’n Klein, afgeleë eilandjie

DIE byvoeglike naamwoorde “afgeleë” en “klein” word meestal gebruik om die eiland St. Helena te beskryf. Dit is gepas, want hierdie eiland is 17 kilometer lank en 10 kilometer wyd en 1 950 kilometer van die naaste land af, die suidwestelike kus van Afrika. Napoleon Bonaparte is in 1815 hierheen gestuur om sy laaste jare as ’n verslane banneling deur te bring.

Van die see af lyk die eiland soos ’n ontsaglike vesting. Dit is in werklikheid ’n uitgewerkte vulkaan wat byna loodreg uit die Atlantiese Oseaan verrys, met 500 tot 700 meter hoë rotswande. In die middel is berg Actaeon, wat 818 meter hoog is en bo die hele eiland uittroon. Weens die koel Suid-Atlantiese passaatwinde en seestrome het die eiland oor die algemeen ’n gematigde en aangename klimaat. Maar van die laagliggende kuslyn tot die bergagtige binneland is daar ’n groot verskeidenheid weerstoestande en plantegroei.

St. Helena is sedert die laat 17de eeu onder Britse beheer. Die klein bevolking van ongeveer 5 000 is ’n vermenging van mense uit Europa, Asië en Afrika. Engels word in die hele eiland gepraat, maar met ’n kenmerkende aksent. Daar is nie ’n lughawe nie; die enigste verbinding met die buitewêreld is per skip, wat gereeld na Suid-Afrika en Engeland vaar. Trouens, televisie-uitsendings kon eers in die middel van die negentigerjare opgevang word, danksy ’n satellietverbinding.

In die vroeë dertigerjare het die goeie nuus van God se Koninkryk vir die eerste keer hierdie eiland bereik (Matteus 24:14). Deur die jare heen het baie eilanders hierdie skat, wat materiële rykdom oortref, aangegryp (Matteus 6:19, 20). Vandag is St. Helena se verhouding van Getuies tot die bevolking 1 tot 31, die beste in die wêreld!

[Kaarte op bladsy 24]

(Sien publikasie vir oorspronklike teksuitleg)

St. Helena

JAMESTOWN

Levelwood

AFRIKA

ATLANTIESE OSEAAN

St. Helena