Kan jou lewe sinvoller wees?
DIE skynbare waarde van iets weerspieël nie altyd die werklike waarde daarvan nie. Die banknoot met die meeste waarde in die Verenigde State het ’n nominale waarde van $10 000. En tog is die papier waarop dit gedruk is net ’n paar sent werd.
Het jy al ooit gewonder of stukkies papier wat wesenlik min waarde het jou lewe werklik sinvol kan maak? Baie mense dink dit kan. Miljoene werk dag en nag om soveel geld te verdien as wat hulle moontlik kan. Partykeer beteken die najaging van geld dat hulle hulle gesondheid, hulle vriende en selfs hulle gesin opoffer. Van watter nut is dit? Kan geld—of wat ons daarmee koop—ware en blywende bevrediging meebring?
Hoe meer ons na bevrediging soek wat op materiële besittings gegrond is, sê navorsers, hoe kleiner is die kans dat ons dit sal vind. Die joernalis Alfie Kohn kom tot die slotsom dat “bevrediging eenvoudig nie te koop is nie. . . . Mense vir wie welvaart ’n prioriteit in die lewe is, is geneig om ’n buitengewone mate van angs en depressie te ondervind, sowel as ’n laer algemene vlak van welstand.”—International Herald Tribune.
Hoewel navorsers dalk besef dat ’n sinvolle lewe nie van geld afhang nie, dink baie mense nie so nie. Dit is nie juis verbasend nie, aangesien diegene wat in Westerse lande woon met tot 3 000 advertensies per dag gebombardeer kan word. Hetsy dit motors of lekkergoed adverteer, die onderliggende idee is: ‘Koop hierdie produk, en jy sal gelukkiger wees.’
Wat is die gevolg van die meedoënlose aanprysing van materiële waardes? Geestelike waardes word dikwels geïgnoreer! Volgens ’n berig in die tydskrif Newsweek het die Aartsbiskop van Keulen, Duitsland, onlangs verklaar dat “God nie meer ’n onderwerp in ons gemeenskap is nie”.
Dalk gebruik jy byna al jou energie om ’n bestaan te maak. Miskien voel jy dat jy min tyd het om enigiets anders te doen. Maar soms besef jy dalk dat die lewe meer behels as net eindelose sleurwerk, wat jy aanhou doen totdat jou gesondheid of jou ouderdom jou nie meer toelaat nie.
Kan meer aandag aan geestelike sake jou groter bevrediging bring? Wat sal jou lewe sinvoller maak?