’N WÊRELD VOL PROBLEME

1 | Beskerm jou gesondheid

HOEKOM DIT SAAK MAAK

’n Krisis of ’n ramp kan op verskillende maniere ’n negatiewe uitwerking op mense se gesondheid hê.

Wanneer daar probleme is, kan dit stres veroorsaak. Mense wat oor ’n lang tydperk onder stres is, word dikwels siek.
In tye van krisis kan daar baie druk op hospitale, mediese sentrums en voorraad geplaas word.
Wanneer mense deur moeilike tye gaan, raak dit hulle finansiële situasie, en sukkel hulle dan om vir die dinge te betaal wat hulle regtig nodig het, soos kos en medisyne.

Wat jy moet weet

Ernstige siekte en emosionele stres kan veroorsaak dat jy slegte besluite maak. Dit kan keer dat jy dinge doen wat goed is vir jou gesondheid. As gevolg hiervan kan jy selfs sieker word.
Gesondheidsprobleme wat nie behandel word nie, kan erger word en selfs jou lewe in gevaar stel.
As jy gesond bly, sal jy beter voorbereid wees om goeie besluite te maak wanneer jy deur moeilike tye gaan.
Jy kan iets doen om jou gesondheid te beskerm, maak nie saak wat jou situasie is nie.

Wat jy nou kan doen

Wanneer dit ook al moontlik is, oorweeg ’n wyse persoon die moontlike gevare en doen hy of sy iets om dit te vermy. Dit kan ook van toepassing wees op jou gesondheid. As jy jouself en jou huis skoon hou, kan jy dikwels die gevaar van siekte verminder of keer dat jy baie siek word. Voorkoming is beter as genesing.

“Omdat ons onsself en ons huis skoon hou, spandeer ons definitief minder geld aan doktersbesoeke en medikasie.” – Andreas.a

a Van die name in hierdie tydskrif is verander.

HOE OM JOUSELF TE BESKERM – Wenke wat help

Beskerm jou gesondheid gedurende moeilike tye deur die volgende praktiese stappe te volg

BEOEFEN GOEIE HIGIËNE

Beoefen goeie higiëne

Die Bybel sê: “Die verstandige sien die gevaar en vermy dit” (Spreuke 22:3). Dink aan watter dinge jou kan siek maak, en vermy dit.

Was jou hande gereeld met seep en water, veral voordat jy met kos werk of nadat jy die toilet gebruik het.
Ontsmet en maak jou huis gereeld skoon, veral oppervlakte en voorwerpe wat baie gebruik word.
Wanneer dit ook al moontlik is, probeer om nie naby mense te gaan wat ’n aansteeklike siekte het nie.

EET GESOND

Eet gesond

Die Bybel sê: “Geen man het al ooit sy eie liggaam gehaat nie, maar hy voed dit en versorg dit” (Efesiërs 5:29). Ons wys dat ons lief is vir ons liggaam deur versigtig te wees oor wat ons inneem.

Drink baie water.
Eet verskillende soorte vrugte en groente.
Moenie te veel vet, sout en suiker inneem nie.
Moenie tabak of dwelms gebruik nie, en moenie alkohol of medikasie misbruik nie.

“Omdat ons nie siek wil word nie, probeer ons om gesond te eet. Anders sou ons die geld wat ons verdien het, aan dokters en medikasie moes spandeer. Ons verkies om ons geld te gebruik om gesonde kos te koop.” – Carlos.

OEFEN EN KRY GENOEG RUS

Oefen

Die Bybel sê: “’n Hand vol rus is beter as twee hande vol harde werk en ’n gejaag na wind” (Prediker 4:6). Ons moet werk, maar ons moet ook genoeg rus kry.

Bly aktief. Jy kan begin deur gereeld te gaan stap. Fisiese aktiwiteit kan jou gesondheid verbeter, selfs al is jy ouer, gestremd of beperk deur chroniese siekte.
Kry genoeg rus

Kry genoeg rus. As jy nie genoeg rus kry nie, kan dit meer stres veroorsaak en jou konsentrasie verminder. As jy oor ’n lang tydperk nie genoeg rus kry nie, kan dit tot ernstige gesondheidsprobleme lei.
Kies ’n goeie tyd wanneer jy moet gaan slaap, en bly daarby. Probeer om elke dag op dieselfde tyd te gaan slaap en op te staan.
Probeer om nie TV te kyk of elektroniese toestelle te gebruik voordat jy gaan slaap nie.
Vermy groot maaltye, kafeïene en alkohol voordat jy gaan slaap.

“Ek het gevind dat slaap ’n uitwerking op alle aspekte van my gesondheid het. As ek nie genoeg slaap nie, kry ek soms hoofpyne en voel my liggaam seer. Maar wanneer ek genoeg slaap, voel dit asof ek enigiets kan aanpak! Ek het baie energie, en ek raak nie so dikwels siek nie.” – Justin.