Watter soort toekoms wil jy vir jou kinders hê?

BESKOU jy jou kinders as ’n waardevolle erfdeel? (Psalm 127:3). Of beskou jy die verantwoordelikheid om jou kinders groot te maak as ’n finansiële las met geen waarborg van sukses nie? Die grootmaak van kinders bring geen geldelike voordele mee nie, maar kos eerder geld totdat hulle hulleself kan onderhou. Suksesvolle ouerskap verg goeie beplanning net soos dit goeie beplanning verg om oordeelkundig met erfgeld te werk.

Liefdevolle ouers wil hulle kinders ’n goeie begin in die lewe gee. Hoewel slegte en baie hartseer dinge in hierdie wêreld kan gebeur, kan ouers baie doen om hulle kinders te beskerm. Beskou die geval van Werner en Eva, wat in die vorige artikel genoem is.a

Wanneer ouers werklik omgee

Werner vertel dat sy ouers sake nie net hulle gang laat gaan het nie, maar eerder opregte belangstelling getoon het in wat by die skool gebeur. “Ek het die praktiese wenke wat hulle vir my gegee het opreg waardeer, en ek het gevoel dat hulle vir my omgee en my ondersteun. As ouers was hulle nogal streng, maar ek het geweet dat hulle my ware vriende is.” En toe Eva so ontsteld oor haar skoolwerk geraak het dat sy terneergedruk was en gesukkel het om te slaap, het haar ouers, Francisco en Inez, ook baie tyd daaraan bestee om met haar te praat en haar te help om haar verstandelike en geestelike ewewig te herwin.

Wat het Francisco en Inez gedoen om hulle kinders te beskerm en hulle vir die volwasse lewe voor te berei? Wel, hierdie liefdevolle ouers het hulle kinders van kleins af by hulle daaglikse bedrywighede betrek. Pleks van net met hulle volwasse vriende om te gaan, het Inez en Francisco die kinders oral met hulle saamgeneem. As liefdevolle ouers het hulle ook hulle seun en dogter behoorlike leiding gegee. Inez sê: “Ons het hulle geleer om die huis netjies te hou, om spaarsaam te wees en om hulle klere op te pas. En ons het elkeen van hulle gehelp om ’n beroep te kies en hulle verantwoordelikhede in ewewig te bring met geestelike belange.”

Hoe belangrik is dit tog om jou kinders te leer ken en ouerlike leiding te voorsien! Kom ons ondersoek drie gebiede waarop jy dit kan doen: (1) Help jou kinders om gepaste sekulêre werk te kies; (2) berei hulle voor om emosionele spanning in die skool en by die werkplek te verwerk; (3) wys hulle hoe om hulle geestelike behoeftes te bevredig.

Help hulle om gepaste werk te kies

Aangesien ’n mens se sekulêre werk nie net jou finansiële situasie raak nie, maar ook baie van jou tyd in beslag neem, sluit goeie ouerskap in dat die dinge waarin elke kind belangstel sowel as sy vermoëns in ag geneem moet word. Omdat geen pligsgetroue persoon ’n las vir ander wil wees nie, moet ouers ernstig nadink oor hoe hulle hulle kind daarvoor kan voorberei om homself en ’n gesin te onderhou. Moet jou seun of dogter ’n ambag leer om ’n goeie bestaan te kan maak? As ’n ouer wat werklik omgee, moet jy jou voortdurend inspan om jou kind te help om eienskappe aan te kweek soos hardwerkendheid, ’n bereidwilligheid om te leer sowel as die vermoë om goed met ander oor die weg te kom.

Dink aan Nicole. Sy sê: “My ouers het my saam met hulle in hulle skoonmaakonderneming laat werk. Hulle het voorgestel dat ek ’n persentasie van my inkomste vir hulle gee om van die huishoudelike uitgawes te help dek en wat oor was te hou vir iets wat ek wou koop of waarvoor ek wou spaar. Dit het my ’n groter verantwoordelikheidsin gegee wat later in die lewe baie nuttig was.”

God se Woord, die Bybel, sê nie spesifiek watter soort sekulêre werk ’n mens moet kies nie. Maar dit voorsien wel goeie riglyne. Die apostel Paulus het byvoorbeeld gesê: “As iemand nie wil werk nie, laat hom dan ook nie eet nie.” In sy brief aan die Christene in Tessalonika het hy ook gesê: “Ons hoor dat sommige wanordelik onder julle wandel en glad nie werk nie, maar hulle bemoei met wat hulle nie aangaan nie. Aan sulke mense gee ons die bevel en vermaning in die Here Jesus Christus dat hulle deur rustig te werk voedsel moet eet wat hulle self verdien.”—2 Tessalonisense 3:10-12.

Maar die lewe behels meer as net om ’n werk te kry en geld te maak. Uiteindelik sal diegene wat te ambisieus is waarskynlik ontevrede raak en dalk besef dat hulle lewe “’n gejaag na wind” is (Prediker 1:14). Ouers moet hulle kinders nie aanspoor om erkenning en welvaart na te jaag nie, maar dit sal beter wees as hulle hulle kinders help om die wysheid van die apostel Johannes se Goddelik geïnspireerde woorde in te sien: “Moenie die wêreld of die dinge in die wêreld liefhê nie. As iemand die wêreld liefhet, is die liefde vir die Vader nie in hom nie; want alles wat in die wêreld is—die begeerte van die vlees en die begeerte van die oë en die spoggerige vertoon van ’n mens se lewensmiddele—het nie hulle oorsprong by die Vader nie, maar het hulle oorsprong by die wêreld. Wat meer is, die wêreld gaan verby en so ook sy begeerte, maar hy wat die wil van God doen, bly vir ewig.”—1 Johannes 2:15-17.

Hoe kan jy hulle emosionele behoeftes bevredig?

As ouer moet jy soos ’n atletiekafrigter wees. Hy sorg nie net dat sy atlete die fisiese vermoë het om vinniger te hardloop of verder te spring nie. Hy probeer hulle waarskynlik ook help om enige negatiewe gesindheid te bowe te kom en hulle emosionele krag sodoende te versterk. Hoe kan jy jou kinders aanmoedig, opbou en motiveer?

Beskou Rogério, ’n 13-jarige seun. Behalwe sy gemoedstryd as gevolg van liggaamlike veranderinge, het hy ook emosionele spanning ervaar weens onenigheid tussen sy ouers en ’n gebrek aan aandag. Wat kan vir jongmense soos hy gedoen word? Al is dit onmoontlik om jou kinders teen alle sorge en slegte invloede te beskerm, moet jy nooit jou rol as ouer prysgee nie. Sonder om oorbeskermend te wees, moet jy jou kinders met begrip dissiplineer en altyd in gedagte hou dat elke kind uniek is. Deur goedhartigheid en liefde te betoon, kan jy baie help om ’n jong persoon veilig te laat voel. Dit sal ook keer dat hy met ’n gebrek aan selfvertroue en selfrespek grootword.

Ongeag hoe suksesvol jou eie ouers daarin was om jou emosionele behoeftes te bevredig, is daar drie dinge wat jou kan help om suksesvol te wees as ’n waarlik behulpsame ouer: (1) Moenie so verdiep raak in jou eie probleme dat jy die skynbaar klein probleme van jou kinders ignoreer nie; (2) probeer om elke dag aangename en betekenisvolle gesprekke met hulle te hê; (3) bevorder ’n positiewe gesindheid teenoor die oplossing van probleme en menseverhoudinge.

Birgit dink terug aan haar tienerjare en sê: “Ek moes leer dat ’n mens nie ander mense kan verander om te wees soos jy wil hê hulle moet wees nie. As ek iets in ander gesien het waarvan ek nie gehou het nie, was my ma se raad om nie soos hulle te wees nie. Terwyl ek nog jonk is, het sy ook gesê, is die beste tyd om my eie gewoontes te verander.”

Maar jou kinders het meer as ’n werk en emosionele stabiliteit nodig. Vra jou af: ‘Beskou ek ouerskap as ’n godgegewe verantwoordelikheid?’ As jy dit wel so beskou, sal jy na die geestelike behoeftes van jou kinders wil omsien.

Maniere om hulle geestelike behoeftes te bevredig

In sy Bergpredikasie het Jesus Christus gesê: “Gelukkig is dié wat bewus is van hulle geestelike behoefte, want die koninkryk van die hemele behoort aan hulle” (Matteus 5:3). Wat is daarby betrokke om geestelike behoeftes te bevredig? Kinders vind baie daarby baat wanneer hulle ouers ’n goeie voorbeeld stel wat geloof in Jehovah God betref. Die apostel Paulus het geskryf: “Sonder geloof is dit onmoontlik om vir [God] welbehaaglik te wees, want hy wat tot God nader, moet glo dat hy is en dat hy die beloner word van dié wat hom ernstig soek” (Hebreërs 11:6). Maar gebed is nodig om geloof werklik betekenisvol te maak (Romeine 12:12). As jy jou eie geestelike behoefte erken, sal jy Goddelike leiding probeer vind, soos die vader van die kind wat Israel se bekende rigter Simson geword het (Rigters 13:8). Jy sal nie net bid nie, maar ook God se geïnspireerde Woord, die Bybel, vir hulp raadpleeg.—2 Timoteus 3:16, 17.b

Ondanks al die harde werk wat daarby betrokke is om goeie leiding, emosionele ondersteuning en geestelike hulp te voorsien, kan ouerskap lonend wees. ’n Vader van twee in Brasilië sê: “Ek kan my nie eers indink hoe dit sou wees om nie my kinders te hê nie. Daar is soveel goeie dinge wat ons saam met hulle kan geniet.” Die moeder verduidelik verder waarom die kinders goed doen: “Ons is altyd saam, en ons probeer dinge vrolik en gelukkig maak. En die belangrikste is dat ons altyd vir die kinders bid.”

Priscilla onthou die liefde en geduld wat haar ouers teenoor haar betoon het elke keer wanneer daar ’n probleem was. “Hulle was my ware vriende en het my met alles gehelp”, sê sy. “As kind het ek werklik gevoel asof ek soos ‘’n erfdeel van Jehovah’ behandel word” (Psalm 127:3, NW). Jy kan dalk soos baie ander ouers probeer om saam met jou kinders tyd opsy te sit sodat julle die Bybel en Christelike publikasies saam kan lees. Wanneer julle Bybelverslae en -beginsels in ’n positiewe atmosfeer bespreek, kan dit jou kinders help om selfvertroue op te bou en ’n ware hoop vir die toekoms te hê.

Wanneer alle kinders veilig sal wees

Hoewel die toekoms vandag vir baie kinders donker lyk, verseker God se Woord ons dat die aarde binnekort ’n veilige tuiste vir die mensdom sal wees. Stel jou die tyd in God se beloofde nuwe wêreld voor wanneer ouers hulle nie meer oor die veiligheid van hulle kinders hoef te bekommer nie! (2 Petrus 3:13). Probeer die wonderlike vervulling van hierdie profesie in jou geestesoog sien: “Dan wei die wolf by die lam, en die luiperd gaan lê by die bokkie, en die kalf en die jong leeu en die vetgemaakte vee bymekaar, en ’n klein seuntjie sal hulle aanja” (Jesaja 11:6). Die geestelike veiligheid wat in hierdie woorde beskryf word, word vandag al in figuurlike sin vervul onder diegene wat Jehovah dien. Onder hulle sal jy God se liefdevolle sorg aanvoel. As jy liefde vir God openbaar, kan jy seker wees dat hy jou gevoelens as ’n ouer verstaan en jou sal help om die sorge en beproewinge wat jy dalk sal ondervind die hoof te bied. Bestudeer sy Woord en stel jou vertroue in sy Koninkryk.

Help jou kinders op die weg na die ewige lewe deur ’n goeie voorbeeld te stel. As jy Jehovah God jou toevlug maak, kan jou toekoms en dié van jou kinders al jou verwagtinge oortref. Jy kan dieselfde vertroue hê as die psalmis wat gesing het: “Verlustig jou in die HERE; dan sal Hy jou gee die begeertes van jou hart.”—Psalm 37:4.

[Voetnote]