Verenig in die publisering van die Woord van Jehovah

„Mag julle onder mekaar dieselfde gesindheid hê wat Christus Jesus gehad het, sodat julle eensgesind met een mond die God en Vader van onse Here Jesus Christus mag verheerlik.”​—ROMEINE 15:5, 6, NW.

1. (a) Wat is Jehovah se reëling om sy volk te verenig? (b) Wat toon die Skrif oor die volgorde waarin hierdie vereniging plaasvind?

JEHOVAH het sy getuies wêreldwyd in ’n kosbare eenheid bymekaargebring. Dit is in ooreenstemming met God se huishoudelike reëling wat die apostel Paulus in Efesiërs 1:10 beskryf: „Om [aan] die volheid van die tye [’n bestuur] te reël, met die doel om alle dinge wat in die hemele sowel as wat op die aarde is, onder een hoof in Christus te verenig.” Die „klein kuddetjie” gesalfde Christene wat hemel toe gaan, sou eerste versamel word, en daarna die „groot menigte . . . uit alle nasies” wat daarna uitsien om behoue te bly tot in die regverdige „nuwe aarde” wat God beloof het.​—Lukas 12:32; Openbaring 7:3, 4, 9, 13-17; 21:1, 5.

2. Wat maak dit vir Jehovah se Getuies moontlik om „eensgesind” te spreek?

² „Eensgesind”​—dit is hoe hierdie getuies van Jehovah sy Koninkryksboodskap verkondig. Hoe is dit vir hulle moontlik om dit te doen? Dit is omdat hulle, rondom die aardbol, „dieselfde gesindheid [het] wat Christus gehad het” terwyl hy op aarde was. Hy was geen deel van hierdie trotse wêreld nie. Hy het homself eerder verneder om God se wil te doen en ’n hartlike, liefdevolle eenheid onder sy dissipels op te bou. Dit was die begin van ’n globale vereniging wat ware Christene gedurende die daaropvolgende eeue gekenmerk het.​—Filippense 2:5-8; Johannes 13:34, 35; 17:14.

3. (a) Watter skerp teenstelling kan vandag op die aarde gesien word? (b) Hoe help die Skrif om die wêreldwye vereniging van ware Christene te identifiseer?

³ Dit is gedurende hierdie „laaste dae” dat hierdie organisatoriese eenheid op die allerwonderlikste wyse tot uiting gekom het, en dit vorm ’n skerp teenstelling met die verdeeldheid in Satan se stelsel waar haat en wetteloosheid aan die orde van die dag is (2 Timotheüs 3:1-5, 13; Mattheüs 24:3, 12). Nog nooit tevore in die geskiedenis van die mensdom het daar reg rondom die aarde, in 203 lande, ’n organisasie bestaan waarvan die lede volkome eensgesind was wat geloof, oogmerk en werk betref het nie. Hierdie wêreldwye vereniging van Jesus se dissipels kan uitgeken word aan die vrugte wat dit voortbring.​—Mattheüs 7:20; Hebreërs 13:15; Galasiërs 5:22.

Eensgesinde optrede

4. (a) Watter geskil het in die eerste-eeuse gemeente ontstaan? (b) Met watter teokratiese aksie is daar volgens Handelinge 15:1-6 begin?

⁴ Eensgesinde optrede in Jehovah se organisasie word vir ons in Handelinge hoofstuk 15 toegelig. Stel jou ’n vergadering van ryp getuies van Jehovah voor​—die 12 apostels, ander ouere manne van die gemeente in Jerusalem en Paulus en Barnabas, ouere manne van die gemeente in Antiochië. In Antiochië, sowel as in Jerusalem, het sommige bekeerlinge uit die Jode daarop aangedring dat mense van die nasies besny moes word en die Wet van Moses moes onderhou om gered te word. Die apostels en die ouere manne het dus „vergader om hierdie saak te ondersoek”.​—Handelinge 15:1-6.

5-7. (a) In watter sin was daar „’n groot woordewisseling”? (b) Watter getuienis is gelewer? (c) Hoe is die Skrif gebruik? (d) Watter ryp uitspraak het Jakobus gelewer, en tot watter finale besluit het dit gelei? (e) Wat is toe gedoen?

⁵ Daar is ’n openhartige bespreking van die probleem, waartydens daardie toegewyde manne al die voor en teë lug. Hulle is nie bevooroordeeld nie. Hulle is bereid om die saak van alle kante te ondersoek. Daar is „’n groot woordewisseling”, maar hulle handhaaf klaarblyklik die orde en luister eerbiedig na mekaar se beskouings. Die apostel Petrus getuig van die feit dat God die heilige gees aan onbesnede mense van die nasies gegee het​—beslis sterk getuienis dat fisiese besnydenis nie meer ’n vereiste is vir diegene wat gered word nie. Barnabas en Paulus lewer soortgelyke getuienis en beskryf die talle wonders wat God deur hulle bediening onder die nasies verrig het.​—Handelinge 15:7-12.

⁶ Vervolgens haal Jakobus die Skrif aan ter ondersteuning van die argument wat pas tevore aangevoer is. Hy verduidelik dat Amos 9:11, 12 gewys het op die herstel van God se guns onder die Grotere Dawid, Jesus Christus, en hoedat Jehovah onverdiende goedheid sou betoon aan „al die nasies oor wie [sy] Naam uitgeroep is”. Jakobus sien geen rede waarom bekeerlinge uit die nasies belas moet word deur daarop aan te dring dat hulle besny moet word en al die reëls in die Wet van Moses moet onderhou nie. ’n Paar dinge is egter nodig: Hulle moet hulle onthou van afgodediens, van enige vorm van bloed en van geslagsonsedelikheid.​—Handelinge 15:13-21.

⁷ Die bestuursliggaam in Jerusalem neem ’n eenparige besluit. Boodskappers word na die gemeente in Antiochië gestuur met ’n brief wat afsluit met die bemoediging: „As julle jul hiervan onthou, sal julle goed doen. Vaarwel!”​—Handelinge 15:22-29.

Teokratiese prosedure

8. (a) Hoe word die hedendaagse Bestuursliggaam gelei om besluite te neem? (b) Wat is van die sake wat onlangs opgehelder is?

⁸ Vandag volg die Bestuursliggaam van Jehovah se Getuies, wat die Heer se „getroue en verstandige dienskneg” op aarde verteenwoordig, dieselfde apostoliese patroon (Mattheüs 24:45-47). Christelike ondervinding, voorligting uit die Bybel en die inwerking van Jehovah se gees help hierdie groep gesalfde Getuies om teokratiese gevolgtrekkings te maak oor sake wat vir die gemeente van groot belang is. In die laaste jare het die Bestuursliggaam byvoorbeeld die Skriftuurlike prosedure gevolg om sake soos die Bybelse beskouing van „bedienaars”, die Godgegewe gewete, die dra van dodelike wapens en die mate waarin aspekte van Jesaja se profesie op die toekomstige Paradys op aarde van toepassing is, op te helder.​—Vergelyk Johannes 14:26; 1 Korinthiërs 2:10.

9. Watter prosedure moet ouere manne volg wanneer hulle vandag probleme hanteer?

⁹ Die prosedure van Handelinge hoofstuk 15 moet vandag ook deur gemeentelike ouere manne gevolg word wanneer hulle probleme hanteer. Eers moet die probleem en feite wat daarop betrekking het duidelik gestel word. Laat betroubare getuies dan duidelike, feitlike getuienis lewer wat op die saak betrekking het. Ondersoek die Skrif om Jehovah se beskouing te verkry en maak ook gebruik van hulp wat beskikbaar is in die publikasies van die Wagtoringgenootskap. Lê julle biddend daarop toe om ’n eenparige oplossing te kry wat strook met die leer van Jehovah se Woord en wat die gemeente tot voordeel sal strek.​—Jesaja 48:17; 1 Korinthiërs 14:33.

Blydskap​—toe en nou

10. (a) Hoe moet teokratiese besluite ons vandag raak, net soos dit in die eerste-eeuse gemeente die geval was? (b) Hoe het hedendaagse verwikkelinge tot die versterking en vermeerdering van God se volk gelei?

¹⁰ Toe hulle van die bestuursliggaam se besluit verneem het, was lede van die gemeente in Antiochië „bly oor die bemoediging”. Jehovah se Getuies is vandag eweneens bly wanneer hulle leer van organisatoriese besluite en ophelderings van leerstellings wat die geestelike welsyn van God se volk en Jehovah se werk bevorder. (Vergelyk Titus 2:1.) Maar dit is nie meer vir die Bestuursliggaam nodig om briewe wat instruksies bevat met die hand te skryf en dit uit te stuur met boodskappers wat te voet reis nie. Moderne kommunikasiemiddele en drukfasiliteite in meer as 30 Wagtoringtakke rondom die aarde het dit moontlik gemaak om „die blye boodskap van die woord van die Here” in die kortste tyd na die miljoene lede van God se volk te bring. Dit word hoofsaaklik deur Die Wagtoring gedoen. Die gemeentes dwarsoor die wêreld word gevolglik steeds .versterk in die geloof sodat hulle elke dag vermeerder in getal’.​—Handelinge 15:30-16:5.

11. Hoe het Jehovah Die Wagtoring gebruik om Jesaja 30:18-21 te vervul?

¹¹ Diegene wat Die Wagtoring deur die jare heen gelees het, was ook bly om te sien dat sy oplaag toeneem. In die 105 jaar wat dit gepubliseer word, het dit toegeneem van 6 000 eksemplare in Engels een keer per maand tot 11 150 000 eksemplare in 102 tale waarvan al die vernaamste uitgawes halfmaandeliks verskyn. Die Wagtoring is onteenseglik op magtige wyse deur ons Grootse Onderrigter, Jehovah God, gebruik om die belofte te vervul: „Welgeluksalig almal wat op Hom wag! . . . en jou ore sal ’n woord agter jou hoor wat sê: Dit is die weg, wandel daarop! wanneer julle regs of wanneer julle links wil gaan.”​—Jesaja 30:18-21.

12. (a) Waarom het ons nou bykomende rede om bly te wees? (b) Hoe behoort hierdie nuwe reëling ons tot voordeel te strek?

¹² Nou is daar bykomende rede om bly te wees. Vanaf 1985 word Die Wagtoring, wat inhoud betref, gelyktydig in 23 tale uitgegee!a Al hierdie nommers het dieselfde voorblad. Hulle bevat dieselfde reeks inleidende artikels en dieselfde studieartikels. Dit maak ’n gelyktydige „voedingsprogram” moontlik wat Jehovah se volk saam geestelik sal laat groei „totdat ons almal kom tot die eenheid van die geloof”. Dit behoort ons nog verder te stimuleer sodat ons „die God en Vader van onse Here Jesus Christus eendragtiglik uit een mond verheerlik”.​—Efesiërs 4:13; Romeine 15:6.

13. (a) Hoe omvattend is hierdie program? (b) Hoe kan ons 1 Korinthiërs 1:10 in hierdie verband toepas?

¹³ Is dit nie, wanneer jy hierdie tydskrif tydens die weeklikse gemeentelike studie van Die Wagtoring in jou hand vashou, vir jou opwindend om te dink dat die meeste van jou broers oor die hele wêreld dieselfde geestelike voedsel op dieselfde dag inneem nie? Ja, dit sal die geval wees in die hele Noord- en Suid-Amerika, in die grootste deel van Europa, in Japan en op talle plekke in Suider-Afrika! Daar word geraam dat reeds meer as 90 persent van diegene wat die Wagtoring-studie rondom die wêreld bywoon​—bykans 2 500 000 persone elke week​—nou baat vind by hierdie gelyktydige „voedingsreëling”. Hulle word almal saam „verenig . . . in dieselfde gesindheid en in dieselfde mening” (1 Korinthiërs 1: 10). Wanneer omstandighede dit toelaat, sal ander tale bygevoeg word.

14. Hoe sal gesinne daarby baat vind?

¹⁴ Omdat hulle verskillende tale praat, het die lede van dieselfde gesin tot dusver bepaalde Wagtoring-artikels soms maande na mekaar bestudeer. Maar nou is hulle verenig in hierdie opsig. Immigrante-ouers wat ’n ander taal beter praat, kan byvoorbeeld nou met hulle Engelssprekende kinders gaan sit om saam dieselfde week se Wagtoring-les in albei tale voor te berei. In tweetalige gesinne sal ouers beter toegerus wees om die opdrag in Efesiërs 6:4 en 2 Timotheüs 4:14, 15 uit te voer.

15. (a) Wat kan ons nou, in ooreenstemming met Jesaja 52:8, 9, in ons openbare bediening doen? (b) Wat kan nou gedurende die vroeë deel van 1985 gedoen word, en wat sal in die toekoms moontlik wees?

¹⁵ Dink ook aan ons openbare bediening met die tydskrifte. Op hierdie bykomende manier kan Koninkryksverkondigers rondom die aardbol nou ,eenstemmig vreugdevol uitroep’ terwyl hulle identiese informasie op dieselfde tyd vir die wêreldpubliek aanbied (Jesaja 52:8, 9, NW). Wanneer verkondigers met tydskrifte straatwerk doen in veeltalige gebiede, kan hulle tydskrifte met dieselfde tema op die voorblad in twee of meer tale vertoon. Dink net daaraan! Gedurende die vroeë deel van 1985 sal Koninkryksverkondigers oor die hele wêreld kragtige, verenigde getuienis oor Armageddon lewer! Mettertyd sal Jehovah moontlik sy volk rig om ander kragtige, verenigde deklarasies wêreldwyd te doen terwyl hulle „saam stry vir die geloof van die evangelie” (Filippense 1:27). Die gelyktydige publikasie van Die Wagtoring in baie tale sal sulke uitsprake moontlik maak.​—Vergelyk Daniël 11:44.

Wat die toekoms inhou

16. (a) Wat deel hierdie Wagtoring ons op bladsye 8, 9 en 25 mee omtrent tydskrifwerk? (b) Waarom het mense vandag ons tydskrifte nodig?

¹⁶ Gedurende die jaar 1984 het Jehovah se Getuies die twee tydskrifte Die Wagtoring en Ontwaak! wyd versprei. Hierdie bedrywigheid is ryklik deur Jehovah geseën, soos blyk uit die gegewens wat op bladsye 8, 9 en 25 van hierdie tydskrif verskyn. Gedurende 1984 het die verspreiding van ons tydskrifte in die veld wêreldwyd toegeneem met 11,1 persent tot ’n groottotaal van 287 358 064, terwyl intekeninge op die tydskrifte met 3,2 persent toegeneem het tot 1 812 221. Dit ly geen twyfel dat al hoe meer mense wil weet waarom die nasies in benoudheid verkeer en ,radeloos’ is nie (Lukas 21:25, 26). Ouers wil ’n gelukkige toekoms vir hulle kinders hê​—iets beters as ’n aarde wat in ’n kernoorlog veras is. Ons tydskrifte bied ’n lewende hoop!​—Mattheüs 12:18, 21; Romeine 15:4.

17. Hoe sal ons tydskrifte ons help om die Duiwel te weerstaan?

¹⁷ Wat nou van 1985? Die boodskap in Die Wagtoring en Ontwaak! word al hoe sterker bewoord. Dit is wat ons kan verwag namate die laaste dae vir Satan se wêreld ten einde loop (Openbaring 12:12). Moenie ’n fout begaan nie! Die Duiwel wil ons graag ontmoedig sodat ons nie gereeld aan Jehovah se diens deelneem nie. Ja, Satan wil ons graag skei van die liggaam van God se volk en die bedrywigheid daarvan, en ons aldus verslind (1 Petrus 5:8). Maar ons kan hom weerstaan deur gereeld bymekaar te kom om juiste kennis in te neem en deur hierdie breër kennis te gebruik om Jehovah te dien.​—Efesiërs 6:11, 14-16; Kolossense 1:9-11.

18. (a) Hoe groot is jou verantwoordelikheid as Koninkryksverkondiger? (b) Hoe kan ons die raad in Romeine 12:10, 11 en 15:5, 6 toepas?

¹⁸ Is jy ’n Koninkryksverkondiger? Dan beklee jy die sleutelposisie in die hedendaagse teokratiese gemeenskap. As ’n toegewyde Christen het jy moontlik ander verantwoordelikhede in die gemeente. Maar om Jehovah se naam hoog te hou, moet jy ’n ywerige bedienaar in die veld wees. Verenig in broederliefde en met tere toegeneentheid vir mekaar, moet ons almal voortgaan om vurig van gees te wees terwyl ons ,Jehovah dien’ (Romeine 12:10, 11). Ongeag watter druk Satan en sy wêreld op ons uitoefen, ons moet voortgaan om Jehovah te verheerlik deur sy Koninkryksvoornemens soos een man, ja, ,eendragtiglik uit een mond’ bekend te maak.

19. (a) Hoe kan ons vervolging en ander probleme met welslae die hoof bied? (b) Watter raad bevat Sefanja 3:8, 9 vir ons?

¹⁹ Baie van ons het te kampe met vervolging, of daar is gebiede waar mense nie op ons prediking reageer nie. Maar laat ons voortgaan om dieselfde gesindheid te openbaar wat Christus Jesus gehad het (Johannes 16:33; 1 Petrus 4:1, 2). As ’n verenigde liggaam moet ons ware moed aan die dag lê​—die innerlike, geestelike krag wat voortduur en nie onder druk verbrokkel nie (Psalm 27:14; Filippense 1:14). Ons moet nooit die hand laat verslap in die soektog na „skape” nie. Ons moet Jehovah en sy dag van afrekening „verwag” en hom skouer aan skouer dien terwyl ons sy naam aanroep en die „suiwer taal” van die waarheid spreek.​—Sefanja 3:8, 9, NW.

20. (a) Hoe kan ons ware geluk vind? (b) Watter merkwaardige vervulling het Jesaja 11:6-9 gehad?

²⁰ Mag almal wat God verheerlik hulle eendragtig „met die nuwe persoonlikheid beklee wat geskape is na God se wil in ware regverdigheid en lojaliteit” (Efesiërs 4:24, NW). Dit bring ware geluk mee. Dit word toegelig in Jesaja 11:6-9, wat vertel van die geestelike paradys wat nou onder Jehovah se herstelde volk bestaan. Watter vrede en harmonie tog! Daar is geen hebsug of skadelike karaktertrekke nie! Aan die einde van hierdie paradysbeskrywing lees ons hierdie woorde: „Hulle sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek.” Jehovah se „heilige berg” van verenigde aanbidding is vandag stewig oor die hele aarde gevestig. Waarom? Dit is omdat Jehovah sy getuies beweeg het om sy naam ,eendragtiglik en uit een mond’ te verheerlik. Op hierdie manier is „die aarde”, die geestelike staat van Sy volk, met die „kennis van die HERE” vervul.

21. Waarom moet ons ons tydskrifte so wyd moontlik versprei?

²¹ Mag ons, in die krag wat Jehovah verleen, Die Wagtoring en sy medetydskrif Ontwaak! so wyd moontlik versprei. En laat ons dit doen in die hoop dat al die eindes van die aarde en al die geslagte van die nasies, in verteenwoordige sin, ,daaraan sal dink en hulle tot Jehovah bekeer’.​—Psalm 22:28; Openbaring 15:4.

[Voetnote]

Ter hersiening van hierdie artikel—

◻ Hoe het die eerste-eeuse gemeente gefunksioneer?

◻ Watter voordele behoort die gelyktydige publikasie van Die Wagtoring in te hou?

◻ Watter uitstekende werk is in 1984 in verband met tydskrifverspreiding gedoen?

◻ Hoe kan ons geestelik voorspoedig wees, selfs in tye van beproewing?