Ons verheug ons in ons Grootse Skepper

“Laat Israel hom verheug in sy [“grootse”, NW] Maker; laat die kinders van Sion juig oor hulle Koning.”—PSALM 149:2.

1. Wat is die ware toestand van die mensdom, ten spyte van die uitroepe dat daar “eindelik vrede” is?

DIE hedendaagse wêreld word deur “smarte” geteister. Dit is die uitdrukking wat Jesus gebruik het in sy profesie aangaande “die voleinding van die wêreld”, die rampspoedige tydperk wat met die Eerste Wêreldoorlog in 1914 begin het (Mattheüs 24:3-8). Baie politici sien net ’n duister toekoms. Ondanks uitroepe in Oos-Europa dat daar “eindelik vrede” is, het ’n voormalige president in daardie gebied die situasie opgesom toe hy gesê het: “Die bevolkingsontploffing en die kweekhuiseffek, gate in die osoonlaag en vigs, die vrees vir ’n kernbedreiging en die gaping tussen die ryk noorde en die arm suide wat opvallend groter word, die gevaar van hongersnood, die uitputting van die biosfeer en die planeet se minerale rykdomme, die uitbreiding van die handelstelevisie-kultuur en die toenemende bedreiging van streekoorloë—al hierdie dinge, tesame met duisende ander faktore, hou ’n algemene bedreiging vir die mensdom in.” Daar is geen menslike mag wat hierdie bedreiging van ’n finale ramp uit die weg kan ruim nie.—Jeremia 10:23.

2. Wie het die blywende oplossing vir die mensdom se probleme, en watter stap het hy reeds gedoen?

² Ons kan ons egter verheug oor die feit dat ons Grootse Skepper die blywende oplossing het. In Jesus se profesie word “die voleinding van die wêreld” met sy onsigbare “teenwoordigheid” verbind (Mattheüs 24:3, 37-39, vgl. NW). Om die “nuwe hemele” te skep, het Jehovah Jesus as Messiaanse Koning op sy troon geplaas, en die profetiese bewyse toon dat hierdie geskiedkundige gebeurtenis in 1914 in die hemel plaasgevind heta (2 Petrus 3:13). As medeheerser saam met die Soewereine Heer Jehovah het Jesus nou die opdrag om die nasies te oordeel en om die sagmoedige, skaapgeaarde mense op die aarde te skei van die eiesinnige, bokagtige mense. Die goddelose “bokke” is tot “die ewige straf” bestem en “die skape” tot die ewige lewe in die aardse deel van die Koninkryk.—Mattheüs 25:31-34, 46.

3. Watter rede het ware Christene om hulle te verheug?

³ Die oorblyfsel van geestelike Israel op aarde, asook ’n groot menigte van hierdie gehoorsame skape, het alle rede om hulle in Jehovah, die Koning van die ewigheid, te verheug namate hy sy grootse voornemens deur middel van die Koninkryk van sy Seun tot ’n klimaks voer. Hulle kan sê: “Ek is baie bly in die HERE, my siel juig in my God; want Hy het my beklee met die klere van heil . . . Soos die aarde sy plante voortbring, en soos ’n tuin sy gewasse laat uitspruit, so sal die Here HERE geregtigheid en lof laat uitspruit voor die oog van al die nasies” (Jesaja 61:10, 11). Hierdie ‘uitspruiting’ blyk uit die miljoene wat nou uit die nasies versamel word om Jehovah se lof te verkondig.

‘Dit sal gou kom’

4, 5. (a) Hoe is die insameling van God se volk voorspel? (b) Watter besondere vermeerdering het ons gedurende die 1992-diensjaar gesien?

⁴ Die insameling versnel namate die einde van Satan se stelsel nader kom. Ons Grootse Skepper sê: “Jou volk sal almal regverdiges wees . . . as lote deur My geplant, ’n werk van my hande, tot my verheerliking. Die kleinste sal ’n geslag word en die geringste ’n magtige nasie. Ek, die HERE, sal dit op die regte tyd gou laat kom” (Jesaja 60:21, 22). Hierdie vermeerdering word wonderlik weerspieël in die Wêreldrapport van Jehovah se Getuies vir die 1992-diensjaar, wat op bladsye 12 tot 15 van hierdie tydskrif verskyn.

⁵ Iets besonders in hierdie rapport is die nuwe hoogtepunt van 4 472 787 Koninkryksverkondigers, ’n vermeerdering van 193 967—4,5 persent meer as verlede jaar. Die hoogtepunt van 301 002 wat gedurende 1992 gedoop is, weerspieël ook die feit dat baie mense Bybelwaarhede aanvaar. Hoe verheug ons ons tog dat daar in hierdie “dag van duisternis en donkerheid . . . ’n talryke en magtige volk” is wat, soos ’n swerm sprinkane, die Koninkryksgetuienis “tot aan die uiterste van die aarde” versprei! (Joël 2:2, 25; Handelinge 1:8). Van die yskoue Alaska—waar die Wagtoringgenootskap se vliegtuig al meer as 50 toegesneeude gebiede aangedoen het—tot die verskroeide woestyne van Mali en Burkina Faso en die verspreide eilande van Mikronesië skyn Jehovah se knegte soos “’n lig van die nasies, sodat [sy] redding tot aan die uiterstes van die aarde kan kom”.—Jesaja 49:6, NW.

6, 7. Watter onverwagse wending het ons in onlangse jare gesien, en hoe het Jehovah se knegte daarop gereageer?

⁶ Jehovah is soos ’n toevlug en ’n sterk toring wat sy volk beskerm en ondersteun. In baie wêrelddele moes Jehovah se Getuies dekades lank wrede onderdrukking en vervolging verduur (Psalm 37:39, 40; 61:4, 5). Maar onlangs, asof deur ’n wonderwerk, is beperkinge en struikelblokke in ongeveer 21 lande uit die weg geruim, sodat God se volk nou openlik kan verkondig dat ons Grootse Skepper Christus as Koning oor die aarde aangestel het.—Psalm 2:6-12.

⁷ Gebruik Jehovah se volk hulle nuutgevonde vryheid goed? Kyk op die tabel na die vermeerdering in Bulgarye, Roemenië en die eertydse Sowjetunie in Oos-Europa en in Angola, Benin en Mosambiek in Afrika. Ook in Zaïre was daar ’n merkwaardige vermeerdering. Met vreugde in hulle hart gee ons bevryde broers gehoor aan die oproep: “Loof die HERE, want Hy is goed, . . . wat alleen groot wonders doen, want sy goedertierenheid is tot in ewigheid” (Psalm 136:1, 4). Hierdie dank word betuig deur hulle ywerige diens om ander skaapgeaarde mense wat hulle aan die kant van die Koninkryk skaar, te versamel.

8. Hoe het nuwe lowers van Jehovah ‘soos ’n wolk aangevlieg gekom’ in Oos-Europa? in Afrika?

⁸ Gedurende die afgelope Europese somer het verbasend baie mense die byeenkomste bygewoon wat Jehovah se volk in eertyds Kommunistiese lande gehou het. Selfs verbasender is die aantal wat in daardie lande gedoop is. Die verbod is insgelyks op 10 Desember 1991 in Togo, Afrika, opgehef. Die volgende maand is ’n nasionale byeenkoms daar gehou. In vergelyking met die maandelikse gemiddelde van 6 443 verkondigers in die veld het die bywoning by hierdie byeenkoms tot 25 467 gestyg, met 556 wat gedoop is—8,6 persent van die aantal verkondigers. Soos Jesaja 60:8 beskryf, kom nuwe lowers van Jehovah ‘aangevlieg soos ’n wolk en soos duiwe na hulle vensters’ in die gemeentes van Jehovah se volk.

9. Watter voorsiening is gemaak sodat Christene, in lande waar hulle onlangs bevry is, kan ‘eet en versadig word’?

⁹ Die honger na geestelike voedsel in Oos-Europa en Afrika word ook bevredig. Die Wagtoringgenootskap se fabrieke in Duitsland, Italië en Suid-Afrika het die een vragmotor na die ander vol lektuur, in ’n aantal tale, na geestelik honger lande gestuur. Vantevore moes baie van die Getuies verslete tydskrifte na mekaar toe aanstuur, maar nou ontvang hulle ’n oorvloed geestelike voedsel. Hulle is verheug om ’n deelname te hê aan die vervulling van die profesie: “Dan sal julle oorvloedig eet en versadig wees en die Naam van die HERE julle God prys wat wonderbaar met julle gehandel het.”—Joël 2:26.

Daar word na verdere uitbreiding omgesien

10. Watter uitnodiging word met die oog op die hoë bywoningsyfer by die Gedenkmaal aan alle belangstellendes gerig?

¹⁰ Die wêreldwye bywoningsyfer vir die herdenking van Jesus se dood, 11 431 171, ’n vermeerdering van 781 013, oftewel 7,3 persent meer as verlede jaar, is beslis verstommend. Welkom, al julle nuwelinge! Hoe wonderlik sal dit tog wees as al hierdie nuwe belangstellendes die voordeel van ’n tuisbybelstudie saam met een van Jehovah se Getuies geniet! (Sien Jesaja 48:17.) Die rapport vir die diensjaar toon dat daar elke maand 4 278 127 van hierdie studies gehou is, ’n uitstekende vermeerdering van 8,4 persent. Maar baie meer mense kan van hierdie diens gebruik maak. Jehovah se Getuies lê graag gereelde besoeke by belangstellendes af om ’n gratis Bybelstudie in hulle huis te hou, en sodoende help hulle hierdie mense om die weg na die ewige lewe te vind (Johannes 3:16, 36). Waarom vra jy nie dat so ’n studie met jou gehou word nie? En onthou, jy sal altyd hartlik by die Koninkryksaal verwelkom word!—Psalm 122:1; Romeine 15:7, NW.

11, 12. (a) Watter probleme word in party lande ondervind? (b) Hoe vind ’n “gelykmaking” plaas tussen ryker en armer lande?

¹¹ Die gemeentes wat goeie Koninkryksale het, word ryklik geseën. Die situasie is anders in lande waar lojale Getuies baie jare lank ’n verbod op hulle werk moes verduur en in die geheim in klein groepies moes vergader. In ’n aantal van daardie plekke is hulle nou vry, maar hulle het min Koninkryksale. In ’n Afrika-land met 93 gemeentes is daar byvoorbeeld net drie Koninkryksale. Daarom word vergaderinge gewoonlik op groot, leë stukke grond gehou. ’n Gemeente van 150 kan tot 450 hê wat hierdie vergaderinge gereeld bywoon.

¹² In Oos-Europa is dit dikwels moeilik om eiendom te koop of om te bou, maar ’n mate van vooruitgang word gemaak. ’n Pragtige, nuwe takkantoor is op 28 November 1992 in Pole toegewy. Die milddadige bydraes tot die wêreldwye werk van Jehovah se Getuies word gebruik om sale en ander fasiliteite te help bou. Sodoende vind “gelykmaking” plaas, want die vrygewigheid van broers wat uit hulle materiële “oorvloed” bydra, help om in die geestelike behoeftes van gemeentes in minder bevoorregte lande te voorsien.—2 Korinthiërs 8:13, 14, NW.

Een miljard uur!

13. Hoeveel uur is daar in 1992 aan die predikings- en onderrigtingswerk bestee, en wie se pogings word in hierdie syfer weerspieël?

¹³ Wat sal jy met ’n miljard uur doen? Almal wat die ewige lewe verkry, sal soveel uur, en selfs meer, in produktiewe, bevredigende diens aan Jehovah kan bestee. Maar stel jou voor dat jy soveel uur in een jaar inpas! Dit is wat Jehovah se volk in 1992 gedoen het. As al die Koninkryksverkondigers se afsonderlike rapporte bymekaargetel word, kry ons ’n hoogtepunt van 1 024 910 434 uur wat op die beste manier moontlik bestee is—om ons Grootse Skepper te loof deur ‘in die openbaar en van huis tot huis te leer’ (Handelinge 20:20, NW). Daar het gemiddeld 4 289 737 Getuies elke maand gerapporteer. Hulle kom uit alle lewensterreine. Sommige kan net ’n beperkte hoeveelheid tyd aan die Koninkrykswerk bestee. Hulle sluit in gesinshoofde wat vir hulle gesin moet sorg; ouer mense en baie met gesondheidsprobleme, sowel as kinders wat nog op skool is. Maar elkeen se rapport is ’n innige weerspieëling van sy liefde vir Jehovah.—Vergelyk Lukas 21:2-4.

14. Hoe dink jongmense ‘aan hulle Skepper’?

¹⁴ ’n Jonger geslag word groot in Jehovah se diens, en gelukkig pas die meeste van hulle Salomo se woorde in Prediker 12:1 toe: “Dink aan jou Skepper in die dae van jou jonkheid.” Hulle lê hulle toe op hulle skoolwerk en word deur toegewyde ouers in geestelike sake onderrig. Dit was ’n vreugde om te sien hoe ’n hele aantal tieners by onlangse byeenkomste opstaan om gedoop te word. Dit is ook ’n vreugde om te weet dat baie jongmense praktiese voorbereidsels tref en ’n ambag of vaardigheid aanleer sodat hulle die pionierdiens kan betree wanneer hulle hulle skoolopleiding voltooi. Sodoende sal hulle hulleself kan onderhou, soos die apostel Paulus van tyd tot tyd gedoen het deur tente te maak.—Handelinge 18:1-4.

15, 16. Hoe dra pioniers en ander voltydse knegte tot die vooruitgang van die Koninkrykswerk by, en watter seëninge het party van hulle al geniet?

¹⁵ Wat ’n ontsaglike bydrae lewer die pioniers en ander voltydse knegte tog tot die vooruitgang van die Koninkrykswerk! Die pioniergeledere het die afgelope jaar tot ’n hoogtepunt van 931 521 vermeerder. Terwyl hulle daagliks van huis tot huis preek en Bybelstudies in die huise van mense hou, raak hulle baie bekwaam om die Skrif te verduidelik. Daarbenewens het baie gekwalifiseer om die twee weke lange Pionierdiensskool by te woon wat hulle help om bekwamer te word en groter vreugde te vind in die uitvoering van God se werk.

¹⁶ Elkeen van hierdie getroue pioniers kan met die woorde in Jesaja 50:4 saamstem: “Die Here HERE het My ’n geoefende tong gegee, dat Ek kan weet om die vermoeide te verkwik met woorde.” Daar is vandag baie mense wat moeg is vir die verdorwe wêreld om hulle, maar wat verkwik word deur die woorde wat ons getroue pioniers spreek.—Vergelyk Spreuke 15:23; Esegiël 9:4.

’n Ontsaglike bouprogram

17. Benewens die geestelike bouwerk, watter materiële bouwerk het ons in onlangse jare gesien?

¹⁷ Die wêreldwye geestelike voorspoed van Jehovah se Getuies vereis ook uitbreiding op materiële gebied. Drukkerye, kantore en Bethelhuise moet vergroot word, en Koninkryksale en Byeenkomssale moet gebou word. Jehovah se Getuies moet dus op fisiese gebied bouers word. Soortgelyke bouwerk is in koning Salomo se tyd gedoen. Salomo het die tempel vir Jehovah se aanbidding gebou volgens “die bouplan . . . wat deur inspirasie tot hom gekom het” en deur Jehovah aan sy vader, koning Dawid, gegee is (1 Kronieke 28:11, 12, NW). Sodoende het Salomo nie net sy toehoorders met kosbare woorde van wysheid opgebou nie, maar hy het ook materiële bouwerk gerig wat so uitmuntend was dat die sekulêre wêreld hom dit nog nooit kon nadoen nie.—1 Konings 6:1; 9:15, 17-19.

18, 19. (a) Watter bouprojekte wat vinnig vorder, is Jehovah se organisasie mee besig? (b) Hoe is Jehovah se gees geopenbaar in materiële sowel as in geestelike bouwerk?

¹⁸ Vandag bou Jehovah se Getuies nie volgens Goddelik geïnspireerde bouplanne nie, maar hulle het God se gees. Soos in die dae van Israel, spoor dit hulle aan om op só ’n manier te bou dat die mense van die wêreld daaroor verwonderd is (Sagaria 4:6). Die tyd is min. Koninkryksale en ander geboue is dringend nodig. In party lande is “snelbou”-Koninkryksale iets algemeens. In die afgelope 10 jaar berig Kanada byvoorbeeld dat hulle 306 sale gebou het, en elkeen in minder as twee dae. Vanweë die vinnige uitbreiding van Jehovah se wêreldwye werk word daar tans altesaam 43 nuwe takkantore of takkantooruitbreidings gebou of beplan. Daarbenewens nader ’n woongebou van 30 verdiepings, met huisvesting vir ongeveer duisend vrywillige Bethelwerkers, in Brooklyn sy voltooiing. Ook in die staat New York, by Patterson, is die broers ver vooruit met die bouwerk aan die Bybelonderrigsentrum, die grootste projek wat die Wagtoringgenootskap tot nog toe aangepak het.

¹⁹ Die doeltreffendheid en werkgehalte waarmee hierdie projekte voortgaan, laat bedrewe wêreldse konstruksiefirmas verbaas staan. Waarom? Weens die ontsaglike bydrae wat toegewyde Getuies van Jehovah maak. Sy gees spoor hulle aan om nie net materiële ondersteuning te gee nie, maar om ook heelhartig van hulle tyd en energie te gee. Bouterreine wemel van goed opgeleide, toegewyde werkers. Daar is geen werkstakings nie, en niemand steek lyf weg nie. Jehovah se gees spoor hulle aan, net soos dit die bouers van die tabernakel in Moses se dag en diegene wat die tempel in die dae van Salomo gebou het, aangespoor het. Geestelikheid is die vernaamste eienskap wat hierdie werkers moet hê.—Vergelyk Exodus 35:30-35; 36:1-3; 39:42, 43; 1 Konings 6:11-14.

20. (a) In watter mate sal die goeie nuus nog verkondig word? (b) Watter geseënde vooruitsig wag daar op Jehovah se volk?

²⁰ Salomo het sy bouprogram voortgesit nadat hy die tempel voltooi het (2 Kronieke 8:1-6). In watter mate die hedendaagse getuieniswerk nog sal uitbrei—met die gepaardgaande behoefte daaraan om sale en ander fasiliteite te bou—weet ons nie. Maar ons weet dat wanneer hierdie goeie nuus van die Koninkryk verkondig is in die mate wat Jehovah beveel, sal die einde, die “groot verdrukking”, kom (Mattheüs 24:14, 21). Op ’n aarde wat nie meer deur hebsugtige mense geruïneer word nie, sal Jehovah se reëling van “nuwe hemele en ’n nuwe aarde” tallose seëninge vir die mensdom meebring. Laat ons derhalwe ‘bly wees en juig vir ewig oor wat God skep’ deur alle lof aan ons Grootse Skepper te gee!—Jesaja 65:17-19, 21, 25.

[Voetnoot]

Kan jy verduidelik?

◻ Watter redes het ons om ons in ons Grootse Skepper te verheug?

◻ Watter vermeerdering is tydens die 1992-diensjaar gerapporteer?

◻ Watter oorvloedige seëninge is gerapporteer in lande waar die getuieniswerk vantevore verbied was?

◻ Hoe het jongmense en pioniers tot die vermeerdering in Jehovah se organisasie bygedra?

◻ Hoe is Jehovah se volk met materiële sowel as met geestelike bouwerk besig?

[Venster op bladsy 17]

Verlede jaar is meer as ’n miljard uur aan die predikings- en onderrigtingswerk bestee

[Tabel op bladsy 12-15]

WÊRELDRAPPORT VAN JEHOVAH SE GETUIES VIR DIE 1992-DIENSJAAR

(See bound volume)

[Prent op bladsy 10]

Verlede jaar se honderduisende doopkandidate toon dat Jehovah die predikings- en onderrigtingswerk seën

[Prent op bladsy 16]

Baie jongmense ‘dink aan hulle Skepper’