Gemeentes tot opbouing in liefde en eenheid

Jy het moontlik al gemeentelike vergaderinge van Jehovah se Getuies in jou omgewing bygewoon. Daar was mense van alle agtergronde aanwesig—gesinne, ongetroudes, oud en jonk. Hulle was almal verenig in hulle aanbidding en het daarin belanggestel om ander te help.

In enige reëling waar ’n groot aantal mense eendragtig wil saamwerk, moet daar toesig wees. God is ’n God van orde; gevolglik moet daardie orde ook in die gemeente van sy volk weerspieël word. Soos in die eerste eeu, word daar vandag bekwame, ryp en ervare Christenmanne as ouere manne, of opsieners, aangestel. Hulle hou toesig oor die gemeente en voorsien in sy geestelike behoeftes. Hulle word bygestaan deur ander getroue manne bekend as bedieningsknegte (diakens). Hierdie manne ontvang geen salaris of ander geldelike vergoeding nie, maar dien vrywillig en dra hulle eie koste, gewoonlik deur middel van ’n sekulêre betrekking.—1 Korinthiërs 14:33, 40; Filippense 1:1; 1 Timotheüs 3:8, 9.

Hoe word hulle gekies? Hulle moet getroue knegte van God wees wat aan sekere Skriftuurlike vereistes voldoen. Onder hierdie vereistes is die volgende: ‘Nugterheid, ingetoënheid, fatsoenlikheid, gasvryheid, bekwaamheid om te onderrig, en vriendelikheid; die persoon moenie ’n geldgierige wees nie; hy moet sy eie huis goed regeer; hy moenie ’n nuweling wees nie; hy moet ’n goeie getuienis van die buitestaanders hê’; ‘hy moet vashou aan die betroubare woord wat volgens die leer is’.—1 Timotheüs 3:1-15; Titus 1:7-9.

Hierdie manne word nie deur die gemeente, waarvan die meeste lede betreklik nuwe Christene kan wees, tot die amp verkies nie. Hulle word eerder aanbeveel deur ryp en ervare manne wat self ouere manne is en wat kan onderskei in watter mate ’n persoon aan die Skriftuurlike vereistes voldoen. Die aanstelling van ouere manne en bedieningsknegte word dan onder toesig van die Bestuursliggaam van Jehovah se Getuies gedoen, ooreenkomstig die voorbeeld wat deur die Christengemeente in die eerste eeu gestel is.

Hierdie ouere manne, of opsieners, vorm nie ’n geestelikeklas nie; hulle is nie heersers oor ander nie. Soos Jesus gesê het, moet die wat die leiding neem die diensknegte van almal wees. In die gemeente van Jehovah se Getuies is die ouere manne inderdaad medewerkers vir die Koninkryk van God.—Mattheüs 20:26, 27; 23:8-11; Romeine 12:8; 1 Korinthiërs 3:5; 4:1, 2; Kolossense 4:11; 1 Thessalonicense 5:12-14

As opsieners het hulle toesig oor die onderrigting by vergaderinge en neem hulle die leiding in die predikingswerk. Een van die belangrikste oogmerke van die gemeente is om die goeie nuus van die Koninkryk in sy toegewese gebied te verkondig. Opsieners dien ook as herders wat gemeentelede besoek om hulle te bemoedig, na gelang van die behoefte.—Mattheüs 24:14; Handelinge 1:8; 1 Thessalonicense 2:11, 12; 5:14, 15; 2 Timotheüs 2:24-26; Hebreërs 13:17; Jakobus 5:13-16; 1 Petrus 5:1-4.

Die ouere manne het ook die verantwoordelikheid om persone tereg te wys en te tug indien hulle ’n verkeerde weg inslaan en moontlik ’n gevaar inhou vir die geestelike en morele reinheid en die eenheid van die gemeente.—1 Korinthiërs 5:4, 5, 7, 11-13; Titus 1:9; 2:15; 3:10, 11.

Jy sal aangename kameraadskap en talle geestelike voordele geniet deur gereeld met die gemeente om te gaan.—Psalm 35:18; 84:10 84:11.

• Wie hou toesig oor die werksaamhede van individuele gemeentes?

• Op watter grondslag word opsieners gekies?

• Wat is hulle verantwoordelikhede?

[Prente op bladsy 13]

Opsieners onderrig die gemeente, neem die leiding in die prediking van huis tot huis, bemoedig ander deur herdersbesoeke, gee raad en teregwysing wanneer nodig