’n Skoonheid wat nie verwelk nie

“SKOONHEID verdwyn; skoonheid is kortstondig”, so het die digter Walter de la Mare geskryf. Dit is beslis waar in die geval van die pragtige kaktusblomme wat ons hier sien. Hulle sierlikheid verwelk gou.

Die Christendissipel Jakobus het geskryf: “Soos ’n blom van die gras sal hy [die ryke] verbygaan. Want die son gaan op met sy hitte en laat die gras verdor, en sy blom val af, en die sierlikheid van sy gedaante vergaan; so sal die ryke ook in sy weë verwelk.”—Jakobus 1:10, 11.

In hierdie wisselvallige wêreld kan rykdom inderdaad oornag verdwyn. Boonop is die ryke—soos ons almal—‘kort van dae soos ’n blom’ (Job 14:1, 2). Jesus het die gelykenis vertel van ’n man wat druk besig was om rykdom op te gaar sodat hy kon agteroorsit en nie meer so hard sou hoef te werk nie. Maar net toe hy dink hy besit alles om ’n luilekker lewe te voer, het hy gesterf. Jesus het gewaarsku: “So gaan dit met hom wat vir homself skatte vergader en nie ryk is in God nie.”—Lukas 12:16-21.

“Ryk is in God.” Wat het Jesus daarmee bedoel? Iemand wat in dié opsig ryk is, het “skatte . . . in die hemel”—’n goeie naam by God. So ’n skat hoef nooit te vergaan nie (Mattheüs 6:20; Hebreërs 6:10). Iemand wat ryk is in God, is nie soos ’n blom wat verwelk nie, maar word eerder in die Bybel vergelyk met ’n boom waarvan die blare nie verwelk nie. En ons word verseker: “Alles wat hy doen, voer hy voorspoedig uit.”—Psalm 1:1-3, 6.