Wie kan ons wêreld verander?

“Mense in die wêreld soek antwoorde by hulle leiers. Hulle verwag oplossings, nie halfhartige pogings of verskonings nie.”—SEKRETARIS-GENERAAL VAN DIE VERENIGDE NASIES, BAN KI-MOON.

ONS lewe in wat die Bybel beskryf as “kritieke tye . . . wat moeilik is om deur te kom” (2 Timoteus 3:1). Die nuus is vol onheilspellende berigte van oorlog, terrorisme, ekonomiese beroeringe en naderende omgewingsvernietiging.

Is daar enige hoop dat dinge sal verbeter? Kan menseregerings die wêreld se probleme oplos? Of moet ons êrens anders hulp soek?

Wat baie nasies beweer

Baie nasies beweer dat hulle God se steun het. Byvoorbeeld, die Verenigde State van Amerika beweer in hulle Eed van Getrouheid dat hulle “een nasie onder God” is, en die woorde “Op God vertrou ons” verskyn op daardie land se muntstukke en papiergeld.

Baie mense wat in die Verenigde State woon, glo natuurlik nie eens dat God bestaan nie—en dit is ook die geval in baie ander lande wat beweer dat hulle God se steun het. Selfs mense wat wel in God glo, het verskillende beskouings oor die mate waarin hy by menseaangeleenthede betrokke is.

● Sommige sê dat God glad nie in die mensdom belangstel nie en dat die mens maar oor homself moet regeer.

● Ander sê dat God deur menseregerings werk en dat hy hulle pogings om ons wêreld te verander, kan seën.

Beskryf enige van hierdie stellings wat jy glo?

Dink hieraan: As die eerste bewering waar is, is ons in ’n benarde situasie. Maar as die tweede bewering waar is, moet ons ons afvra: ‘Begunstig God die een nasie bo die ander? As twee nasies oorlog voer en albei vurig bid om die oorwinning te behaal, wie se kant sal God dan kies?’ Is dit moontlik dat hy nie een van die twee sal ondersteun nie?

Wat die Bybel leer

1. Die mens is nie geskep om oor homself te regeer nie. Die Bybel sê: “Dit behoort nie aan die mens wat loop om sy voetstappe te rig nie” (Jeremia 10:23). Die geskiedenis bevestig hoe waar hierdie woorde is. Menseheerskappy het nie ’n beter wêreld tot stand gebring nie, nie eers wanneer heersers hoë ideale en die beste bedoelings gehad het nie. In werklikheid het “die mens oor die mens geheers . . . tot sy nadeel”.—Prediker 8:9.

2. God is besorg oor ons situasie. Hy is bewus van ons situasie en het medelye met ons. Wat meer is, hy sal optree om ons te help. Hoe? Deur middel van sy Koninkryk, wat “nooit vernietig sal word nie”.—Daniël 2:44.

3. God se Koninkryk is ’n werklike regering. Dit is dieselfde Koninkryk waarvoor miljoene opregte mense bid in die welbekende “Onse Vader”-gebed. In hierdie gebed vra mense God: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). Let op dat God se Koninkryk nie net toesien dat God se wil in die hemel volbring word nie, maar ook op die aarde.

4. Deur middel van sy Koninkryk kan God—en sal hy—ons wêreld verander. As jy hieroor twyfel, kyk na wat die Bybel leer.

● God het die mensdom ’n volmaakte begin in ’n vreedsame omgewing gegee.—Genesis 1:27-31.

● Ondanks die probleme wat ons sien, het God nie sy voorneme met die aarde verander nie.—Psalm 37:11, 29.

● God het reeds stappe gedoen sodat die aarde—en die mensdom—herstel kan word tot die toestand wat hy oorspronklik in gedagte gehad het.—Johannes 3:16.

Sal jy daarvan hou om meer te leer oor God se Koninkryk en hoe dit ons wêreld sal verander? Jehovah se Getuies, die uitgewers van hierdie tydskrif, sal jou met graagte help. Bespreek gerus die volgende onderwerpe met hulle wanneer hulle weer aan jou deur klop.

● Wat is God se Koninkryk?

● Watter veranderinge sal dit meebring?

● Wanneer en hoe sal God se Koninkryk hierdie veranderinge teweegbring?

HET JY AL GEWONDER?

● Waarom is menseregerings beperk met betrekking tot wat hulle kan bereik?—Jeremia 10:23.

● Hoe het God getoon dat hy vir ons omgee?—Johannes 3:16.

● Wat sal God se Koninkryk moontlik maak vir die aarde en dié wat daarop woon?—Psalm 37:11, 29.

[Lokteks op bladsy 27]

Kan menseregerings die probleme in die wêreld oplos? Of moet ons êrens anders hulp soek?