Ouere manne—Help ander reg in ’n gees van sagmoedigheid
DIE hart van ’n ware Christen kan vergelyk word met ’n geestelike tuin wat goeie vrugte voortbring. Liefde, vreugde, vrede, lankmoedigheid, goedhartigheid, goedheid, geloof, sagmoedigheid en selfbeheersing sal gewoonlik daar gedy. En waarom nie? Hierdie is trouens die vrugte van die heilige gees wat deur Jehovah God aan sy toegewyde knegte gegee word (Galasiërs 5:22). Nogtans moet elke Christen wat graag die tuin van sy hart in stand wil hou sodat dit vir sy hemelse Vader ’n welgevallige plek is ’n kragtige, voortdurende stryd teen die onkruid van oorgeërfde sonde voer.—Romeine 5:5, 12.
Soms begin iets ongewens in ’n godvrugtige persoon se onvolmaakte hart groei. Hy of sy het dalk ’n voortreflike geestelike verlede gehad. Maar dan duik daar die een of ander probleem op wat moontlik sy oorsprong het by ongesonde assosiasie of ’n onverstandige besluit. Hoe kan gemeentelike ouere manne so iemand geestelik help?
Apostoliese raad
Wanneer ouere manne ’n Christen help wat ’n fout begaan het, moet hulle die apostel Paulus se raad volg: “Broeders, selfs al begaan ’n man die een of ander misstap voordat hy daarvan bewus is, moet julle wat geestelik bevoeg is so een probeer reghelp in ’n gees van sagmoedigheid, terwyl elkeen op homself let, sodat hy nie ook versoek word nie” (Galasiërs 6:1, NW). Wanneer ’n medegelowige ‘die een of ander misstap begaan voordat hy daarvan bewus is’, het ouere manne ’n verantwoordelikheid om so gou as moontlik hulp aan te bied.
Paulus praat van “’n man” wat ’n misstap begaan. Maar die Griekse woord (anʹthro·pos) wat hier gebruik word, kan op ’n man of ’n vrou van toepassing wees. En wat beteken dit om iemand ‘reg te help’? Hierdie Griekse term (ka·tar·tiʹzo) beteken om “in die regte lyn te bring”. Dieselfde woord word gebruik om nette te herstel (Mattheüs 4:21). Dit is ook van toepassing wanneer iemand se gebreekte been gespalk word. ’n Dokter doen dit versigtig om te voorkom dat hy enige onnodige pyn vir sy pasiënt veroorsaak. Net so vereis dit sorg, takt en medelye om ’n broer of ’n suster te help om geestelik in die regte lyn te kom.
Ouere manne lewer bewys van hulle eie geestelikheid deur ’n gees van sagmoedigheid te openbaar wanneer hulle iemand probeer reghelp. Die saggeaarde Jesus sou sulke sake ongetwyfeld in sagmoedigheid hanteer het (Mattheüs 11:29). Ouere manne behoort hierdie eienskap te openbaar teenoor ’n kneg van Jehovah wat ’n misstap begaan het, omdat hulle ook, ondanks die goeie bedoelings van hulle hart, deur ’n sonde oorval kan word. Dit kan in die toekoms plaasvind as dit nie reeds in die verlede gebeur het nie.
Hierdie geestelik bekwame manne moet liefdevol ‘die laste dra’ van hulle mede-aanbidders. Ouere manne wil waarlik ’n broer of ’n suster van harte help om teen Satan, versoekinge, die swakhede van die vlees en die sonde wat ons omring te stry. Dit is gewis een manier waarop Christen-opsieners ‘die wet van Christus vervul’.—Galasiërs 6:2.
Manne met ware geestelike kwalifikasies is nederig en hulle besef “as iemand meen dat hy iets is, terwyl hy niks is nie, mislei hy homself” (Galasiërs 6:3). Al probeer ouere manne ook hoe hard om te doen wat reg en behulpsaam is, sal hulle steeds te kort skiet wat die volmaakte en liefdevol medelydende Seun van God, Jesus Christus, betref. Maar dit is geen rede om nie hulle allerbeste te doen nie.
Ouere manne weet dat dit verkeerd sal wees om ’n medegelowige op ’n hoogmoedige, fariseëragtige manier te veroordeel! Jesus sal dit beslis nie doen nie. Hy het dan sy lewe nie net vir sy vriende afgelê nie, maar selfs vir sy vyande! Ouere manne streef daarna om soortgelyke liefde aan die dag te lê wanneer hulle probeer om broers of susters uit die moeilikheid te help en hulle nader aan hulle hemelse Vader en sy regverdige standaarde te bring. Wat is van die stappe wat ouere manne sal help om mede-aanbidders reg te help?
Nuttige stappe
Vertrou biddend op Jehovah terwyl jy op ’n saggeaarde manier praat en optree. Jesus was saggeaard, hy het vurig om sy hemelse Vader se leiding gebid en altyd die dinge gedoen wat Hom welgevallig was (Mattheüs 21:5, NW; Johannes 8:29). Ouere manne moet dieselfde doen wanneer hulle iemand wat ’n misstap begaan het probeer reghelp. As ’n saggeaarde onderherder sal ’n ouere man aanmoedigend en opbouend in sy spraak wees, nie intimiderend nie. Gedurende die bespreking sal hy ’n atmosfeer probeer skep waarin die Christen wat hulp nodig het so maklik moontlik sy gedagtes sal kan uitdruk. Om dit te bereik, sal ’n hartgrondige openingsgebed van groot hulp wees. Iemand wat in sagmoedigheid raad ontvang, sal meer geredelik sy hart daarvoor oopmaak as hy weet dat die raadgewer, soos Jesus, die dinge wil doen wat God welgevallig is. As jy met gebed afsluit, sal dit waarskynlik by die individu inskerp hoe belangrik dit is om die raad wat op so ’n liefdevolle, saggeaarde wyse gegee is, toe te pas.
Gee na gebed opregte lof. Dit kan betrekking hê op die individu se goeie eienskappe soos goedhartigheid, betroubaarheid of ywer. Daar kan verwys word na sy of haar verlede van getroue diens aan Jehovah, dalk oor ’n tydperk van baie jare. Sodoende toon ons dat ons omgee en Christelike respek vir die persoon het. Jesus het sy boodskap aan die gemeente in Thiatire met lof begin en gesê: “Ek ken jou werke en liefde en diens en geloof en jou lydsaamheid en jou werke, en dat die laaste meer is as die eerste” (Openbaring 2:19). Daardie woorde het lede van die gemeente verseker dat Jesus bewus was van die goeie werk wat hulle gedoen het. Hoewel die gemeente sy foute gehad het—’n “Isébel”-invloed is geduld—het hulle in ander opsigte goed gevaar, en Jesus wou hê dat daardie broers en susters moes weet dat hulle ywerige werksaamheid nie onopgemerk gebly het nie (Openbaring 2:20). Net so moet ouere manne lof gee waar dit gepas is.
Moenie die misstap ernstiger maak as wat omstandighede vereis nie. Ouere manne moet God se volk beskerm en sy organisasie skoon hou. Maar party geestelike misstappe wat streng teregwysing vereis, kan deur een of twee ouere manne na goeddunke hanteer word sonder ’n regterlike verhoor. In baie gevalle is menslike swakheid, en nie opsetlike goddeloosheid nie, die onderliggende rede vir ’n Christen se misstap. Ouere manne moet die kudde teer behandel en onthou dat: “Die oordeel sal onbarmhartig wees oor die wat geen barmhartigheid bewys het nie; en die barmhartigheid roem teen die oordeel” (Jakobus 2:13; Handelinge 20:28-30). In plaas daarvan om sake te vergroot, moet ouere manne dan op ’n sagte manier met berouvolle medegelowiges handel soos ons barmhartige en genadige God, Jehovah.—Efesiërs 4:32.
Toon begrip vir faktore wat dalk tot die misstap gelei het. Ouere manne moet aandagtig na hulle medegelowige luister wanneer hy sy hart uitstort. Aangesien ‘God nie ’n gebroke en verslae hart verag nie’, moet hulle dit ook nie doen nie (Psalm 51:19). Miskien spruit die probleem voort uit die feit dat ’n huweliksmaat nie emosionele ondersteuning bied nie. Ernstige en langdurige geestesdepressie het dalk van die persoon se emosionele krag, wat gewoonlik sterk is, afgetakel of dit dalk uiters moeilik gemaak om verstandige besluite te neem. Liefdevolle ouere manne sal sulke faktore in ag neem, want hoewel Paulus by sy broers gepleit het: “Vermaan die onordelikes”, het hy hulle ook aangespoor: “Bemoedig die kleinmoediges, ondersteun die swakkes, wees lankmoedig teenoor almal” (1 Thessalonicense 5:14). Hoewel ouere manne nie die krag van God se regverdige standaarde moet verswak nie, moet hulle verligtende faktore in ag neem net soos God dit doen.—Psalm 103:10-14; 130:3.
Moenie jou mede-Christen se selfrespek ondermyn nie. Ons wil nooit enige broer of suster minderwaardig laat voel of die indruk skep dat hy of sy nutteloos is nie. As ons die persoon verseker dat ons vertroue het in sy Christelike eienskappe en sy liefde vir God sal dit hom veeleer aanmoedig om ’n fout reg te stel. Net so het Paulus die Korinthiërs aangemoedig om vrygewig te wees toe hy vir hulle gesê het dat hy by ander gespog het oor hulle “bereidwilligheid” en “ywer” in hierdie opsig.—2 Korinthiërs 9:1-3.
Toon dat hy die probleem te bowe kan kom deur op Jehovah te steun. Ja, probeer die individu met erns help om te sien dat as hy op God vertrou en die raad van Sy Woord toepas dit hom sal help om die nodige aanpassing te maak. Om dit te doen, moet wat ons sê op die Skrif en op Bybelse publikasies gebaseer wees. Ons het ’n tweeledige doelwit: (1) om die een wat hulp nodig het, te help om Jehovah se standpunt in te sien en te verstaan en (2) om die persoon te wys dat hy in ’n sekere mate hierdie Goddelike riglyne misgekyk het of versuim het om dit te volg.
Kombineer skriftuurlike raad met vriendelike tog doelgerigte vrae. Vrae kan baie doeltreffend wees om iemand se hart te bereik. Jehovah het deur sy profeet Maleagi ’n vraag gebruik om Sy volk te laat verstaan hoe hulle afgedwaal het. “Mag ’n mens God beroof?” het hy gevra en bygevoeg: “Want julle beroof My” (Maleagi 3:8). Israel se versuim om die tiende van hulle opbrengs by te dra soos die Mosaïese Wet vereis het, het daarop neergekom dat hulle Jehovah beroof het. Om hierdie situasie reg te stel, moes die Israeliete hulle verpligtinge teenoor ware aanbidding nakom met geloof dat God hulle oorvloedig sal seën. Deur middel van gedagteprikkelende en bedagsame vrae kan ouere manne ook beklemtoon dat dit vandag vertroue in en gehoorsaamheid aan ons hemelse Vader verg om die regte ding te doen (Maleagi 3:10). As jy sy hart met daardie gedagte bereik, sal dit baie daartoe bydra dat ons broer ‘reguit paaie vir sy voete’ maak.—Hebreërs 12:13.
Beklemtoon die voordele as hy die raad aanneem. Doeltreffende raad sluit vermaning in oor die gevolge as hy sy verkeerde weg sou voortsit, asook herinnering aan die voordele wat sal voortspruit as sake reggestel word. Na ’n tydige waarskuwing het Jesus diegene in die geestelik onverskillige gemeente van Laodicea verseker dat as hulle hulle van hulle vorige weg bekeer en ywerige dissipels word, hulle wonderlike voorregte sou geniet wat die vooruitsig sou insluit om saam met hom in die hemele te regeer.—Openbaring 3:14-21.
Toon belangstelling om te sien of daar ag geslaan word op die raad. Soos ’n goeie dokter van tyd tot tyd na ’n been wat hy gespalk het, kyk om te sien of dit nog in die regte posisie is, moet ouere manne probeer vasstel of skriftuurlike raad toegepas word. Hulle kan hulle afvra: Is verdere hulp nodig? Moet die raad herhaal word, miskien op ’n ander manier? Jesus moes sy dissipels herhaaldelik raad gee oor hoe belangrik dit is om nederig te wees. Oor ’n redelike lang tydperk het hy geduldig hulle denke deur middel van raad, illustrasies en praktiese lesse probeer regstel (Mattheüs 20:20-28; Markus 9:33-37; Lukas 22:24-27; Johannes 13:5-17). Net so kan ouere manne seker maak dat ’n broer of ’n suster volkome reggehelp word deur verdere skriftuurlike besprekings te reël met die doel om die persoon se vordering tot volkome geestelike gesondheid te bespoedig.
Gee lof vir enige verbetering wat gemaak is. As die een wat ’n misstap begaan het opreg probeer om skriftuurlike raad toe te pas, prys hom hartlik. Dit sal die oorspronklike raad kragtiger maak en hom waarskynlik aanspoor om verder te verbeter. In Paulus se eerste brief aan die Korinthiërs was hy genoodsaak om hulle oor verskeie sake streng te vermaan. Kort nadat Titus die apostel oor die uitstekende reaksie op sy brief ingelig het, het Paulus vir hulle geskryf om hulle te prys. “Nou is ek bly”, het hy gesê, “nie omdat julle bedroef was nie, maar omdat julle bedroef was tot bekering, want julle was bedroef volgens die wil van God.”—2 Korinthiërs 7:9.
’n Rede om bly te wees
Ja, Paulus was bly toe hy hoor dat sy raad die Korinthiërs gehelp het. Net so ervaar hedendaagse ouere manne groot vreugde wanneer ’n mede-aanbidder van ’n misstap herstel omdat hy gunstig gereageer het op hulle liefdevolle hulp. Hulle kan inderdaad genot daaruit put om ’n berouvolle Christen te help om die doringagtige onkruid van sonde uit sy hart uit te roei sodat ’n godvrugtige opbrengs in oorvloed daar kan floreer.
As ouere manne ’n persoon wat ’n misstap begaan het suksesvol reghelp, kan hy of sy gehelp word om terug te draai van ’n weg wat geestelik geheel en al rampspoedig sou wees. (Vergelyk Jakobus 5:19, 20.) Vir sulke hulp moet die ontvanger daarvan dankbaarheid teenoor Jehovah God betuig. Woorde van opregte waardering vir die liefdevolle hulp, deernis en begrip van die ouere manne sal ook gepas wees. En wanneer geestelike herstel volkome is, kan alle betrokkenes hulle verheug dat die regstelling teweeggebring is in ’n gees van sagmoedigheid.