Koninkryksverkondigers berig
Sy het ’n doel in die lewe gevind
JESUS sê dat hy sy skape ken (Johannes 10:14). As ’n mens ’n goeie hart en ’n liefde vir vrede en geregtigheid het, sal daardie mens aangetrokke voel tot Jesus se volgelinge. So iemand sal ’n doel in die lewe vind, soos met een vrou in België die geval was. Hier is haar verhaal:
“Toe Getuies van Jehovah aan my deur geklop het, was ek baie terneergedruk en het daaraan gedink om my lewe te beëindig. Ek het gehou van wat die Getuies oor die oplossing vir hierdie siek wêreld se probleme gesê het, maar het nie daarvan gehou dat God daarby betrokke is nie. Ek het agt jaar tevore opgehou kerk toe gaan aangesien ek die skynheiligheid daar gehaat het. Maar dit wat die Getuies gesê het, het na die waarheid geklink, en ek het besef dat dit eintlik moeilik is om sonder God te leef.
“Ongelukkig het ek ná ’n paar besoeke kontak met die Getuies verloor. Ek het ellendig gevoel. Ek het daagliks twee pakkies sigarette gerook en selfs dwelmmiddels begin gebruik. Aangesien ek met my afgestorwe oupa wou kommunikeer, het ek spiritisme begin beoefen. Hoe bang was ek tog nie toe ek as gevolg daarvan saans wanneer ek alleen was deur demone aangeval is nie! Dit het maande lank voortgeduur. Ek was elke aand verskriklik bang as ek daaraan gedink het dat ek alleen moes wees.
“Toe het ek eendag gaan stap en ’n ander pad as gewoonlik gevolg en op ’n groot boutoneel afgekom. Tot my verbasing was ’n groot menigte daar. Toe ek nader gaan, het ek gesien dat dit Getuies van Jehovah is wat ’n Koninkryksaal bou. Ek het onthou van die besoeke wat die Getuies by my huis afgelê het en gedink hoe wonderlik dit sou wees as die hele wêreld soos hierdie mense kon leef.
“Ek wou bitter graag hê dat die Getuies my weer besoek en het dus met van die mense gepraat wat aan die saal gewerk het. Ek het tot God gebid, en tien dae later was die man wat my die eerste keer besoek het voor my deur. Hy het voorgestel dat ons die Bybelstudie voortsit, en ek het gretig ingestem. Hy het my onmiddellik genooi om die vergaderinge by die Koninkryksaal by te woon. Ek het ingestem. Ek het nog nooit so iets gesien nie! Ek het so lank gesoek na mense wat mekaar liefhet en gelukkig is. En hier was hulle uiteindelik!
“Ek het daarna al die vergaderinge bygewoon. Ná ongeveer drie weke het ek met die slegte rookgewoonte gebreek. Ek het my boeke oor astrologie en my plate met sataniese musiek weggegooi, en ek kon voel dat die demone hulle houvas op my verloor. Ek het my lewe in ooreenstemming met Jehovah se Bybelstandaarde gebring en ná drie maande het ek die goeie nuus begin verkondig. Ná ses maande is ek gedoop. Twee dae ná my doop het ek ’n hulppionier geword.
“Ek dank Jehovah vir al die goeie dinge wat hy vir my gedoen het. My lewe het uiteindelik ’n doel. Ja, Jehovah se naam is ’n sterk toring waarin ek skuiling en beskerming gevind het (Spreuke 18:10). Ek voel werklik soos die psalmis toe hy Psalm 84:11 (NAV) geskryf het: ‘Één dag in u tempel is beter as duisend daarbuite; ek staan liewer by die drumpel van die huis van my God as om te woon in huise sonder God.’”
Hierdie sagmoedige vrou het ’n doel in die lewe gevind. Enigiemand wat Jehovah met ’n goeie hart soek, kan dit ook doen.