Gileadgegradueerdes aangespoor om goeie kommunikasievermoëns aan te kweek

OP SONDAG 4 Maart 1990, het meer as 4 100 mense die Jersey City-byeenkomssaal van Jehovah se Getuies gevul vir die gradueringsplegtigheid van die 88ste klas van die Wagtoring-Bybelskool Gilead. Die 24 gegradueerdes het uit 6 lande gekom en sou nou na altesaam 13 lande gestuur word.

Die program het om 10:00 vm. begin. Na ’n lied het George Gangas, reeds oor die 90 en ’n lid van die Bestuursliggaam, die vergadering met ’n vurige gebed tot Jehovah geopen. Daarna het die voorsitter, C. W. Barber, ook ’n lid van die Bestuursliggaam en self ’n gegradueerde van die 26ste klas van Gilead, kortliks party van die skielike veranderinge op die wêreldtoneel bespreek. Hy het afgesluit deur te sê: “Daar was nog nooit so ’n wonderlike geleentheid om getuies van Jehovah se oppermag en sy regverdigheid te wees nie.” Toe het hy die sprekers vir die oggendprogram aangekondig.

Vernon Wisegarver, ’n lid van die Fabriekskomitee in Brooklyn, het die tema “Wees bedrewe in julle werk” gekies. Hy het die illustrasie gebruik van ’n ystersmid wat ’n sterk ketting gesmee het wat, toe dit aan ’n anker vasgemaak is, gedurende ’n storm die lewens van almal op ’n skip gered het, en hy het die Gileadgegradueerdes met die ystersmid vergelyk. Deurdat hulle mense die Bybel leer deur die vaardighede te gebruik wat hulle tydens hulle Gileadopleiding aangeleer het, sal hulle hul help om ’n reddingsketting van godvrugtige eienskappe te smee. Hy het die gegradueerdes aangespoor om hulle onderrigvermoëns gedurig te verbeter en as “bedrewe werkers” voor die allergrootste Koning te staan.

Daarna het John Barr, ’n lid van die Bestuursliggaam, gepraat oor die onderwerp “Smaak en sien dat Jehovah goed is.” Sy woorde was gebaseer op Psalm 34:9 wat sê: “Smaak en sien dat die HERE goed is; welgeluksalig is die man wat by Hom skuil!” Hy het hulle vermaan: “Beproef alles in julle sendingtoewysing. Probeer alles. Moenie bang wees daarvoor nie. Dan sal julle Jehovah se goedheid op ’n manier kan ervaar soos nog nooit tevore nie. Julle moet nooit kieskeurig wees nie. Julle moet nooit sê: ‘Ek hou nie hiervan nie.’ Proe dit.”

Charles Woody, ’n lid van die Diensafdelingkomitee in Brooklyn, het gepraat oor sy gekose onderwerp: “Hoe om ’n gebalanseerde beskouing van onsself te behou.” Hy het gesê: “Dit is vir ons aangenaam om by mense te wees wat ’n gebalanseerde beskouing van hulleself het, wat nie altyd hulle sin moet kry nie, wat gou is om ander te prys en op te bou, en wat, al besit hulle kennis, ander nie laat voel dat hulle niks weet nie.” Hy het verder gesê: “As sendelinge moet julle mense na die waarheid aantrek, nie afstoot nie. Julle nederige gesindheid sal baie waardevol wees om julle te help om dit te bereik.”

Lyman Swingle, ’n lid van die Bestuursliggaam, het daarna gepraat oor die tema “Wat sal ons uit die volgende hoofstukke leer?” Hy het begin deur te sê: “Vandag begin julle ’n nuwe hoofstuk in julle lewe. Wat sal julle van nou af in hierdie hoofstukke skryf?” Hy het hulle herinner: “Alles wat julle doen, moet Jehovah eer en verheerlik”, en hy het bygevoeg: “Sorg dat julle besluite op God se Woord gebaseer is. Onthou Spreuke 3:7, wat sê: ‘Wees nie wys in jou eie oë nie.’ Voer julle toewysing getrou uit.” Hy het afgesluit met die woorde: “Ons vertrou dat julle nooit sal ophou om julle lewensverhaal te skryf nie, dat julle vir ewig sal lewe.”

Daarna het Jack Redford, een van die skool se instrukteurs, die gegradueerdes vermaan: “Wees lewende offers.” Hy het begin deur te sê: “Sendingdiens is ’n lewe van opoffering. . . . Ons het julle lief weens julle selfopofferende gees.” Hy het aangehaal uit Filippense 2:17, waar Paulus gesê het dat hy soos ’n drankoffer uitgegiet is, wat beteken het dat hy bereid was om homself as ’n lewende offer in te span, en gevra: “Maar hoe is sendelinge dikwels soos drankoffers?” Toe het hy twee ondervindinge vertel van sendelinge wat hulle meer as wat van hulle verwag word, ingespan het. Die een het self 16 000 bakstene gemaak en die eerste Koninkryksaal in die land waar hy gewerk het, gebou. Die ander ondervinding was van ’n suster wat saam met haar man in die oerwoud ingegaan het, waar lewensomstandighede baie primitief was. Al die plaaslike susters het haar waardeer omdat hulle besef het dat sy haar as ’n ‘lewende offer’ uitgiet. Maar toe het die spreker die studente daaraan herinner dat offerandes waardeloos is as dit nie met gehoorsaamheid gepaard gaan nie. Hy het die verslag van koning Saul en die Amalekiete gebruik en die studente vermaan: “Onthou altyd dat gehoorsaamheid beter is as offerande. Moet nooit met Jehovah probeer onderhandel nie. Doen altyd wat hy vir julle sê.”

Hierna het die voorsitter die ander instrukteur van die skool, Ulysses Glass, aan die woord gestel. Broer Glass het begin deur te sê: “Die 88ste klas was en is ’n gelukkige klas. Ander klasse was ook gelukkig. Waarom is julle geluk dan iets besonders?” Hy het getoon dat geluk “nie die oogmerk van goeie werke is nie, maar die gevolg daarvan. Dit is die proses om iets te bereik wat die beloning meebring.” Hy het ’n skrywer aangehaal wie se lewe verander is toe hy die uitdrukking “Sukses is ’n reis, nie ’n bestemming nie” gesien het. Die skrywer het hom voorgeneem dat hy nie meer geluk sou meet aan wat hy bereik het nie, maar dat hy sy lewe eerder as ’n voortdurende reis sou sien. “Daar is geen pad na geluk nie”, het hy gesê. “Geluk is die pad.” Broer Glass het toe gesê dat hierdie klas die kern van daardie woorde weerspieël het. Hy het afgesluit met woorde uit die 84ste Psalm en gesê: “Hou aan om in waterryke plekke te wandel. Ongeag die probleme wat julle ervaar, mag die geluk wat aan diegene behoort wat Jehovah liefhet en vrees ook julle s’n wees.”

Die hooftoespraak van die oggend het daarna gevolg. Dit is deur nog ’n lid van die Bestuursliggaam, Karl Klein, gehou, en hy het die tema, “Kweek Christelike kommunikasie aan”, gekies. Hy het begin deur almal daaraan te herinner dat Jehovah die beste kommunikeerder is. Sy eniggebore Seun, die Logos, is as Jehovah se Hoofwoordvoerder gebruik, en hy het God se wil en instruksies aan die aardse skepping meegedeel. Toe Jesus op aarde was, was die skares verwonderd oor sy manier van onderrig. Hulle het nooit tevore ’n man soos hy hoor praat nie. In Mattheüs 28:19 het Jesus sy dissipels aangespoor om goeie kommunikeerders te wees deur in die wêreld uit te gaan en sy gebooie aan ander te leer en ook van hulle dissipels te maak.

Toe het broer Klein direk met die toekomstige sendelinge gepraat en gesê dat daar vier aspekte is waarop sendelinge hulle moet toespits om goeie kommunikasievermoëns aan te kweek: tussen man en vrou, met ander in die sendinghuis, met diegene in die takkantoor waar hulle toegewys word en met dié wat hulle in die velddiens ontmoet. “Voor jy jou mond oopmaak, begin jy al kommunikeer”, het broer Klein gesê. “Jou houding en persoonsversorging gee die huisbewoner sekere indrukke omtrent jou.” Hy het vervolgens etlike illustrasies gebruik om sy punt te staaf en het met hierdie vermanings afgesluit: “Wees nederig. Hou die kommunikasiekanale oop. Strewe daarna om beter kommunikeerders te wees.”

Nadat boodskappe van groete gelees is, het die voorsitter diplomas aan elkeen van die gegradueerdes oorhandig. Toe het Paul Angerville uit Guadeloupe namens die klas ’n resolusie wat aan die Bestuursliggaam en die Bethelgesin gerig is, voorgelees.

Die middagsessie het met ’n Wagtoring-studie begin. Daarna het die studente ’n program aangebied wat die gehoor die geleentheid gegee het om te sien hoe die atmosfeer in hulle klasse was, om die informele gesellighede in hulle kamers waar te neem en om baie van hulle ondervindinge in die velddiens tydens hulle vyf maande in Gilead te hoor. Ten laaste was daar ’n puik drama met die tema Doen wat reg is in Jehovah se oë. Verkondigers van die Lyndhurst-gemeente, New Jersey, het die drama aangebied. Die dag is afgesluit met ’n slotlied, waarna Fred Franz, die Genootskap se 96-jarige president, ’n gebed gedoen het.

[Venster op bladsy 27]

KLASSTATISTIEK

Aantal lande verteenwoordig: 6

Aantal lande waarheen gestuur: 13

Aantal ongetroude broers: 2

Aantal egpare: 11

Aantal studente: 24

Gemiddelde ouderdom: 32,7

Gemiddelde jare in die waarheid: 14

Gemiddelde jare in voltydse bediening: 9

[Prent op bladsy 26]

88ste Gradueringsklas van die Wagtoring-Bybelskool Gilead

In die lys hieronder word rye van voor na agter genommer, en name word van links na regs in elke ry aangegee. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.