Hou die dag van Jehovah goed in gedagte

“Naby is die dag van die HERE [Jehovah] in die dal van beslissing!”—JOËL 3:14, vgl. NW.

1. Waarom sal die komende heilige oorlog wat deur Jehovah uitgeroep word anders wees as die “heilige” oorloë van die mensdom?

“ROEP dit uit onder die nasies, heilig ’n oorlog!” (Joël 3:9). Beteken dit ’n heilige oorlog? As ons terugdink aan die Kruistogte, die godsdiensoorloë en die twee wêreldoorloë—waarin die Christendom ’n hoofrol gespeel het—sidder ons dalk by die gedagte aan ’n ‘heilige’ oorlog. Maar die heilige oorlog van Joël se profesie is nie ’n oorlog tussen die nasies nie. Dit is nie ’n bittere stryd om gebied of besittings, waarin godsdiens as ’n verskoning gebruik word nie. Dit is ’n regverdige oorlog. Dit is God se oorlog om die aarde van hebsug, tweedrag, korrupsie en verdrukking te bevry. Dit sal Jehovah se regmatige soewereiniteit oor sy hele skeppingsryk regverdig. Daardie oorlog sal die weg baan vir Christus se Koninkryk om die mensdom in die Millennium van wêreldwye vrede, voorspoed en geluk in te lei wat deur God se profete voorspel is.—Psalm 37:9-11; Jesaja 65:17, 18; Openbaring 20:6.

2, 3. (a) Wat is ‘die dag van Jehovah’ wat in Joël 3:14 voorspel word? (b) Waarom verdien die nasies die dinge wat gedurende daardie dag oor hulle sal kom?

² Maar wat is ‘die dag van Jehovah’ wat in Joël 3:14 voorspel word? “Ag, die dag!”, roep Jehovah self uit, “want naby is die dag van die HERE, en hy kom soos ’n verwoesting van die Almagtige.” In watter sin is dit ’n verwoesting? Die profeet verduidelik later: “Menigtes, menigtes in die dal van beslissing, want naby is die dag van die HERE in die dal van beslissing!” (Joël 1:15; 3:14). Dit is die dag waarop Jehovah sy regterlike beslissing voltrek aan die goddelose menigtes van die mensdom wat sy regmatige soewereiniteit oor hemel en aarde verwerp. Dit is Jehovah se beslissing om die sataniese stelsel van dinge waarin die mensdom al so lank vasgevang is te verwoes.—Jeremia 17:5-7; 25:31-33.

³ Die verdorwe stelsel op aarde moet besef dat hy voor daardie beslissing staan. Maar is die wêreldstelsel werklik so sleg? Een kykie na sy geskiedenis is voldoende! Jesus het in Mattheüs 7:16 ’n beginsel gemeld: “Aan hulle vrugte sal julle hulle ken.” Het die wêreld se groot stede nie moerasse van dwelmmisbruik, misdaad, vrees, onsedelikheid en besoedeling geword nie? In baie lande word nuutgevonde vryheid deur politieke verwarring, voedseltekorte en armoede gekniehalter. Meer as ’n miljard mense het nie genoeg kos om van te lewe nie. Daarbenewens werp die vigs-epidemie, wat deur dwelms en ’n onsedelike lewenswyse aangehelp word, ’n donker skaduwee oor ’n groot deel van die aarde. Veral sedert die uitbreek van die Eerste Wêreldoorlog in 1914 het ons wêreldwyd op elke lewensterrein agteruitgang gesien.—Vergelyk 2 Timotheüs 3:1-5.

4. Watter uitdaging rig Jehovah aan die nasies?

⁴ Maar Jehovah het uit al die nasies ’n volk versamel wat met graagte in sy weë onderrig word en in sy paaie wandel. Hierdie volk wat oor die hele wêreld gevind word, het van hulle swaarde pikke gesmee en die gewelddadige weë van die wêreld verwerp (Jesaja 2:2-4). Ja, van hulle swaarde pikke! Maar is dit nie die teenoorgestelde van die uitroep wat Jehovah in Joël 3:9, 10 laat hoor nie? Daar lees ons: “Roep dit uit onder die nasies, heilig ’n oorlog! Wek die helde op, laat al die krygsmanne nader kom, opruk! Smee van julle pikke swaarde en van julle snoeimesse spiese.” Ja, hier rig Jehovah ’n uitdaging aan die wêreld se heersers om met hulle gekombineerde krygsmag tydens Armageddon teen hom op te trek. Maar hulle kan nie ’n oorwinning behaal nie! Hulle sal geheel en al verslaan word!—Openbaring 16:16.

5. Wat sal die gevolge wees wanneer “die wingerdstok van die aarde” insamel word?

⁵ Magtige heersers het arsenale vol skrikwekkende wapens opgebou om die Soewereine Heer Jehovah uit te tart—maar dit is tevergeefs! Jehovah gee die bevel in Joël 3:13: “Steek die sekel in, want die oes is ryp! Kom trap, want die parskuip is vol, die kuipe loop oor! Want hulle boosheid is groot.” Daardie woorde stem ooreen met dié in Openbaring 14:18-20, waar ’n engel met ’n skerp sekel beveel word: “Samel die trosse van die wingerdstok van die aarde in, want sy druiwe het ryp geword.” Die engel steek sy sekel in en gooi daardie uittartende nasies “in die groot parskuip van die grimmigheid van God”. Figuurlik gesproke kom bloed uit die parskuip tot aan die tooms van die perde oor ’n afstand van 1 600 stadieë—ongeveer 300 kilometer (vgl. NW)! Wat ’n skrikwekkende vooruitsig vir die nasies wat Jehovah smaad!

Wetsgehoorsame burgers

6. Hoe beskou Jehovah se Getuies die nasies en hulle heersers?

⁶ Beteken dit dat Jehovah se Getuies geen respek vir die nasies en hulle heersers het nie? Beslis nie! Hulle verafsku bloot die korrupsie wat vir almal duidelik sigbaar is, en hulle waarsku dat Jehovah se dag om sy beslissing te voltrek vinnig nader kom. Hulle is terselfdertyd nederig gehoorsaam aan die apostel Paulus se voorskrif in Romeine 13:1: “Laat elke mens hom onderwerp aan die magte [“hoër owerhede”, NW] wat oor hom gestel is.” Hulle gee hierdie menseheersers die eer wat hulle toekom, maar nie aanbidding nie. As wetsgehoorsame burgers volg hulle Bybelstandaarde van eerlikheid, waarheidliewendheid en reinheid en skerp hulle goeie sedes by hulle gesinne in. Hulle help ander om te leer hoe hulle dit ook kan doen. Hulle lewe in vrede met alle mense en raak nie betrokke by demonstrasies of politieke revolusies nie. Jehovah se Getuies streef daarna om voorbeeldig te wees in die nakoming van die wette van die menslike hoër owerhede, terwyl hulle op die Opperste Owerheid, die Soewereine Heer Jehovah, wag om volmaakte vrede en regverdige heerskappy op hierdie aarde te herstel.

Die voltrekking van sy beslissing

7, 8. (a) In watter opsig sal die nasies geskud word en duisternis oor hulle toesak? (b) Wie word vandag deur Joël afgebeeld, en hoe word hulle geseën, in teenstelling met die wêreld oor die algemeen?

⁷ Jehovah gee in aanskoulike beeldspraak hierdie verdere beskrywing van die voltrekking van sy beslissing: “Die son en die maan word duister, en die sterre trek hulle glans in. En die HERE brul uit Sion, en uit Jerusalem verhef Hy sy stem, sodat hemel en aarde bewe. Maar die HERE sal ’n toevlug wees vir sy volk en ’n skuilplek vir die kinders van Israel” (Joël 3:15, 16). Die oënskynlik glansryke, voorspoedige toestand van die mensdom sal donker en onheilspellend word, en hierdie verbrokkelende wêreldstelsel sal uitmekaargeskud word, vernietig word soos deur ’n groot aardbewing!—Haggai 2:20-22.

⁸ Let op die vreugdevolle versekering dat Jehovah ’n toevlug en ’n skuilplek vir sy volk sal wees! Waarom? Omdat hulle die een volk is—’n internasionale volk—wat op Jehovah se woorde ag geslaan het: “Julle sal moet weet dat ek Jehovah julle God is” (Joël 3:17, NW). Aangesien Joël se naam “Jehovah is God” beteken, beeld hy gepas Jehovah se hedendaagse gesalfde Getuies af, wat Jehovah se soewereiniteit met vrymoedigheid verkondig. (Vergelyk Maleagi 1:11.) As ons na die openingswoorde van Joël se profesie blaai, sal ons sien hoe duidelik hy die bedrywigheid van God se hedendaagse volk voorspel.

’n Sprinkaanplaag

9, 10. (a) Watter plaag word deur Joël voorspel? (b) Hoe word Joël se profesie van ’n plaag in Openbaring herhaal, en watter uitwerking het hierdie plaag op die Christendom?

⁹ Luister nou na “die woord van die HERE [Jehovah] wat tot Joël . . . gekom het”: “Hoor dit, o oudstes, en luister, alle inwoners van die land! Het so iets ooit in julle dae of in die dae van julle vaders plaasgevind? Vertel daarvan aan julle kinders, en julle kinders aan hulle kinders, en húlle kinders aan die volgende geslag: Wat die afknyper laat oorbly het, het die treksprinkaan verslind; en wat die treksprinkaan laat oorbly het, het die voetganger verslind; en wat die voetganger laat oorbly het, het die kaalvreter verslind.”—Joël 1:1-4, vgl. NW.

¹⁰ Dit is ’n buitengewone veldtog, ’n veldtog wat vir altyd herdenk sal word. Die een swerm insekte na die ander, grotendeels sprinkane, verwoes die land. Wat beteken dit? Openbaring 9:1-12 praat ook van ’n plaag sprinkane, wat deur Jehovah gestuur word onder ’n “koning . . . die engel van die afgrond”, wat niemand anders as Christus Jesus is nie. Sy naam Abaddon (Hebreeus) en Apollion (Grieks) beteken “Vernietiging” en “Vernietiger”. Hierdie sprinkane beeld die gesalfde oorblyfsel van Christene af wat nou in die dag van die Here uitgaan om die Christendom se weivelde te verwoes deur valse godsdiens geheel en al aan die kaak te stel en Jehovah se wraak oor hulle te verkondig.

11. Hoe word die hedendaagse sprinkane se geledere versterk, en wie word veral deur hulle aangeval?

¹¹ Soos Openbaring 9:13-21 aandui, word die sprinkaanplaag gevolg deur ’n groot plaag van perderuiters. Hoe waar is dit tog vandag, aangesien die paar duisend oorblywende gesalfde Christene se geledere versterk word deur meer as viermiljoen “ander skape”, en tesame maak hulle ’n onstuitbare leër van perderuiters uit! (Johannes 10:16). Hulle verkondig eensgesind Jehovah se snydende oordele oor die Christendom se afgodedienaars en oor diegene wat “nie bekeer van hul moorde en hul towerye en hul hoerery en hul diefstalle nie”. Geestelikes—van die Katolieke Kerk sowel as van Protestantse kerke—wat die bloeddorstige oorloë van hierdie eeu daadwerklik ondersteun het, asook pedofiliese priesters en perverse TV-evangeliste, is onder diegene teen wie hierdie oordeelsboodskappe gerig word.

12. Waarom verdien die leiers van die Christendom die oordeelsboodskappe wat hulle ontvang, en wat sal binnekort met hulle, asook alle lidmate van Babilon die Grote, gebeur?

¹² Jehovah rig sy uitroep aan sulke verdorwe geestelikes: “Word wakker, julle dronkaards, en ween! En huil, al julle wyndrinkers! Oor die mos, omdat dit van julle mond weggeruk is” (Joël 1:5). In hierdie 20ste eeu het die Christendom se godsdiens die rein sedelike beginsels van God se Woord vir die wêreld se permissiwiteit verruil. Dit het vir valse godsdiens en sy lidmate lekker gelyk om die wêreld se weë na te volg, maar wat ’n oes van geestelike en liggaamlike siektes het hulle tog nie gemaai nie! Soos Openbaring 17:16, 17 beskryf, sal dit binnekort God se “bedoeling” wees dat die politieke magte die hele wêreldryk van valse godsdiens, Babilon die Grote, aanval en hom verlate maak. Slegs dan, wanneer hy sien hoe Jehovah se beslissing aan hom voltrek word, sal hy ‘wakker word’ uit sy dronkroes.

“’n Talryke en magtige volk”

13. In watter opsig lyk die sprinkaanswerm vir die Christendom ‘talryk en magtig’?

¹³ Jehovah se profeet beskryf die sprinkaanswerm verder as “’n talryke en magtige volk”, en dit is hoe dit vir Babilon die Grote lyk (Joël 2:2). Sy geestelikes betreur byvoorbeeld die feit dat die Christendom se godsdienste nie bekeerlinge in Boeddhistiese Japan kon maak nie. Maar daar is vandag meer as 160 000 Japannese Getuies van Jehovah bedrywig in daardie land, en hulle hou persoonlike Bybelstudies in meer as 200 000 huise van die mense. In Italië word die 180 000 Getuies van Jehovah nou erken as die grootste groep naas die Katolieke. ’n Rooms-Katolieke monseigneur in Italië het tevergeefs die feit betreur dat Jehovah se Getuies elke jaar ‘ten minste 10 000 getroue Katolieke’ van die kerk afrokkel.a Die Getuies verwelkom graag sulke mense.—Jesaja 60:8, 22.

14, 15. Hoe beskryf Joël die sprinkaanswerm, en hoe word dit vandag vervul?

¹⁴ Joël 2:7-9 beskryf die sprinkaanswerm van gesalfde Getuies en sê: “Soos helde hardloop hulle, soos krygsmanne klim hulle op die muur, en elkeen gaan sy eie koers; hulle verander nie van pad nie. En die een druk nie die ander nie; elkeen gaan sy eie pad; en tussen wapens deur val hulle; maar hulle bly in gelid. Hulle oorval die stad, hulle hardloop op die muur, hulle klim in die huise, hulle dring by die vensters in soos ’n dief.”

¹⁵ Inderdaad ’n aanskoulike uitbeelding van die leër van gesalfde “sprinkane”, by wie meer as viermiljoen metgeselle, die ander skape, hulle nou aangesluit het! Geen “muur” van godsdiensvyandigheid kan hulle terughou nie. Hulle gaan onverskrokke ‘voort om ordelik te wandel in dieselfde roetine’ van openbare getuieniswerk en ander Christelike bedrywighede. (Vergelyk Filippense 3:16, NW.) Pleks van hulle geloof te versaak, was hulle bereid om te sterf, soos die duisende Getuies wat ‘tussen wapens deur geval’ het omdat hulle geweier het om Katolieke Hitler van Nazi-Duitsland heil toe te roep. Die sprinkaanswerm het ’n deeglike getuienis in “die stad” van die Christendom gegee, deur alle struikelblokke te bowe te kom en hulle huise as ’t ware soos ’n dief binne te dring terwyl hulle miljarde stukke Bybellektuur in hulle werk van huis tot huis versprei het. Dit is Jehovah se wil dat hierdie getuienis gegee word, en geen mag in die hemel of op die aarde kan dit keer nie.—Jesaja 55:11.

“Vervul met die Heilige Gees”

16, 17. (a) Wanneer het die woorde in Joël 2:28, 29 ’n merkwaardige vervulling gehad? (b) Watter profetiese woorde van Joël is nie in die eerste eeu ten volle vervul nie?

¹⁶ Jehovah sê aan sy Getuies: “Julle sal weet dat Ek in die midde van [geestelike] Israel is, en dat Ek die HERE julle God is, en niemand anders nie” (Joël 2:27). Sy volk het dit goed besef toe Jehovah sy woorde in Joël 2:28, 29 begin vervul het: “Ek [sal] my Gees uitgiet op alle vlees, en julle seuns en julle dogters sal profeteer.” Dit het op Pinkster 33 G.J. gebeur, toe Jesus se vergaderde dissipels gesalf is ‘en hulle almal met die Heilige Gees vervul is’. Hulle het in die krag van heilige gees gepreek, en daar is op die een dag “omtrent drieduisend siele toegebring”.—Handelinge 2:4, 16, 17, 41.

¹⁷ By daardie heuglike geleentheid het Petrus Joël 2:30-32 ook aangehaal (vgl. NW): “Ek sal wondertekens gee aan die hemel en op die aarde: bloed en vuur en rookpilare. Die son sal verander word in duisternis en die maan in bloed, voordat die groot en deurlugtige dag van die HERE [Jehovah] kom. En elkeen wat die Naam van die HERE [Jehovah] aanroep, sal gered word.” Daardie woorde het ’n gedeeltelike vervulling gehad toe Jerusalem in 70 G.J. vernietig is.

18. Wanneer het die grotere vervulling van Joël 2:28, 29 begin plaasvind?

¹⁸ Daar sou egter ’n verdere toepassing van Joël 2:28-32 wees. Trouens, hierdie profesie het sedert September 1919 ’n merkwaardige vervulling ondergaan. ’n Gedenkwaardige byeenkoms van Jehovah se volk is destyds by Cedar Point, Ohio, VSA, gehou. Dit was duidelik dat God se gees daar teenwoordig was, en sy gesalfde knegte is aangespoor om die wêreldwye getuieniskampanje aan te pak wat in ons dag nog voortgesit word. Watter wonderlike uitbreiding het dit nie tot gevolg gehad nie! Die meer as 7 000 wat die byeenkoms in Cedar Point bygewoon het, het toegeneem tot altesaam 10 650 158 wat die herdenking van Jesus se dood op 30 Maart 1991 bygewoon het. Van hulle verklaar slegs 8 850 dat hulle gesalfde Christene is. Hoe groot is almal se vreugde tog om die vrugte te sien wat wêreldwyd deur Jehovah se dinamiese gees voortgebring word!—Jesaja 40:29, 31.

19. Wat moet elkeen van ons se gesindheid wees met die oog op die feit dat Jehovah se dag so naby is?

¹⁹ “Die groot en deurlugtige dag van die HERE [Jehovah]” wat Satan se stelsel van dinge gaan vernietig, lê voor die deur (Joël 2:31). Gelukkig sal ‘elkeen wat die Naam van Jehovah aanroep, gered word’ (Handelinge 2:21). Hoe so? Die apostel Petrus vertel vir ons dat “die dag van die Here sal kom soos ’n dief in die nag” en voeg by: “Terwyl al hierdie dinge dan vergaan, hoedanig moet julle nie wees in heilige wandel en godsvrug nie?—julle wat die koms van die dag van God verwag en verhaas [“goed in gedagte hou”, NW].” As ons in gedagte hou dat Jehovah se dag naby is, sal ons ook verheug wees om die vervulling te sien van Jehovah se belofte van ’n regverdige “nuwe hemele en ’n nuwe aarde”.—2 Petrus 3:10-13.

[Voetnoot]

Kan jy verduidelik?

◻ Wat is ‘die dag van Jehovah’?

◻ Hoe sal “die wingerdstok van die aarde” ingesamel word, en waarom?

◻ In watter opsig word die Christendom sedert 1919 deur ’n sprinkaanplaag geteister?

◻ Hoe is Jehovah se gees in 33 G.J., en weer in 1919, op sy volk uitgegiet?