Vrae van lesers

• Was daar “vier ruiters van Openbaring”? Of was daar vyf?

Die uitdrukking “die vier ruiters van Openbaring”, wat deur Spaanse skrywer Vicente Blasco Ibánez gewild gemaak is deurdat hy dit as titel gebruik het vir ’n roman oor die Eerste Wêreldoorlog, kom uit die beskrywing in hoofstuk ses van Openbaring.

Daar sien die apostel Johannes in ’n gesig ‘’n wit perd en die een wat daarop sit’, wat verstaan word as ’n afbeelding van Jesus Christus wat as hemelse koning kom. Daarna kom ’n ruiter op ’n ‘vuurrooi perd’, wat oorlog afbeeld soos dié wat in 1914 G.J. uitgebreek het. ’n Swart perd met ’n ruiter is derde, en dit beeld ontsaglike voedselskaarste af. Dan voeg die verslag by: “En ek het gesien, en kyk, daar was ’n vaal perd. En hy wat daarop sit, sy naam is die dood, en die doderyk [Hades, NW] het hom gevolg.”—Openb. 6:1-8.a

Maar hoe het die Doderyk die Dood gevolg? Het die Doderyk op sy eie onvermelde perd gery? Of het die Doderyk agter die Dood op die vaal perd gesit? Of was die Doderyk glad nie op ’n perd nie, maar het hy nietemin gevolg? Niemand kan in werklikheid met sekerheid sê watter van hierdie moontlikhede die geval was nie, want Johannes het nie daardie besonderheid verstrek nie. Al wat ons met sekerheid op grond van die ver slag kan sê, is dat Johannes vier ruiters gesien het—die vier ruiters op die wit, rooi, swart en vaal perde. Dit is nie hier nodig om dogmaties te wees oor die kwessie of die Doderyk op ’n vyfde perd gery het of nie.

Uit Johannes se beskrywing kan ons egter wel vasstel wat hy belangriker beskou het as hóé die Doderyk nou eintlik gevolg het. Dit is dat diegene wat ontydig sterf—byvoorbeeld as gevolg van oorlog, hongersnood en pessiekte—versamel word in die Doderyk of Hades, die mensdom se gemeenskaplike graf.—Openb. 20:13.

[Voetnoot]