Koninkryksverkondigers berig

Voorheen vyande, nou verenig in Jehovah se diens

“DIE eerste keer dat ek enigiets omtrent Jehovah se Getuies gehoor het, was terwyl ek as ’n gewapende wag in Bosnië gedien het”, verduidelik Branko.a

Branko het wag gestaan by ’n hospitaal waar die gewondes behandel is. Een van die dokters het die Bybel saam met die Getuies gestudeer, en gedurende ’n nagskof het hy baie van die dinge wat hy aangaande die Bybel geleer het vir Branko verduidelik.

Wat Branko daardie aand gehoor het, het hom so getref dat hy onmiddellik sy wapens neergelê het. Hy het met die Getuies in aanraking gekom omdat hy meer wou leer. ’n Ruk later het Branko, nadat hy na ’n ander Europese land verhuis het, ’n Koninkryksaal opgespoor en ’n vergadering van die Joego-Slawiese gemeente van Jehovah se Getuies bygewoon. Dit is waar Branko vir Slobodan ontmoet het.

Slobodan het ook van Bosnië gekom en het as ’n vrywilliger in dieselfde oorlog as Branko gedien—maar aan die ander kant. Slobodan het vir die Serwiërs teen die Kroate geveg. Teen die tyd dat die twee ontmoet het, was Slobodan ’n gedoopte Getuie van Jehovah. Hy het aangebied om die Bybel met Branko, wat voorheen sy vyand was, te studeer. Namate die studie gevorder het, het Branko meer aangaande Jehovah geleer, en sy liefde vir God het toegeneem. Dit het Branko beweeg om sy lewe aan die Skepper toe te wy. In Oktober 1993 het hy sy toewyding deur waterdoop gesimboliseer.

Hoe het Slobodan een van Jehovah se Getuies geword? Hy het ’n ruk tevore die oorlogsgebied in Bosnië verlaat. Hy het van die Getuies se publikasies gelees, maar dit was eers toe twee Getuies sy huis vroeg in 1992 besoek het dat sy belangstelling in die Woord van God toegeneem het. Wie het Slobodan besoek en aangebied om die Bybel met hom te studeer? Dit was Mujo, wat ook van Bosnië gekom het, maar wat as ’n Moslem grootgemaak is. Namate die Bybelstudie gevorder het, het Mujo en Slobodan, voorheen vyande, elke dag tyd saam deurgebring om mekaar se geloof te versterk.

Die oorlog in die voormalige Joego-Slawië het die lewens van honderdduisende mense geëis. Maar Branko, Slobodan en Mujo dien nou as voltydse verkondigers van die goeie nuus in dieselfde gemeente van Jehovah se Getuies. Hulle het etniese en rassekonflikte oorkom en streef nou vrede na terwyl hulle aan die Skepper, Jehovah, onderworpe is.

Maar wat het hierdie veranderinge teweeggebring? Dit was hulle liefde vir Jehovah, hulle eerbied vir die Bybel en hulle gretigheid om Bybelwaarhede in hulle lewe toe te pas. Soos die Heilige Skrif sê: “Die woord van God is lewend en oefen krag uit . . . en kan gedagtes en bedoelinge van die hart onderskei.”—Hebreërs 4:12.

[Voetnoot]