’N WÊRELD VOL PROBLEME

3 | Beskerm jou verhoudings

HOEKOM DIT SAAK MAAK

Omdat mense al hoe angstiger word as gevolg van die probleme in die wêreld, laat baie mense toe dat hulle verhoudings agteruitgaan sonder dat hulle dit besef.

Mense sonder hulleself van hulle vriende af.
Huweliksmaats is nie meer so liefdevol teenoor mekaar nie.
Ouers skenk min of geen aandag aan die bekommernisse van hulle kinders.

Wat jy moet weet

Vriende is belangrik omdat hulle jou veral in moeilike tye help om gesond te bly, fisies sowel as emosioneel.
Die stres as gevolg van die wêreld se probleme kan jou gesinslewe op onverwagse maniere toets.
Wanneer kinders skokkende dinge op die nuus hoor of sien, kan dit hulle meer ontstel as wat jy besef.

Wat jy nou kan doen

Die Bybel sê: “’n Ware vriend betoon altyd liefde en is ’n broer gedurende moeilike tye.” – Spreuke 17:17.

Vriende kan ons help en ons goeie raad gee. Sulke liefdevolle vriende kan ons help om vasbeslote te wees om die dag se uitdagings te hanteer.

HOE OM JOUSELF TE BESKERM – Wenke wat help

Beskerm jou verhoudings gedurende moeilike tye deur die volgende praktiese stappe te volg

HOU JOU HUWELIK STERK

Hou jou huwelik sterk

Die Bybel sê: “Twee is beter as een . . . Want as een van hulle val, kan die ander sy maat ophelp” (Prediker 4:9, 10). Huweliksmaats moet soos twee vlieëniers wees wat saamwerk en dieselfde instruksies volg, en nie soos twee vegvliegtuie wat teen mekaar veg en gaan bots nie.

Wees vasbeslote om nie julle frustrasies op mekaar uit te haal nie. Om geduldig te wees, kan baie help.
Praat ten minste een keer ’n week met jou huweliksmaat oor probleme wat julle dalk het. Probeer om op die probleem te fokus en nie om mekaar aan te val nie.
Sit tyd opsy om dinge saam te doen wat julle albei geniet.
Dink aan die goeie tye wat julle al saam geniet het. Julle kan na foto’s van julle troue of ander goeie tye kyk.

“’n Paartjie stem dalk nie oor alles saam nie, maar dit beteken nie dat hulle nie as ’n span kan saamwerk nie. ’n Paartjie kan saam ’n besluit neem en dan saam werk om seker te maak dat dit suksesvol is.” – David.

WERK AAN JOU VRIENDSKAPPE

Werk aan jou vriendskappe

Ons waardeer dit wanneer ons ondersteuning van ons vriende ontvang, maar ons moet ook dink aan maniere hoe ons ondersteuning kan gee. Wanneer jy ander aanmoedig, word jy self aangemoedig.
Kontak elke dag ’n paar van jou vriende om te hoor hoe dit met hulle gaan.
Vra jou vriende hoe hulle uitdagings hanteer het wat soortgelyk is aan die uitdagings wat jy het.

“Wanneer jy deur ’n storm van probleme gaan, kan jou vriende jou help om te sien waar jy is en waarheen jy op pad is. Hulle kan jou in die regte rigting stuur, selfs al herinner hulle jou net aan die dinge wat jy alreeds weet. Vriende gee vir jou om en hulle weet dat jy vir hulle omgee.” – Nicole.

ONDERSTEUN JOU KINDERS

Ondersteun jou kinders

Die Bybel sê: “Elkeen moet gou wees om te hoor, stadig om te praat” (Jakobus 1:19). Aan die begin sal jou kinders dalk nie oor hulle vrese en bekommernisse wil praat nie, maar deur geduldig te luister, sal jy hulle help om oor hulle gevoelens te praat.

Laat jou kinders gemaklik voel sodat hulle oor hulle gevoelens kan praat. Dit is vir party kinders makliker om te praat wanneer hulle ontspanne is. Hulle is dalk meer ontspanne wanneer hulle saam met jou in die kar ry of ’n entjie gaan stap eerder as wanneer hulle ernstig met jou moet sit en praat.
Maak seker dat jou kinders nie te veel blootgestel word aan ontstellende nuusberigte nie.
Sê vir jou kinders wat jy gedoen het om die gesin veilig te hou.
Besluit op ’n plan wat julle in noodgevalle gaan volg, en oefen dit saam met jou kinders.

“Praat met jou kinders, en laat hulle toe om te sê hoe hulle voel. Hulle wil dalk nie wys dat hulle bang, angstig of kwaad is nie. Sê vir hulle dat jy met dieselfde gevoelens sukkel, en vertel hulle hoe jy sulke gevoelens hanteer het.” – Bethany.