. Tog het Jesus haar nie bestraf nie. Hy het haar eerder uit medelye vertroos en haar as “dogter” aangespreek. Hoe moes daardie woord haar tog gerusgestel het! En hoe bly moes Jesus tog gewees het om haar te genees!

Nadat Jesus opgewek is, het hy heel eerste verskyn aan Maria Magdalena en nog een van sy dissipels waarna die Bybel verwys as “die ander Maria”. Jesus kon eerste aan Petrus, Johannes of aan een van die ander manlike dissipels verskyn het. In plaas daarvan het hy vroue vereer deur hulle die voorreg te gee om die eerste ooggetuies van sy opstanding te wees. ’n Engel het hulle beveel om Jesus se manlike dissipels van hierdie wonderlike gebeurtenis te vertel. Jesus het vir die vroue gesê: “Gaan, vertel vir my broers” (Matteus 28:1, 5-10). Jesus is beslis nie beïnvloed deur die vooroordeel wat so algemeen onder Jode van sy dag was nie, waarvolgens vroue nie as wetlike getuies kon dien nie.

Jesus was dus allesbehalwe bevooroordeeld teenoor vroue en het geensins chauvinistiese gesindhede teenoor hulle goedgekeur nie; hy het eerder getoon dat hy vroue respekteer en waardeer. Geweld teen hulle was heeltemal teenstrydig met wat Jesus geleer het, en ons kan seker wees dat sy gesindheid ’n volmaakte weerspieëling was van sy Vader, Jehovah, se beskouing van dinge.

Vroue onder God se sorg

“Nêrens in eertydse lande om die Middellandse See of in die Nabye-Ooste is vroue die vryheid gegun wat hulle in die moderne Westerse samelewing geniet nie. Die algemene patroon was dat vroue aan mans ondergeskik was, net soos slawe aan vrygeborenes en jonk aan oud ondergeskik was. . . . Seuns is baie belangriker geag as dogters, en babadogtertjies is soms iewers gelaat om weens blootstelling te sterf.” Dit is hoe een Bybelnaslaanwerk die algemene gesindheid teenoor vroue in die ou tyd beskryf. In baie gevalle is hulle amper op dieselfde vlak as slawe gestel.

Die Bybel is geskryf in ’n tyd toe gebruike hierdie gesindheid weerspieël het. Nietemin het die goddelike wet soos dit in die Bybel uiteengesit word, hoë agting vir vroue getoon, in skerp teenstelling met die gesindhede van talle eertydse kulture.

Jehovah se besorgdheid oor die welsyn van vroue blyk duidelik uit die verskeie gevalle toe hy ten behoewe van sy vroulike aanbidders opgetree het. Hy het twee keer tussenbeide getree om te keer dat Abraham se beeldskone vrou, Sara, onteer word (Genesis 12:14-20; 20:1-7). God het aan Jakob se mindergeliefde vrou, Lea, guns bewys deur ‘haar moederskoot te open’ sodat sy aan ’n seun geboorte gegee het (Genesis 29:31, 32). Toe twee godvresende Israelitiese vroedvroue hulle lewe gewaag het om Hebreeuse seuntjies van kindermoord in Egipte te red, het Jehovah uit waardering “aan hulle gesinne geskenk” (Eksodus 1:17, 20, 21). Hy het ook Hanna se vurige gebed verhoor (1 Samuel 1:10, 20). En toe die weduwee van ’n profeet gekonfronteer is deur ’n skuldeiser wat haar kinders as slawe wou neem om haar skuld te betaal, het Jehovah haar nie in die steek gelaat nie. God het die profeet Elisa liefdevol in staat gestel om haar olievoorraad te vermeerder sodat sy haar skuld kon betaal en nog genoeg olie vir haar gesin sou oorhê. Sodoende het sy haar gesin en haar waardigheid behou.—Eksodus 22:22, 23; 2 Konings 4:1-7.

Die profete het die misbruik van vroue of die gebruik van geweld teen hulle herhaaldelik veroordeel. Die profeet Jeremia het vir die Israeliete in Jehovah se naam gesê: “Oefen geregtigheid en regverdigheid uit, en verlos die beroofde uit die hand van die bedrieër; en behandel geen inwonende vreemdeling, vaderlose seun of weduwee sleg nie. Doen hulle geen geweld aan nie. En vergiet geen onskuldige bloed in hierdie plek nie” (Jeremia 22:2, 3). Later is die rykes en magtiges in Israel veroordeel omdat hulle vroue uit hulle huise gesit het en hulle kinders sleg behandel het (Miga 2:9). Sulke lyding wat oor vroue en hulle kinders gebring word, word deur die God van geregtigheid raakgesien en as boos veroordeel.

Die “bekwame vrou”

’n Gepaste beskouing van ’n bekwame vrou word gegee deur die eertydse skrywer van Spreuke. Aangesien hierdie pragtige beskrywing van die rol en die status van ’n vrou in Jehovah se Woord ingesluit is, kan ons daarvan seker wees dat dit sy goedkeuring wegdra. So ’n vrou word beslis nie onderdruk of as minderwaardig beskou nie, maar word eerder waardeer, gerespekteer en vertrou.

Die “bekwame vrou” van Spreuke hoofstuk 31 is ’n flukse en vlytige werker. Sy werk hard aan alles “waarin haar hande behae het”, dryf handel en gaan selfs eiendomstransaksies aan. Sy sien ’n stuk grond en koop dit. Sy maak onderkledingstukke en verkoop dit. Sy lewer gordels aan die handelaars. Sy is baie energiek en bedrywig. Wat meer is, haar woorde van wysheid en haar liefderyke goedhartigheid word grootliks waardeer. Gevolglik word sy hooggeag deur haar man, haar seuns en, nog belangriker, deur Jehovah.

Vroue is nie veronderstel om die onderdrukte slagoffers van mans te wees wat hulle misbruik, sleg behandel of aan enige vorm van mishandeling onderwerp nie. Die getroude vrou moet eerder die gelukkige en bekwame “komplement” van haar man wees.—Genesis 2:18.

Ken aan hulle eer toe

Toe die geïnspireerde skrywer Petrus aan Christenmans geskryf het oor hoe hulle hulle vrouens moet behandel, het hy hulle aangespoor om die gesindhede van Jehovah en Jesus Christus na te volg. “Mans, [gaan voort] om . . . aan hulle eer toe te ken”, het hy geskryf (1 Petrus 3:7). Om aan iemand eer toe te ken, gee te kenne dat ’n mens so ’n persoon baie waardeer en respekteer. Daarom sal die man wat sy vrou eer, haar nie verneder, verkleineer of geweld aandoen nie. Hy toon eerder deur sy woorde en sy dade—in die openbaar en privaat—dat hy haar koester en liefhet.

Om jou vrou te eer, dra sekerlik by tot geluk in die huwelik. Neem die voorbeeld van Carlos en Cecilia. Daar was ’n tyd in hulle huwelik toe hulle dikwels geargumenteer het sonder om ooit die probleem op te los. Met tye het hulle eenvoudig opgehou om met mekaar te praat. Hulle het nie geweet hoe om hulle probleme op te los nie. Hy was aggressief; sy was veeleisend en trots. Maar toe hulle die Bybel begin studeer het en begin toepas het wat hulle geleer het, het dinge begin verbeter. Cecilia sê: “Ek besef dat Jesus se leringe en die voorbeeld wat hy nagelaat het, my persoonlikheid asook my man s’n verander het. Danksy Jesus se voorbeeld het ek nederiger geword en meer begrip vir ander begin toon. Ek het geleer om Jehovah in gebed om hulp te vra, soos Jesus gedoen het. Carlos het geleer om meer verdraagsaam te wees en groter selfbeheersing aan die dag te lê—om sy vrou te eer soos Jehovah dit wil hê.”

Hulle huwelik is nie volmaak nie, maar dit het die toets van die tyd deurstaan. In onlangse jare het hulle voor ernstige probleme te staan gekom—Carlos het sy werk verloor en moes weens kanker ’n operasie ondergaan. Maar hierdie traumatiese situasies het nie hulle huweliksband verswak nie; dit het eerder sterker geword.

Sedert die mensdom in onvolmaaktheid verval het, is vroue in baie kulture sonder waardigheid behandel. Hulle is fisies, emosioneel en seksueel mishandel. Maar dit is nie hoe Jehovah wou gehad het hulle behandel moes word nie. Die Bybelverslag toon duidelik dat, ongeag wat die kulturele beskouing mag wees, alle vroue met eer en respek behandel moet word. Dit is hulle godgegewe reg.

[Prent op bladsy 4, 5]

’n Samaritaanse vrou

[Prent op bladsy 4, 5]

’n Siek vrou

[Prent op bladsy 4, 5]

Maria Magdalena

[Prent op bladsy 6]

Jehovah het Sara twee keer beskerm

[Prent op bladsy 7]

Carlos en Cecilia se huwelik was in gevaar

[Prent op bladsy 7]

Carlos en Cecilia vandag